Dii cheen Leví
3
Re xaa ne ngok re sawlizh Aarón nu Ches, gorna ngunii Xaa Tubka Nak lo Ches yek Yi Sinaí. 2 Snee le re xgaan Aarón: xaa ngol yilotlaka le Nadab, Abiú, Eleazar nu Itamar. 3 Snee le re xgann ngwleyy Aarón xaa mle nzhul xaa, xaa gak ngwleyy. 4 Per Nadab nu Abiú ngut lo Xaa Tubka Nak leezha mloo xaa ki nu mzeek xaa yaal tub mod nanzhaalt le xaa lo Xaa Tubka Nak naz wen yizhyo bizh Sinaí. Nadab nu Abiú namkanot xaa xiin xaa. Eleazar nu Itamar mle xaa gan ngok xaa ngwleyy kwent cheen xuz xaa Aarón.5 Ngunii Xaa Tubka Nak lo Ches nu nzhé xaa:
6 —Brezh re dii cheen Leví nu bzo xaa lo ngwleyy Aarón, zee le xaa zhiin. 7 Zee lee xaa le xaa zhiin kwaan nle Aarón nu ke xaa zhiin lo re xaa yezh, nu le xaa zhiin roo li na, Xaa Tubka Nak. 8 Zee kanap xaa rese kwaan lexchinn leen li na, nu rese kwaan mlaa re xaa Israel kanap xaa, nu le xaa rese zhiin roo li na. 9 Bleyy gu re xaa nak dii cheen Leví zee le xaa zhiin lo Aarón nu lo re xgann xaa. Nu lo re xaa Israel, re xaa gak xaa le zhiin lo re ngwleyy. 10 Lo Aarón nu lo re xgann xaa zaa xaa lo xaa le xchiin ngwleyy nu loka xaa nanakt ngwleyy, xaa bi gax leen li na, nzhaal yet xaa.
11 Ngunii Xaa Tubka Nak lo Ches nu nzhé xaa:
12 —Leeka na mleyy re xaa dii cheen Leví lo re xaa Israel zee gak xaa xaa na. Nak xaa xaa na kwent cheen re xaa ngol yilotlaka lo re xaa Israel. 13 Xaa na nak re xaa ngol yilotlaka, nel lee mbizh kwaan mbit na re xaa ngol yilotlaka lo re xaa Egipto, zee mle nzhul na re xaa ngol yilotlaka lo re xaa Israel, re myet nu re ma nak xcheen na. Na Xaa Tubka Nak.
14 Ngunii XaaTubka Nak lo Ches naz wen yizhyo bizh Sinaí nu nzhé xaa:
15 —Toop le re xaa nak lo dii cheen Leví loka paro nak re xey xaa nu re xaa li xaa xuz xaa. Kee lu le re madbyi mad xaa nzho masra tub mbee.
16 Zee lee Ches mtoop le re xaa mod nzhé Xaa Tubka Nak lo xaa.
17 Le re xgann Leví nak: Gersón, Coat nu Merari.
18 Le rop xgann Gersón nak: Libni nu Simei.
19 Le re xgann Coat nak: Amram, Izhar, Hebrón nu Uziel.
20 Le rop xgann Merari nak: Mahli nu Musi. Xaa ne nak re xaa li xaa lo dii cheen Leví.
21 Naz lo Gersón nze re xaa li Libni nu Simei. Xaa ne ngok re xaa li Gersón. 22 Xaa mke le lo re xaa, mlo xaa kwent re madbyi, re mad nzho masra tub mbee nu re xaabyi xaa gox, lo rese xaa nak xaa gazh mil nzho gaay gayoo xaa. 23 Re xaa nak dii cheen Gersón mlaz naz tich li Xaa Tubka Nak naz pa naz nyaz mbizh. 24 Xaa nabeyy lo re dii cheen Gersón nak Eliasaf xgann Lael 25 Re dii cheen Gersón nak xaa nkanap li Xaa Tubka Nak: re ler kwaan nyaaw ticha nu ler ndok kwaan nke rooya, 26 nu ler kwaan nsaaw lach jwer li Xaa Tubka Nak nu ler kwaan nsaaw roo lach nu re doo kwaan nle xchiin leen li Xaa Tubka Nak.
