Dan nu Eb nambint xtizh Dios
3
Lee mball ngok ma nzho doo yek lo rese ma wen,
ma mdexkwaa Dios,
Xaa Tubka Nak.
Nu nzhé ma lo ngwnaa:
—¿Che wlipa né Dios lo gu nagawt gu re xle kwaan zeb lo rese yag,
kwaan nzo leen yilo?
2 Nu lee ngwnaa mkeb lo mball:
—Xle cheen re yag kwaan nzeb leen yilo nzho mod gaw nu.
3 Per lee xle cheen yag kwaan nzo xsaw leen yilo né Dios:
“Nagawt guya nixa nagalt guya,
zee nayeta gu”.
4 Per lee mball nzhé lo ngwnaa:
—Nayeta gu.
5 Nel nela Dios,
lee mbizh kwaan gaw gu xle cheena,
zee gak gu mod Dios nu ne gu xana kwaan wen nu xana kwaan nawent.
6 Nu mlaach ngwnaa lo xle cheen yag nix gaw meya.
Nu nel nzhekla me kano me yalnzhak,
zee mzen me xle cheena nu ndaw meya.
Nu mzaa meya lo sa me nu noka xaabyi ndawa.
7 Zeera ngune rop xaa me kwaan wen nu kwaan nawent nu zeera ngune rop xaa me cheey xaa.
Zee mtib rop sa xaa lag yag ig kwaan naro lag,
zee mkee rop sa xaaya cho xaa,
nu sbaa msaaw rop xaa cho xaa.
8 Nu mbin xaa lee Dios,
Xaa Tubka Nak,
nzhaze leen yilo,
gorna nzezhel yizhyo,
zee mkaxlaan xaa lo Dios,
xan yag leen yilo.
9 Per lee Dios,
Xaa Tubka Nak,
mrezh Dan nu nzhé xaa:
—¿Ma lu?
10 Nu lee xaa mkeb:
—Mbin na nzhaze lu leen yilo,
zee mzheb na,
nel cheey na nzo na,
zee mkaxlaan na lo lu.
11 Zee nzhé Dios:
—¿Cho né lo lu,
lee lu cheey?
¿Che ndaw lu xle cheen yag kwaan ngunabeyy na lo lu nagawt lu?
12 Nu lee xaa mkeb:
—Lee ngwnaa,
me mzaa lu lo na zee nzo kwaan na,
mzaa xle cheen yag nu ndaw naya.
13 Lee Dios ngunabdizh lo ngwnaa:
—¿Cho kwaan kale lu nee?
Nu nzhé ngwnaa:
—Lee mball mkade na,
zee ndaw na xle.
14 Zee lee Dios nzhé lo mball:
—Nel mle lu kwaane,
zee xobde na lo lu,
“Nawent yo lu lo rese ma nakap nu lo rese ma wen.
Lee nal kwaan laz lu ze lu lo yo,
zee keb lu yide dubse mbizh ban lu.
15 Nal le na zee yo rop gu ngwnaa dil,
nu noka dii cheen lu nu cheen ngwnaa.
Lee dii cheen ngwnaa taazh yek lu,
lee lu gawye xan chek nii xaa.”
16 Lee lo ngwnaa nzhé xaa:
—Gak ne doo lextoo lu
nu kwaan yalne doo zan lu mad.
Nixa sbaaya nu nzoblazh lu sa lu
nu lee xaa nabeyy lo lu.
17 Nu lee lo xaabyi nzhé Dios:
—Nel mbin lu xtizh xngwnaa lu nu ndaw lu xle lo yag kwaan ngunii na nagawt lu,
xobde na lo yizhyo,
nel nawent mle lu
nu kwaan zhiin doo le lu gan kwaan gaw lu,
dubse mbizh ban lu.
18 Nu yich xen lo yalgon cheen lu
nu yix wen gaw lu.
19 Nu kwaan nis neey le lu gan kwaan gaw lu,
axta gorna lee lu yet,
nel kwaan yo mdexkwaa na lu nu yide nak lu
nu lee lu bare gak yide.
20 Nu lee Dan mloole xngwnaa xaa Eb,a
nel lee me ngok xnaa re me mban.
21 Nu lee Dios,
Xaa Tubka Nak,
mdexkwaa xaa xab xaabyi nu xngwnaa xaa kwaan yed,
zee ngok xaaya.
22 Nu lee Dios nzhé:
—Lee xaabyi nak kwenta tub be,
xaa ne kwaan wen nu kwaan nawent.
Lee napa kazen xaa xle cheen yag kwaan nzaa yalnaban nu gaw xaaya,
zee ban xaa tira.
23 Zee lee Dios,
Xaa Tubka Nak,
mloo xaa leen yilo Edén,
zee gaan xaa yizhyo kwaan nak xaa.
24 Nu mloo xaa xaa naz tich yilo nu mzo xaa lak xmandad xaa kwaan le kerubin naz pa nlen mbizh leen yilo Edén,
zee kanap mandad yilo.
Nu noka mzo xaa tub spad,
kwaan nzaa bal yek nu kwaan nyek rese ta,
zee kanapa xnaz yag kwaan nzaa yalnaban.