Zhiin kwaan le re dii cheen Coat
4
Ngunii Xaa Tubka Nak lo Ches nu lo Aarón nu nzhé xaa:2 --Btoop le re xaa dii cheen Coat, xaa ngok xgann Leví, loka lak nak re li xaa, 3 nu bkee gu le re xaabyi xaa nzho galbchii liin axta choobchii liin, xaa kwaan nzho mod ke zhiin lo li na paro nzhaal re xaa kwaan na.
4 &Lee zhiin kwaan le re xaa dii cheen Coat leen li na, paro nzhaal xaa kwaan na, nak wee xaa rese kwaan nambey doo. 5 Gorna lee xaa Israel roo pa nzho xaa, lee Aarón nu re xgann xaa zeeb leen li na nu la xaa ler nu saaw xaa tich kaj cheen trat kwaan ler. 6 Zeera saaw xaa ticha kwaan tub lee yed kwaan chul doo nu kwaan tub lee ler naxne nagaas nu teed xaa bar choya zee nzho mod wee xaaya.
7 &Lee lo mes kwaan nzo lo na, zhiib xaa tub lee ler naxne nagaas, nu zhiib xaa yann, kucher, tas, kantaflor, pa nyu gon cheen xis ub, nu noka zhiib xaa yat kwaan tubka nzhib loya. 8 Lo rese kwaane zhiib xaa tub lee ler naxne, zeera saaw xaa lo mes kwaan tub lee yed chul doo, nu teed xaa bar choya zee nzho mod wee xaaya. 9 Nu kwaan tub lee ler naxne nagaas saaw xaa tich bruj, nu re kwaan nzaa xni kwaan nzob yeka, nu kwaan nsuyya, nu yann kwaan nyu xkade leen, nu tich rese kwaan nyu nseyt leen. 10 Zeera saaw xaa tich bruj kwaan nak or nu re kwaan nlexchinna kwaan tub lee yed kwaan chul doo, nu zhiib xaaya lo tub kwaan teed xaa bar choya zee nzho mod wee xaaya.
11 &Lee lo mdo kwaan nak or, zhiib xaa tub lee ler naxne nagaas nu lee ticha saaw xaa kwaan tub lee yed chul doo, nu teed xaa bar choya zee nzho mod wee xaaya.
12 &Zeera toop xaa rese kwaan nle xchinn xaa leen li na paro nzhaal xaa kwaan na, nu chal xaaya kwaan tub lee ler naxne nagaas, nu saaw xaa ticha kwaan tub lee yed kwaan chul doo, nu zeera zhiib xaaya lo bar zee nzho mod wee xaaya.
13 & Nu koo xaa xkade lee mdo kwaan nzek xaa ma lo nu saaw xaa ticha kwaan tub lee ler naxne nagaas. 14 Nu lo mdo zhiib xaa rese kwaan nle xchinn na, nu yann kwaan nyu xkade leen, kwaan nkano zyen ley, palet, tas, nu rese kwaan nlexchinn xaa lo mdo. Zeera saaw xaa ticha kwaan tub lee yed chul doo nu teed xaa bar choya zee nzho mod wee xaaya.
15 &Gorna lee re xaa Israel roo pa nzho xaa, zee lee Aarón nu re xgann xaa saaw li na nu rese kwaan nlexchinn xaa leena, zeera yiid re xaa nak dii cheen Coat zee wee xaa li na; per nagalt xaa nik tub kwaan nambey zee nayeta xaa. kwaane nak kwaan yalzo re xaa dii cheen Coat wee xaa.
16 &Eleazar, xgann ngwleyy Aarón, yalzo yiidno nseyt kwaan yo leen bruj, nu yaal kwaan chul doo nzebech, nu gon kwaan nak cheen yalgon kwaan tubka nzaa xaa, nu nseyt kwaan nle nzhul xaa. Nu noka kanap xaa li na, nu rese kwaan nzho leena, nu rese kwaan nlexchinn xaa leena."
17 Ngunii Xaa Tubka Nak lo Ches nu lo Aarón nu nzhé xaa:
18 --Nalaat gu luux na re xaa nak dii cheen Coat, lo re xaa nak dii cheen Leví; 19 zee ban re xaa nu nayeta xaa gorna bii xaa gax lo kwaan nambey doo. Kwaane nak kwaan le Aarón nu re xgann xaa, zo xaa kad tub xtii Coat lo zhiin kwaan nzhaal le xaa nu re kwaan wee xaa. 20 Nanzhaalt zeeb xtii Coat wii xaa lo re kwaan nambey nel chelee xaa wii xaa loya telise yet xaa."
Zhiin kwaan le re dii cheen Gersón
21 Ngunii Xaa Tubka Nak lo Ches nu lo Aarón nu nzhé xaa:
22 --Noka bkee gu le re xaa nak dii cheen Gersón, loka lak nak re xey xaa nu re li xaa, 23 bkee gu le re xaabyi xaa nzho masra galbchii liin axta choobchii liin re xaa nzho mod ke zhiin lo li na paro nzhaal xaa kwaan na.
