Éxodo,
Yech mrop kwaan mkee Ches,
Kwaan nzaa kwent xomod mroo re xaa Israel Egipto
Bid kwaan mded re xaa Israel naz Egipto
1
Snee le re xgaan Israel, xaa mzhin kwaan Kob naz Egipto, kad tub xaa mzhin kwaan re xaa li xaa: 2 Ben, Simeón, Leví, Judá, 3 Isacar, Zabulón, Benjamín, 4 Dan, Neftalí, Gad nu Aser. 5 Re dii cheen Kob nak chon gal chii xaa. Nu lee Che nzhola Egipto.6 Che nu re wech xaa nu rese xaa nzexen kwaan lee xaa ngutla. 7 Nu lee re xaa Israel nzeyak zyen doo, nu sbaa zee nzeyak ngezh doo xaa. Nu dubse Egipto nzho xaa Israel.
8 Zeera mzob stub rey Egipto, xaa nanet cho ngok Che, nu nzhé xaa lo re xaa yezh cheen xaa:
9 —Wii gu, lee xaa Israel, nzeyak zyenra xaa lo re be nu nzeyak ngezh xaa. 10 Nzhaal le be tub kwaan zee nagakt zyenra xaa. Nzho mod, gorna zelo tub dil zee zhaal xaa kwaan re xaa nayii ne be nu dil xaa kwaan be, nu roo xaa nee.
11 Zee mzo xaa xaa nabeyy lo xaa nke zhiin, zee nabeyy doo xaa lo re xaa Israel, zee ke xaa zhiin nyera. Sbaa mdexkwaa xaa chop yezh kwaan le Pitón nu Ramesés, pa kozhaw xaa ngok faraón re yalgon cheen xaa. 12 Nu gorna masra mchazi re xaa Egipto re xaa Israel, zee masra myar re xaa, kwaanzee re xaa Egipto mzelo mzheb ne re xaa Israel. 13 Zee lee re xaa Egipto mkano re xaa Israel zhiin bid doo. 14 Nu tira nanewent xaa xaa, nu mle xaa zee ke xaa zhiin kwaan nga doo. Nu mdexkwaa xaa bsoo kwaan ban, noka mke xaa zhiin wen. Nu lo rese zhiin ne, nales doo mded re xaa Israel.
15 Zee lee rey Egipto ngunii lo Sifra nu Fúa, me nzen xiin re me Hebreo. Nu nzhé xaa:
16 —Lee gorna gal xiin re me Hebreo, zee wii gu nen cho mad mad, cheleeya madnaaya, laa gu ban mad, per cheleeya madbyiya, bit gu mad. 17 Per lee Sifra nu Fúa nzheb ne Dios, kwaanzee nambint me xtizh rey nu mlaa me mban re madbyi. 18 Zee lee rey Egipto mxaal xaa ngwachezh rop me. Nu nzhé xaa lo rop me:
—¿Chozhiin mle gu kwaane? ¿Chozhiin mlaa gu mban re madbyi?
19 Per lee rop ngwnaa ne mkeb:
—Nel lee re ngwnaa Israel nak me naren nu nadaan zee nzho mod nzan me mad gorna zeraka zhin me nzen mad. Nanakt me kwenta re me Egipto.
20 Snee zee lee re xaa Israel nzexenra nu nzeyak zyen, nu zeyak ngezh re xaa. Nu mle wen Dios lo rop me nzen mad, 21 nel rop me nzheb ne Dios, zee mzaa Dios mad lo me.
22 Zee lee xaa ngok faraón ngunabeyy lo yezh:
—¡Bselaw gu rese mad gal nal leen yuu, re madbyi, mad Hebreo! Per cheleeya madnaaya laa gu ban mad.