Ley kwaan gak nzhul xaa
6
Ngunii Xaa Tubka Nak lo Ches nu nzhé xaa:2 --Guzh lo re xaa Israel: Gorna lee tub xaabyi o tub ngwnaa yaan gak nzhul zaa xaa leeka lee xaa lo na, Xaa Tubka Nak, 3 nyent mod go xaa xis ub kwaan nguxoob nixa nzoo. Nu nixa nyent mod go xaa xis ub kwaan ni, nu nixa nik tub nzoo kwaan nroo kwaan ub, nixa nagawt xaa ub kwaan la xaa lo yag gorzee, nixa ub kwaan mbizh. 4 Dubse tyemp lo yalzhul cheen xaa nyent mod nagawt xaa xle cheen yag ub nixa bizh cheena nu nixa xaba. 5 Gorna zeraka yixoob mbizh kwaan gak nzhul xaa zaa xaa leeka lee xaa lo na, Xaa Tubka Nak, nachuubt xaa yich yek xaa axta yixoob mbizh gak kwaan gak nzhul xaa zaa xaa leeka lee xaa lo na, Xaa Tubka Nak, gak nzhul xaa nu laa xaa roo yich yek xaa. 6 Gorna seetaka kayak nzhul xaa lo na, Xaa Tubka Nak, nyent mod bii xaa lo xaa ngut. 7 Nixa nyent mod bii xaa lo xuz xaa, lo xnaa xaa, lo wech xaa, lo bzan xaa, xaa ngut, nel nzho mod gak beed xaa kwent cheen xaa ngut, nel lee yalnzhul cheen Dios nzho nlu lo yich yek xaa. 8 Rese mbizh kwaan myaan xaa gak nzhul xaa lo na, Xaa Tubka Nak, tubka zo nambey xaa.
9 &Nu cheleeya nzho tub xaa ta yet gax lo xaa, nu gak beed yich yek xaa kwaan ngok nzhul, lee mbizh gazh kwaan gak nzhul xaa stuba nzhaal chuub xaa yek xaa. 10 Lee mbizh xon wee xaa chop palom o chop ngog, nu zaa xaa ma lo ngwleyy roo li na paro nzhaal xaa kwaan na. 11 Zee lee ngwleyy teed tub ma mod gon kwaan gak nzhul xaa, nu lee stub ma nak gon kwaan zeek xaa lo mdo, nu sbaa le ngwleyy zee gak nzhul xaa, nel lee xaa ne ngok beed kwaan tub xaa ngut. Nu leeka mbizh zee le nzhul xaa yich yek xaa lo Xaa Tubka Nak 12 nu zaa xaa leeka lee xaa lo na, Xaa Tubka Nak, rese mbizh kwaan myaan xaa gak nzhul xaa nu zaa xaa leeka lee xaa. Nu wee xaa tub mbakxiil yeen, ma nzho tub liin, ma gak gon kwaan zere xaa gorna nlewa rese mbizh kwaan mded yilo nakootra xaa kwent nel lee yalnzhul cheen xaa ngok beed.
13 &Kwaane nak ley gorna yixoob mbizh yaan xaa gak nzhul xaa zaa xaa leeka lee xaa, ya xaa roo li na paro nzhaal xaa kwaan na, 14 nu teed xaa ma lo na, Xaa Tubka Nak, tub mbakxiil yeen ma nzho tub liin, ma wen gak gon kwaan zeek xaa ma lo mdo; nu tub mbakxiil ma gol, ma nzho tub liin, ma wen, zee gak nzhul mdo; nu tub mbakxiil yeen ma mach ma wen, gak gon kwaan kwi wen xaa kwaan na. 15 Noka zaa xaa tub chekwid gayet kwaan nanyut lebadur leen, nu yat kwaan nanzhot lebadur leen kwaan ndeeb nseyt lo, nu arin kwaan wen doo kwaan nak gon cheen nzhobxtil nu xis ub. 16 Zee lee ngwleyy zaaya lo na, Xaa Tubka Nak, gon kwaan gak nzhul mdo, nu gon kwaan zeek xaa ma lo mdo kwent cheen xaa. 17 Zeera teed xaa mbakxiil lo na, Xaa Tubka Nak, mod gon kwaan kwi wen xaa kwaan na, tubka kwaan chekwid yat kwaan nanyut lebadur leen; noka zaa ngwleyy gon cheen yalgon nu xis ub.
18 & Zee chuub xaa yich yek xaa kwaan nambey roo li na, paro nzhaal xaa kwaan na, nu ko xaa yich yek xaa kwaan ngok nambey lo ki, kwaan nzho xan gon kwaan kwi wen xaa kwaan na. 19 Gorna yilo ruub yek xaa zeera lee ngwleyy zen xuk mbakxiil kwaan nguy, nu cha yat kwaan nanyut lebadur leen, nu tub gayet kwaan nanyut lebadur leen, nu zhiib xaa rese lozhya xaa mzaa leeka lee. 20 Zeera lee ngwleyy kun gon kwaan nkun xaa lo mdo lo na, Xaa Tubka Nak. Rese kwaane nambey nak nu gaka cheen ngwleyy: laz ma kwaan mkun xaa lo mdo nu kor ma kwaan nyalzo xaa. Zeera lee xaa zaa leeka lee xaa nzho mod go xis ub stuba.
21 &Kwaane nak ley kwaan yaan xaa zaa xaa leeka lee xaa, nkin zaa xaa gon ne lo na, Xaa Tubka Nak, nel myaan xaa kwaan na, zee noka nzho mod zaa xaa re stub naz kwaan nzho moda lo xaa. Nu loka kwaan myaan xaa le xaa, nu sbaa le xaaya, mod nak ley kwaan yaan xaa zaa xaa leeka lee xaa.
Wdizh wen kwaan nii ngwleyy
22 Lee Xaa Tubka Nak ngunii lo Ches nu nzhé xaa:
23 --Guzh lo Aarón nu lo re xgann xaa, snee nii wen gu lo re xaa Israel:
24 'Xaa Tubka Nak nii wen lo lu nu kanap xaa lu.
25 Xaa Tubka Nak wii wen lo lu, nu luu xaa yalnkela cheen xaa lo lu;
26 Xaa Tubka Nak luu kwaan wen lo lu, nu le xaa zee wen yo lu.'
27 &Sbaa zet gu le na lo re xaa Israel, zee lee na nii wen lo re xaa."