24 &Lee zhiin kwaan le re dii cheen Gersón nak wee xaa re kwaane: 25 wee xaa re ler kwaan nke leen li na, paro nzhaal xaa kwaan na, nu kwaan nyaaw ticha, nu yed kwaan wen doo kwaan nzhib ticha, nu ler ndok kwaan nke roo li na, 26 noka wee xaa ler kwaan nyaaw naz lach jwer, nu ler kwaan nyaaw roo lach jwer li na nu mdo, nu re doo, nu rese kwaan nle xchinn xaa. Nu wee xaa rese kwaan nzhaal kwaan re kwaane. 27 Rese zhiin kwaan le dii cheen Gersón, nexa chol wee xaa re kwaan nlexchinn xaa leen li na, nzhaal le xaaya mod nabeyy Aarón nu re xgann xaa, xaa ngwii lo rese kwaan see re xaa. 28 Re zhiin ne nak kwaan le re dii cheen Gersón li na paro nzhaal xaa kwaan na, lee xaa wii loya nak Itamar xgann ngwleyy Aarón.
Zhiin kwaan le re dii cheen Merari
29 &Bkee gu le re xaa nak dii cheen Merari, loka lak nak re xey xaa nu re xaa li xaa, 30 bkee gu le re xaabyi xaa nzho masra galbchii liin axta choobchii liin, xaa nzho mod ke zhiin lo li na, paro nzhaal xaa kwaan na. 31 Lee zhiin kwaan le re xaa nak see xaa re tab cheen yoo, nu re yag kwaan nke nkaan choya, yiso, nu kwaan nzo niiya lo; 32 nu sbaaka see xaa rese yiso kwaan nsaaw lach jwer, nu kwaan nzo niiya lo, nu rese stak kwaan nzo lo yo, nu doo cheena, nu noka rese kwaan nle xchiina. Guzh lo kad tub xaa cho kwaan see xaa. 33 Re zhiin ne nak kwaan le re dii cheen Merari lo yoo paro nkasa re xaa nzhaal xaa kwaan na. Lee xaa wii loya nak Itamar, xgann ngwleyy Aarón."
Le re xaa nak dii cheen Coat
34 Ches rop Aarón nu re xaa non yezh mkee xaa le re dii cheen Coat, loka lak nak re xey xaa nu re xaa li xaa, 35 nu mkee xaa le re xaabyi xaa nzho masra galbchii liin axta choobchii liin, xaa nzho mod ke zhiin lo li Xaa Tubka Nak paro nzhaal xaa kwaan lee xaa. 36 Rese xaa kwaan mke le nak, chop mil nzho gazh gayoo yirol xaa. 37 Tub lanee nak re xaa mke le, xaa nak dii cheen Coat, xaa ke zhiin lo yoo paro nzhaal re xaa kwaan Xaa Tubka Nak. Re xaa ne mkee Ches rop Aarón le modxa ngunabeyy Xaa Tubka Nak lo Ches.
Le re xaa nak dii cheen Gersón
38 Noka mkee xaa le re xaa nak dii cheen Gersón, mkee xaa le xaa loka lak nak re sawlizh xaa, 39 nu mkee xaa le re xaabyi xaa nzho masra galbchii liin axta choobchii liin, xaa nzho mod ke zhiin lo li Xaa Tubka Nak, paro nzhaal re xaa kwaan lee xaa. 40 Tub lanee nak re xaa mke le, chop mil kwaan xoop gayoo nzho galbchii xaa. 41 Tub lanee nak re xaa mke le, xaa nak dii cheen Gersón, xaa ke zhiin lo yoo paro nzhaal re xaa kwaan Xaa Tubka Nak. Re xaa ne mtoop Ches rop Aarón le modxa ngunabeyy Xaa Tubka Nak lo Ches.
Le re xaa nak dii cheen Merari
42 Noka mkee xaa le re xaa nak dii cheen Merari, mkee xaa le xaa loka lak nak re sawlizh xaa, 43 nu mkee xaa le re xaabyi xaa nzho masra galbchii liin axta choobchii liin, xaa nzho mod ke zhiin lo li Xaa Tubka Nak, paro nzhaal xaa kwaan lee xaa. 44 Tub lanee nak re xaa mke le, xaa nak dii cheen Merari, chon mil chop gayoo xaa. 45 Rese xaa mke le xaa nak dii cheen Merari. Re xaa ne mkee Ches rop Aarón le modxa ngunabeyy Xaa Tubka Nak lo Ches.
46 Ches nu Aarón nu re xaa non yezh Israel mkee xaa le re xaa Leví, loka lak nak re sawlizh xaa. 47 Tub lanee nak rese xaabyi xaa nzho masra galbchii liin axta choobchii liin, xaa wee li Xaa Tubka Nak, paro nzhaal re xaa kwaan lee xaa. 48 Lo rese xaa nak tub xon mil kwaan gaay gayoo nzho tapgal xaa. 49 Modxa ngunabeyy Xaa Tubka Nak lo Ches, ngunabeyy xaa cho kwaan nzhaal le re xaa, nu cho kwaan nzhaal wee re xaa; nu sbaa mke le re xaa modxa nzhé Xaa Tubka Nak lo Ches.