2
Ngulo mdexkwaa Dios yiba nu yizhyo nu rese kwaan nzho loya.
2 Lee mbizh gazh ngulo mle Dios zhiin lo re kwaan mle xaa nu mlaz xaa.
3 Dios ngunii wen nu mle nambey xaa mbizh gazh nu mbizh ba mlaz Dios lo re kwaan mdexkwaa xaa.
Dios, Xaa Tubka Nak, mzo myet leen yilo Edén
4 Snee nak kwent cheen xomod mzelo mdexkwaa Dios,
Xaa Tubka Nak,
yiba nu yizhyo.
5 Gorna zer yo yixwen nu nixa zer len wen,
nel zer xaal Dios,
Xaa Tubka Nak,
yey lo yizhyo nu nixa nik tub myet nyent ke zhiin;
6 nu nguxoob tub bech lo yizhyo kwaan nzoog dubse lo yizhyo.
7 Zee mdexkwaa Dios,
Xaa Tubka Nak,
Dana kwaan yide cheen yo.
Nu mzebi Dios,
Xaa Tubka Nak,
xii xaa,
zee mban xaa.
Nu snee ngok myet tub xaa mban.
8 Nu zee mdexkwaa Dios,
Xaa Tubka Nak,
tub yilo naz paro nlen mbizh nu baa mzo Dios myet,
xaa mdexkwaa xaa.
9 Nu Dios,
Xaa Tubka Nak,
mxeen rese lo yag leen yilo kwaan chul doo nu lee re xle cheena nix gaw xaa.
Nu noka mzo xaa yag kwaan nzaa yalnaban rol xsaw yilo nu noka yag kwaan nzaa yalnzhak,
zee labeyy myet kwaan wen nu kwaan nawent.
10 Nu leen yilo Edén nroo tub yuu kwaan nzoog yilo.
Nu baa nrexcho tap yaaya.
11 Lee tub yuu le Pisón,
kwaane nya dubse yizhyo Havila paro nzho or.
12 Nu lee or kwaan nzho yizhyo ba wen doo.
Nu noka baa nzho yag kwaan nzaa duur kwaan chul doo nzebech nu nzho ke naye kwaan non doo.
13 Nu lee yuu rop le Gihón nu kwaane nya dubse yizhyo Cus.
14 Nu lee yuu yon le Tigris,
kwaane nya naz pa nlen mbizh,
lo yizhyo Asiria.
Nu lee yuu dap le Éufrates.
15 Nu Dios,
Xaa Tubka Nak,
mzo myet leen yilo Edén,
zee nachii xaaya nu kanap xaaya.
16 Nu ngunabeyy Dios lo xaabyi nu nzhé xaa:
“Lo rete yag leen yilo nzho mod gaw lu.
17 Lee yag kwaan nzaa yalnzhak,
zee labeyy myet cho kwaan wen nu cho kwaan nawent,
lo yag zee nagawt lu,
nel mbizh kwaan gaw luya,
wlipa yet lu.”
18 Nu nzhé Dios,
Xaa Tubka Nak:
“Nawent nzo techose xaabyi,
zee kaxkwaa na tub me zo kwaan lee xaa nu le me zhiin kwaan lee xaa”.
19 Nu Dios mdexkwaa re ma nzho lo yizhyo nu re ma nzebi naz yiba nu mzhino Dios ma lo Dan,
zee wii xaa ne cho roole re ma.
Nu Dan mloole re ma.
20 Nu mloole Dan re ma nakap nu ma nzebi yiba nu rese ma wen,
per lee Dan nyent cho zo kwaan lee xaa.
21 Zee mlo Dios,
Xaa Tubka Nak,
tub mkaal ndok lo Dan;
nu gorna naxna xaa,
mloo Dios tub lee zhit laz xaa nu msaaw Diosa stuba.
22 Nu lee zhit kwaan mloo Dios cho xaabyi mdexkwaa Dios tub ngwnaa.
Nu mzhino Dios ngwnaa lo Dan.
23 Zee nzhé Dan:
¡Lee kwaane si,
leeka zhit cheen na nak
nu leeka baal cheen na nak!
Lee me nak ngwnaa,
nel lo xaabyi mroo me.
24 Kwaanzee lee xaabyi lo xuz xaa nu lo xnaa xaa nu chelya rop sa xaa,
zee tubka kwerp gak rop xaa.
25 Nu ropse xaa nzo cheey Dan nu sa xaa nu nik tub xaa nantont nzo sbaa.