Génesis
Yech yilotlaka kwaan mkee Ches
Kwaan nzaa kwent xomod mzelo re kwaan
Snee mzelo re kwaan mdexkwaa
1
Leezha mzelo re kwaan Dios mdexkwaa yiba nu yizhyo.
2 Lee yzhyo nankanot nik tub mod nak;
dubse nak nis naro nu nebse nakaw na.
Nu lee Mbi Naban nzo nzaa welt lo nis.
3 Nu lee Dios nzhé:
“Yo xni”.
Nu ngu xni.
4 Zee mlaach Dios lee xni nak wen.
Zee mloxcho Dios xni lo yalnakaw.
5 Zee mloole Dios xni “zhe” nu lee yalnakaw mloole Dios “yaal”.
Kwaane ngok mzhel yizhyo nu nguni yizhyo mbizh yilotlaka.
6 Nu noka nzhé Dios:
“Yo naz ya kwaan roxa lo nis”.
7 Nu sbaa ngoka.
Nu sbaaka mdexkwaa Dios yiba kwaan mloxcho lo nis,
tub paroya mlake xan yiba,
lee stub paroya mlake naz yiba.
8 Nu mloole Dios naz ya “yiba”.
Kwaane ngok mzhel yizhyo nu nguni yizhyo mbizh rop.
9 Noka nzhé Dios:
“Lee nis kwaan nzhi xan yiba zhaal tubka pa,
zee lake yo bizh”.
Nu sbaa ngoka.
10 Lee pa nabizh mloole Dios “yizhyo” nu lee re nis mloole Dios “nistoo”.
Nu mwii Dios wena.
11 Nu zeera nzhé Dios lo yizhyo:
“Xen rese kwaan naye na,
rese lo yix wen kwaan nkano bizh nu rese lo yag kwaan nzaa xle kwaan nzho bizh leen”.
Nu sbaa ngoka.
12 Sbaa mxen rese lo yix wen kwaan nkano bizh nu rese lo yag kwaan nzaa xle kwaan nzho bizh leen.
Nu mwii Dios wena.
13 Kwaane ngok mzhel yizhyo nu nguni yizhyo mbizh yon.
14 Zee nzhé Dios:
“Yo xni yiba,
kwaan zaa xni lo yizhyo nu rexcho zhe nu yaal.
Nu leeya le xchinn zee luu cho mbizh nu cho liin.
Noka luu re mbizh kwaan non.
15 Nu sbaa ngu xni yiba kwaan nzaa xni lo yizhyo.”
Nu sbaa ngoka.
16 Dios mdexkwaa chop xni:
lee xni naro zaa xni zhe nu lee kwaan win zaa xni yaal;
zee noka mdexkwaa xaa re mbal yiba.
17 Dios mzob re xni naz yiba,
zee zaaya xni lo yizhyo,
18 zee gakbeyy zhe nu yaal;
zee mloxcho Dios xni lo yalnakaw.
Nu mwii Dios wena.
19 Kwaane ngok mzhel yizhyo nu nguni yizhyo mbizh dap.
20 Zee nzhé Dios:
“Xen rese lo ma leen nis;
nu noka yo re mbyin naro nu re mbyin chuut nu re ma nzebi naz yiba lo yizhyo”.
21 Nu mdexkwaa Dios re ma naro doo nu nakap nak,
ma yo leen nistoo nu rese lo ma xen leen nis;
nu zee ban ma leena.
Nu noka mdexkwaa Dios rese ma nzebi.
Nu mwii Dios wena.
22 Nu Dios ngunii wen lo ma nu nzhé xaa:
“Zyen doo gak xinn gu nu yizhe leen nistoo;
nu noka gak zyen doo re ma nzebi lo yizhyo”.
23 Kwaane ngok mzhel yizhyo nu nguni yizhyo mbizh gaay.
24 Zee Dios nzhé:
“Xen rese lo ma lo yizhyo,
re ma nakap nu re ma wen nu re ma nzelaz lo yo”.
Nu sbaa ngoka.
25 Dios mdexkwaa rese lo ma ne.
Nu mwii Dios wena.
26 Nu zee nzhé Dios:
“Kaxkwaa be myet kwenta be,
zee gak xaa kwenta be.
Nu nabeyy xaa lo rese lo mbal,
ma nzho leen nistoo;
nu rese lo mbyin naro nu rese lo mbyin chuut,
ma nzebi yiba nu rese lo ma nzho dubse lo yizhyo.”
27 Nu mdexkwaa Dios myet kwenta lee xaa;
nu kwenta lee xaa mdexkwaa xaa xaa,
xaabyi nu ngwnaa mdexkwaa Dios.
28 Ngunii wen Dios nu nzhé xaa:
“Bxen gu nu gok zyen doo gu,
tezhe gu lo yizhyo.
Nu noka nabeyy gu lo re mbal,
ma nzho leen nistoo nu lo re mbyin naro nu re mbyin chuut,
ma nzebi yiba;
nu rese lo ma nze lo yizhyo.”
29 Nu nzhé Dios:
“Lee nal za na rese lo yix kwaan nzaa bizh nu rese lo yag kwaan nzaa xle kwaan nzho mbizh leen gaw gu.
30 Nu rese lo re ma nakap nu re ma wen nu re ma nzelaz lo yo nu re ma nzebi,
za na yix nu yag gaw ma.”
Nu sbaa ngoka.
31 Nu mwii Dios lo rese kwaan mdexkwaa Dios leeya nak kwaan wen doo.
Kwaane ngok mzhel yizhyo nu nguni yizhyo mbizh xoop.