27 Naz lo Coat nze re xaa li Amram, Izhar, Hebrón nu Uziel. Xaa ne ngok re xaa li Coat. 28 Rese xaa mke le lo re xaa, xaa mloo xaa kwent rese madbyi, mad nzho masra tub mbee nu re xaabyi xaa gox, lo rese xaa nak xon mil kwaan xoop gayoo xaaa. Re xaa ne nak xaa mke zhiin leen li Xaa Tubka Nak. 29 Re xaa dii cheen Coat mlaz naz ta yat lo li Xaa Tubka Nak 30 Xaa nabeyy lo re xaa dii Coat ngok Elizafán xgann Uziel. 31 Nu lee re xgann Coat nkanap kaj, mes, bruj, rop mdo nu re kwaan nzho leen li Xaa Tubka Nak kwaan nle xchiin xaa, nu ler ndok kwaan nsaaw kaj nu re kwaan tubka nle xchinn xaa.
32 Lee xaa nabeyy lo re xaa dii cheen Leví ngok Eleazar xgann ngwleyy Aarón, xaa nkanap li Xaa Tubka Nak.
33 Naz lo Merari nze re xaa li Mahli nu Musi. Xaa ne ngok re xaa li Merari. 34 Xaa mke le lo re xaa, mlo xaa kwent re madbyi, re mad nzho masra tub mbee nu re xaabyi xaa gox, lo rese xaa nak xoop mil kwaan chop gayoo xaa. 35 Xaa nabeyy lo dii cheen Merari nak Zuriel xgann Abihail. Nu le xaa lo dii chee Merari Xaa mlaz naz ta ya lo li Xaa Tubka Nak. 36 Re xaa nak dii Merari wee rese tab kwaan nzo cho li Xaa Tubka Nak nu re yag kwaan nke nkaan choya nu yiso nu re kwaan nzo niiya lo nu rese kwaan nle xchiin xaa. 37 Re yiso kwaan nzo dub welt lach li Xaa Tubka Nak nu kwaan zo niiya lo, stak nu re doo.
38 Ches nu Aarón nu re xgann xaa mlaz naz delant lo li Xaa Tubka Nak, naz pa nlen mbizh, nel lee xaa nak xaa nke zhiin leen li Xaa Tubka Nak nu xaa nle zhiin lo re xaa Israel. Nu loka xaa nanakt ngwleyy xaa bii gax leen li Xaa Tubka Nak nzhaal yet. 39 Ches nu Aarón mkee le re dii cheen Leví re madbyi mad nzho masra tub mbee nu re xaabyi xaa gox, modxa nzhé Xaa Tubka Nak lo xaa. Lo rese xaa nak tub galbchop mil xaa.
Msela xaa re xaa ngol yilotlaka
40 Xaa Tubka Nak ngunii lo Ches:
—Toop le re xaa ngol yilotlaka lo re xaa Israel xaa nzho masra tub mbe nu kee le xaa. 41 Zeera kwey lu re xaa Leví xaa gak xaa na kwent cheen re xaa Israel xaabyi xaa ngol yilotlaka nu re xma re xaa Leví mod re xma re xaa Israel ma ngol yilotlaka. Na nak Xaa Tubka Nak.
42 Ches mkee le re xaa Israel xaa ngol yilotlaka modxa nzhé Xaa Tubka Nak lo xaa. 43 Tub lanee nak re re madbyi mad nzho masra tub mbee nu re xaabyi xaa gox xaa ngol yilotlaka lo re xaa Israel, nak galbchop mil chop gayoo kwaan nzho chon gal chin xaa.
44 Zee nzhé Xaa Tubka Nak lo Ches:
45 —Zeera kwey lu re xaa Leví xaa gak xaa na kwent cheen re Israel xaabyi xaa ngol yilotlaka nu re xma re xaa Leví mod re xma re xaa Israel ma ngol yilotlaka. Na nak Xaa Tubka Nak 46 Re xaabyi Israel xaa gro nak zyenra lo re xaa Leví nu nzho mod sela xaa chop gayoo chon gal chin xaa kwaan mlake, 47 zee naab lu gaay demi plat lo kad tub xaa nel tub labaa nak non demi kwaan nchiix xaa leen li na, Xaa Tubka Nak kwaan nga chiibtub gram. 48 Re demi ne mzaa xaa lo Aarón nu lo re xgann xaa zee msela xaa xaa.
49 Zee lee Ches mzen re demi zee sela xaa re xaabyi, xaa ngol yilotlaka, xaa mlake lo re xaa dii cheen Leví. 50 Kwaan mzen xaa nak tub mil chon gayoo chongalchiin demi plat, tub lal paro non kwaan nchiix xaa leen li Xaa Tubka Nak. 51 Zeera mzaa xaa demi lo Aarón nu lo re xgann xaa, mod nzhé Xaa Tubka Nak lo xaa.