Gon kwaan nambey kwaan zaa xaa lo Dios
27
Ngunii Xaa Tubka Nak lo Ches nu nzhé xaa:2 —Guzh lo re xaa Israel kwaane: Gorna yaan xaa zaa xaa tub myet lo na, Xaa Tubka Nak, nzhaal zaa xaa loka tub paro non xaa. 3 Chelee xaa nak xaa xaabyi, xaa nzho tub gal liin axta xaa nzho tub chon gal liin, kix xaa choobchii demi plat tub lal paro nchiix xaa re kwaan leen li na. 4 Nu cheleeya ngwnaaya, kix xaa me galbchii demi plat. 5 Nu cheleeya madbyiya, mad nzho gaay liin axta tub gal liin, kix xaa mad tub gal demi plat nu cheleeya madnaaya, mad nzho leeka tub labaa liin, kix xaa mad chii demi plat. 6 Nu cheleeya madbyiya, mad nzho tub mbee nu axta gaay liin, kix xaa mad gaay demi plat nu cheleeya madnaaya, mad nzho leeka tub labaa liin, kix xaa mad chon demi plat. 7 Nu cheleeya xaabyi, xaa nzho chon gal liin o ngoxra xaa, kix xaa xaa chiin demi plat, nu cheleeya ngwnaaya, me nzho leeka tub labaa liin, kix xaa me chii demi plat. 8 Nu chelee xaa yaan kwaane nak xaa nyent demi lo, zee ya xaa lo ngwleyy, zee lee ngwleyy wii nel paro kix xaa lo kwaan myaan xaa.
9 &Cheleeya naka re ma kwaan nzhaal teed gu lo na Xaa Tubka Nak, nu rese kwaan zaa gu lo na gak tub kwaan nambey. 10 Nyent mod zhee tub ma wen kwaan tub ma nawent nu nixa nyent mod zhee tub ma nawent kwaan tub ma wen. Chelee xaa chee xaa ma, ropse ma gak ma nambey.
11 &Chelee gon kwaan zaa gu lo na, Xaa Tubka Nak, nak tub ma beed, wee gu ma lo ngwleyy, 12 nu lee xaa yé nel lak non ma. Loka paro yé ngwleyy tub lal zee gak non ma. 13 Chelee xpixwann ma nzhekla bare ma lo xaa, nkin zaa xaa tub part lo gaay part masra lo kwaan yé ngwleyy.
14 &Cheleeya nzho tub xaa nzhekla zaa li lo na, Xaa Tubka Nak, ngwleyy yé nel che wen nak li xaa o nawenta nu loka paro yé ngwleyy tub lal baa nzhaal gak nona. 15 Per chelee xaa kwaan mzaa li nzhekla kayaaya stuba nkin zaa xaa tub part lo gaay part masra lo paro nona, zee gaka xcheen xaa.
16 &Cheleeya nzho tub xaa nzhekla zaa tub lee xkizhyo lo na, Xaa Tubka Nak, lee paro non kwaan zaa xaa nak loka paro kwaan ngoo xaa lo yalgon kwaan mlo xaa lo yo, loka paro non tub choobchii demi plat lo chop gayoo gal kil bizh yix sebad. 17 Chelee gu zaa gu xkizhyo gu liin kwaan kwezh xaa kach, leeka tub lal baa gak nona. 18 Per chelee gu koo xa guya axta yilo ded liin kwaan kwezh xaa kach, zee lee ngwleyy wii nel lak liin nzho jwalt kwezh xaa kach zee yé xaa tub lal baa nona lo liin kwaan nzho jwalt kwezh xaa kach.
19 &Chelee xaa kwaan zaa tub lee xkizhyo lo na, nzhekla xaa zi xaaya stuba, nkin zaa xaa tub part lo gaay part masra lo kwaan yé ngwleyy zee lee xkizhyo xaa gak xcheen xaa stuba. 20 Per chelee xaa nanzheklat xaa zi xaaya stuba o to xaaya lo stub xaa, nyentra mod gaka xcheen xaa. 21 Gorna zhiin liin kwaan kwezh xaa kach zee gaka mod tub kwaan mlaa xaa sbaasa, nu gaka tub lee yizhyo kwaan nambey kwaan mloo xa xaa zaa xaa lo Xaa Tubka Nak, zee gaka cheen ngwleyy.
22 &Chelee tub xaa zi tub lee yizhyo kwaan nanakt cheen sawlizh xaa, nu zaa xaaya lo na, Xaa Tubka Nak, 23 zee yé ngwleyy nel lak nona per loka lak liin kwaan nzho jwalt kwezh xaa kach. Mbizh zee lee xaa naka xkizhyoya kix lak nona. Nel naka tub kwaan nambey lo na, Xaa Tubka Nak. 24 Liin kwaan kwezh xaa kach zee lee yizhyo gak cheen sawlizh xaa kwaan nak cheena axta yilo.
25 &Loka paro nona nkin gaka tub demi plat kwaan nga chiibtub gram, modxa nchiix xaa leen li na.
26 &Nik tub xaa nyent mod zaa xma lo na, ma ngol yilotlaka, ngoon o mbakxiil, nel re ma yilotlaka nakla xma na, Xaa Tubka Nak. 27 Cheleeya naka tub ma beed, nzho mod gak ma xma xaa nebse kix xaa paro yé ngwleyy masra tub part lo gaay part. Chelee xaa nazit xaa ma, zee to xaa ma lo stub xaa loka paro yé ngwleyy.
28 &Nyent cho nzho mod to nu zi kwaan kwaan mlo xa xaa zaa xaa lo na, Xaa Tubka Nak, cheleeya naka myet, ma o yizhyo, nel naka tub kwaan nambey kwaan mlo xa xaa lo na Xaa Tubka Nak. 29 Nik tub myet kwaan mloo xa xaa, xaa mzaa xaa lo na nyent mod sela xaa, sinka nkin gut xaa xaa.
30 &Tub part lo chii part cheen re yalgon, lo rese kwaan nzhan xaa o xle cheen re yag, naka cheen na, Xaa Tubka Nak nu nambey naka. 31 Chelee xaa nzhekla xaa zi xaaya, nkin zaa xaa tub part lo gaay part masra.
32 &Tub part lo chii part lo rese ma ngoon, ma ndok o ma chuut, gak nambey lo na, Xaa Tubka Nak. Xaa nak xpixwaann ma zen tub ma lo chii ma kwaan mloo xaa kwent. 33 Lee xaa nyent mod kwey ma che wen ma o nawent ma. Nu chelee xaa chee xaa tub ma kwent cheen stub ma, ropse ma gak nambey nu nyent mod zi xaa ma stuba."
34 Kwaane nak ley, kwaan ngunabeyy Xaa Tubka Nak kwaan xaa Israel kwaan mza xaa lo Ches yek yi Sinaí.