Yalnzhul cheen pa nzhi re xaa
5
Ngunii Xaa Tubka Nak lo Ches nu nzhé xaa:2 —Guzh lo re xaa Israel zee koo xaa re xaa nzeb yeezh kwaan nyall cho xaa paro mbaz re gu, o xaa nroo nis cho, nu rese xaa kwaan ngok beed xaa mgal cho xaa ngut. 3 Nexa chol naka ngwnaa o xaabyi nkin koo gu xaa paro mbaz gu, zee nagakt beed paro nzho na kwaan re gu.
4 Zee lee re xaa Israel mloo re xaa paro mbaz re xaa modxa nzhé Xaa Tubka Nak lo Ches.
Ley cheen kwaan nzere xaa gorna nle wann xaa
5 Ngunii Xaa Tubka Nak lo Ches nu nzhé xaa:
6 —Guzh lo re xaa Israel: Xaabyi o ngwnaa, xaa le jwalt kwaan tub xaa nanalit nzo lo na, Xaa Tubka Nak, tich xaa nzhoba. 7 Xaa zee nkin yé xaa jwalt kwaan mle xaa, nu kix xaa kwaan mle xaa lo xaa kwaan mle xaaya nu zaa xaa gaay part masra lo xaa. 8 Per chelee xaa kwaan mle xaa jwalt ngut nu nankanot xaa sawlizh xaa, zee lee kwaan zaa xaa lo xaa, zaa xaa lo na, Xaa Tubka Nak, zee ya zaa xaaya lo ngwleyy zee kayaa xaa gon kwaan zere xaa gorna nlewann xaa. 9 Rese lo gon kwaan nambeyy kwaan zaa re xaa Israel lo ngwleyy, xcheen xaa naka. 10 Re gon nambeyy kwaan zaa xaa lo na, xcheen ngwleyy naka; nu noka kwaan zaa xaa lo ngwleyy, xcheen ngwleyy naka.
Ley cheen yalselos
11 Ngunii Xaa Tubka Nak lo Ches nu nzhé xaa:
12 —Guzh lo re xaa Israel: Chelee tub ngwnaa kano stub xaabyi nanalit nak me lo sa me, 13 nu chelee stub xaa kano me nu nanet sa meya nel xlaan nle meya, nu nixa nyent cho xaa neya nu namzent xaa me lo kwaan mle me: 14 per chelee sa me nzhak selos xaa me nel mkano me stub xaabyi o nebse nzhak selos xaa me nixa namkanot me stub xaabyi, 15 zee sa me wee me lo ngwleyy. Nu wee xaa gon cheen me kwaan nak chop kil arin cheen sebad. Nu nachubt xaa anseyt tich gon nu nixa yaal nel naka tub gon cheen yalselos, Nu gon kwaan selazh xaa kwaan nlu re xjwalt xaa.
16 &Zee lee ngwleyy wee ngwnaa lo na, Xaa Tubka Nak. 17 Zee ko xaa nis nambey leen tub yas yo nu zen xaa cheep yide kwaan nzho leen li na nu ko xaaya leen nis. 18 Zeera wee xaa ngwnaa lo na, Xaa Tubka Nak, nu chil xaa yich yek me nu zhiib xaa gon kwaan selazh me kwaan nlu re xjwalt xaa lozhya me , kwaan nak gon cheen yalselos. Nu lee ngwleyy seetaka zen yas yo kwaan nzho nis nala leen, kwaan nak kwaan nyano kwaan nawent. 19 zee lee ngwleyy le zee yaan me tub kwaan kwaan na, Xaa Tubka Nak, nu yé xaa lo me: "Chelee lu nik stub xaabyi namchaalt lu nu nixa nangokt beed lu, zee lee nis nala kwaan nyano kwaan nawent nik tub kwaan naleta lu. 20 Per chelee lu ngok nanalit lu lo sa lu, nixa nabeyy xaa lo lu per mle beed lu lu kwaan stub xaabyi, 21 zee lee Xaa Tubka Nak xobde lo lu, lo re xaa yezh cheen lu, nu le xaa zee nakanot lu mad nu zeki lextoo lu." . 22 Noka yé xaa lo me: "Gorna lee nis nala kwaan nyano kwaan nawent reep leen lextoo lu, zeki lextoo lu nu leya zee nakanot lu mad. Nu lee ngwnaa keb nu yé: " ¡Wena, sbaa gaka!"
23 &Zee lee ngwleyy kee kwaan nawent ne lo tub yech, nu che xaaya kwaan nis nala. 24 Zeera yé xaa lo me zee go me nis nala kwaan nyano kwaan nawent zee gorna yilo go meya zee zhiib xyan lextoo me. 25 Zee lee ngwleyy zen gon cheen yalselos kwaan nak gon cheen yalgon lo me we xaaya nu kun xaaya lo mdo lo na, Xaa Tubka Nak. 26 Zee le ngwleyy zen tub lozhya gon kwaan selazh me, nu zeek xaaya lo mdo.
&Zeera yé ngwleyy lo me zee go me nis nala. 27 Nu gorna yilo go me nis nala kwaan nyano kwaan nawent, chelee me ngok nanalit me lo sa me, zee zhiib xyan lextoo me, nu zeki lextoo me nu leya zee nakanot me mad zee gak me mod tub me mxobde xaa lo re xaa yezh cheen me. 28 Per chelee me nanakt me beed sinka nzhul nak me lo sa me, zee nik tub kwaan nagakt lo me nu kano me mad.
29 &Kwaane nak ley cheen yalselos gorna lee ngwnaa nalit nak lo sa nu ngok beed me, nixa nabeyy sa me lo me. 30 Noka nle xchiin xaa ley gorna lee sa me nzhak selos me, zee yiidno xaa me lo na, XaaTubka Nak, nu lo ngwleyy zee naab xaa kwent lo me mod nzhé ley ne. 31 Zee lee xaabyi gak libr lo re jwalt nu lee ngwnaa kwib rese jwalt tich."