Kwaan chul le Dios lo re xaa nzhon diizh
26
&Nadexkwaat gu maj, nixa ngwneb, nixa kwaan nak ke nu nixa nadexkwaat guya yizhyo cheen gu nu nixa nakichxubt gu loya nel na nak Xaa Tubka Nak, xaa nak Xtios gu. 2 Blozhaw gu zhe sab nu ble non gu li na, Xaa Tubka Nak.3 &Chelee gu le gu kwaan nii ley cheen na nu gon gu xtizh na nu le guya, 4 zee lee na xaal yey tyemp cheena, yizhyo nu re yag cheen gu zaa xle. 5 Kano gu zyen doo nzhobxtil axta gorna toop gu ub nu lee ub seetaka nkano gu axta gorna gaan gu lo yo stub welt; gaw gu axta yizhe lextoo nu nalet xgab yo gu yizhyo cheen gu. 6 Na le zee yo wen gu yizhyo cheen gu, gaa gu nu nyent cho cheb gu; nu le na zee nayot rese ma nakap nu nixa nayot dil yizhyo cheen gu. 7 Renal gu re xaa nayii ne gu nu gut gu xaa kwaan spad. 8 Gaay gu renal tub gayoo xaa nu tub gayoo gu renal tub chii mil xaa nu gut gu re xaa nayii ne gu kwaan spad, 9 na wii wen lo re gu nu le na zee xen gu nu gak zyen gu nu le na kwaan myaan na kwaan re gu. 10 Seetaka kayaw gu kwaan mtoop gu liin gox, zee lee gu nzhaala kooya zee kozhaw gu kwaan kub.
11 &¡Na dexkwaa li na lo re gu nu nixa nayiit na ne na re gu! 12 ¡Na zee kwaan re gu: nu gak na Xtios re gu nu lee re gu gak xaa na! 13 Na nak Xaa Tubka Nak, xaa nak Xtios gu, xaa mloo gu yizhyo Egipto zee nagaktra gu mos cheen re xaa zee; pa ngok gu mod ma kwaan mrib tub yog nga doo yenn, per na mluxa zee wen ze gu.
Nakap le Dios lo re xaa nanzhont diizh
14 &Per chelee re gu nagont kwaan ni na nu nixa nalet guya, 15 nu nanzheklat gu kwaan ni ley cheen na nu nixa nagont gu xtizh na nu nalet guya nu mlux kwaan myaan na kwaan gu, 16 zee leeka na ted re gu bid kwaan tub yalnacheb kwaan gro doo nu noka xaal na yalyizh nu xlee kwaan lux zaalo gu nu yalnaban cheen gu nu sbaasa gaan gu nu lee re xaa nayii ne gu gaw kwaan roo lo yalgon cheen gu. 17 Na wii nawent lo gu nu lee re xaa nayii ne gu le gan lo gu. Nu leeka re xaa kwaan nayii ne gu nabeyy lo gu nu lee re gu xonn nixa nyent cho reke tich gu.
18 &Nu cheleeya lo rese kwaan mded gu naletaka gu kwaan ni na, tub gazh welt ted na gu bid lo re jwalt cheen gu, 19 na luux yalxwa nu yalned cheen gu nu le na lee yiba gak mod yiib nu lee yizhyo gak mod brons. 20 Nu sbaasa luux gu jwers cheen gu, nel lee yizhyo cheen gu nu re yag cheen gu nazaat xle.
21 &Nu chelee gu seetaka nalet gu kwaan mxaal na le gu, tub gazh welt ted na gu bid lo re jwalt cheen gu. 22 Noka xaal na re ma wen lo re gu zee gaw ma xinn gu nu luux ma re xma gu, zee gak cheepse re gu nu lee naz cheen nyen xaa ze.
23 &Nu cheleeya ngulo mded re kwaane nu nalet gu kwaan ni na nu seetaka wii nawent gu lo na, 24 zee lee na wii nawent lo re gu nu leeka na ted gu bid stub gazh welt lo re jwalt cheen gu. 25 Nu la na yet gu kwaan spad, nel mlaa gu kwaan myaan na kwaan gu. Gorna xonn gu leen yezh cheen gu, xaal na tub yalyizh, zee yiga gu lo re xaa nayii ne gu.
26 &Gorna lee na luux kwaan gaw gu, tub chii ngwnaa kee yat gaw gu lo tuka zhil nu zaa me cheepse kwaan gaw gu nixa nayizhet lextoo gu.
27 &Nu cheleeya ngulo mded re kwaane nu seetaka nagontaka gu xtizh na nu wii nawent gu lo na, 28 zeesi lee na wii nawent lo re gu kwaan yalnayii cheen na nu leeka na ted na gu bid tub gazh welt lo re jwalt cheen gu. 29 Zee lee re gu nkin gu gaw xpaal xgann gu nu xpaal xchaap gu. 30 Luux na pa wii gu lo re maj nu luux na lo mdo pa nzek gu yaal nu kwek monton na xkwerp re gu tich re maj kwaan nambant, nel nanlet na kwaan ni gu. 31 Na luux yezh cheen gu nu luux na yidoo cheen gu. Nu nixa nadabxiit na lo bech cheen re ma kwaan teed gu lo na.
32 &Nu mod ne luux na xkizhyo gu nu lee re xaa kwaan nayii ne gu yiid yoya nu dedyall xaa 33 Na ko gu leen yezh cheen gu nu kwaan spad reke na tich gu nu axta le na yizhyo cheen gu lakeya sbaasa nu luux na yezh cheen gu. 34 Zee lee yizhyo gak nix rese liin kwaan naket gu zhiin loya zee leeya le deskans kwent cheen liin gazh gorna lee re gu yo yizhyo cheen re xaa nayii ne gu. 35 Dubse tyemp gorna lee yizhyo lake sbaasa kanoya deskans kwaan namkanota rese liin gazh kwaan nangut guya.
36 &Lee rese xaa lake lo re gu xaa mbanaka, luu gro doo gak yalnacheb cheen na lo yizhyo cheen re xaa nayii ne gu nu kwaan bi cheen tub lag kwaan ngun lo mbi le zee xonn gu nu rexonn xaa mod xaa kwaan kareke xaa tich kwaan spad nu la xaa lo yo nixa nyent cho reke tich xaa. 37 Mod xaa kwaan kareke re xaa tich kwaan spad rexonn re xaa nu ral nii xaa lo wechxinn xaa nixa nyent cho reke tich xaa nu re xaa nayii ne xaa le gan lo xaa. 38 Lux re xaa leen yezh cheen re xaa nayii ne xaa nu gak xaa mod kwaan gaw re xaa. 39 Lee re xaa gu, xaa mbanaka lux yizhyo cheen re xaa nayii ne gu, kwent cheen re jwalt cheen re gu nu kwent cheen re xey gu xaa yilo.
40 &Per chelee re gu yé re jwalt kwaan mle gu nu re jwalt cheen re xey gu nu re kwaan nakap kwaan mle gu lo na, 41 kwaan mle gu jwers lo na zee xaal na gu yezh cheen re xaa nayii ne gu nu chelee lextoo re xaa kwaan nanzheet gak wen nu labeyy xaa jwalt cheen xaa, 42 zee selazh na kwaan myaan na kwaan Kob, kwaan Chak nu kwaan Abraham nu noka selazh na yizhyo. 43 Gorna lee re xaa roo xaa lo yizhyo leeya gak nix gorna nagaant xaaya nu re tyemp kwaan nayot xaaya, per nzhaal labeyy xaa re jwalt cheen xaa, nel nambint xaa xtizh na nu namlet xaa kwaan nzhé ley cheen na.
44 &Nixa kwaan rese kwaane, nixa nzho xaa yizhyo cheen re xaa nayii ne xaa, nazeret na xaa, nixa nayiit na ne xaa, axta nzhekla na nglux na xaa nu nixa naluuxt na kwaan myaan na kwaan re xaa na, nel na nak, Xaa Tubka Nak, xaa nak Xtios gu. 45 Sinka selazh na kwaan myaan na kwaan re xey gu xaa yilo gorna mlo na re xaa yizhyo Egipto lo re xaa stub yezh lee na nzhekla gak Dios cheen re xaa, nel na nak Xaa Tubka Nak."
46 Kwaane nak ley, kwaan myaan Xaa Tubka Nak kwan xaa Israel kwaan mza xaa lo Ches yek yi Sinaí.