50
Zee lee Che mdeezh xuz nu mbinn nu mzaa tub bit lo xuz xaa.
2 Zee ngunabeyy xaa re xdoctor xaa,
zee sekwiizh xaa xkwerp xuz xaa Kob.
Nu lee re doktor,
sbaa mleya.
3 Nu choo mbizh msekwiizh xaa xkwerp xaa.
Lee re xaa Egipto mbinn dubse chon gal nzho chii mbizh.
4 Gorna ngulo mded re mbizh kwaan mbinn xaa.
Lee Che ngunii lo re xaa nke zhiin lo xaa ngok faraón nu nzhé xaa:
—Naab na lo gu zee yé gu lo xaa nak faraón:
5 “Lee gorna mbanaka xuz na,
mcheroo na lo xaa kaach na xaa naz yizhyo Canaán.
Kwaanzee naab na,
zee laa lu ya kaach na xuz na naz ba.
Nu gorna yilo kaach na xaa,
zee bare na stuba.”
6 Nu lee xaa ngok faraón mkeb:
—Gwa sebyo xuz lu,
modxa né xaaya lo lu.
7 Zee lee Che ngwa kaach xuz nu mreke re xaa mke zhiin lo xaa ngok faraón tich xaa,
re xaa ne nak xaa nkano yalnabeyy Egipto.
8 Nu ngwa re wech xaa nu re sawlizh xaa kwaan lee xaa.
Nebse re mad win nu re ma mlake yizhyo Gosén.
9 Noka ngwa re xaa nzhano karet nu re xaa nzob tich kabay kwaan Che.
Nu rese xaa ne nak zyen doo.
10 Gorna mzhin re xaa Atad,
kwaan nzhi naz pa nlen mbizh roo Yuu Jordán,
zee lee Che ngu bel tub gazh mbizh lo xuz.
Nu rese xaa mbinn doo.
11 Gorna lee re xaa Canaán,
xaa ngu yizhyo ba,
ngune lee re xaa Egipto nzho bel,
zee nzhé xaa:
—Nzhonn doo re xaa Egipto.
Kwaanzee lee yizhyo Atad mloole xaa:
“Yizhyo pa mbinn re xaa Egipto”.
12 Lee re xinn Kob mle re kwaan nzhé xuz xaa lo xaa,
13 nel mbe xaa xaa naz Canaán nu mkaach xaa xaa naz leen yiloo kwaan nzob yizhyo Macpela,
kwaan mzi Abraham lo Efrón,
xgann Het,
zee gaach re sawlizh xaa.
Yizhyo ne nu yiloo ne nzob naz pa nlen mbizh yizhyo Mamre.
14 Ngulo mkaach xaa xuz xaa,
zee lee Che mbare naz Egipto kwaan re wech xaa nu kwaan re xaa mreke tich xaa.
Mbizh gwluzhtlaka cheen Che
15 Kob ngulola ngut,
lee re wech Che mle xgab seetaka nayii Che nu nzhé xaa:
“Napa kazere xaa kwaan nawent kwaan mle be lo xaa”.
16 Zee mxaal re xaa diizh lo Che:
—Leezha zeeraka yet xuz be mlaa xaa diizh:
17 “Nzhaal yenlazh lu re kwaan nawent kwaan mle re wech lu lu”.
Lee nal,
naab nu lo lu yenlazh lu re kwaan nawent kwaan mle nu lo lu.
Zeeraka nii xaa lee Che nzhonnla.
18 Zee mzhin re wech Che nu mkichxub xaa lo xaa nu tira ngol lachuzh xaa lo yo.
Nu nzhé xaa:
—Nee nzo nu;
nu nak nu xaa nke zhiin lo lu.
19 Nu lee Che mkeb:
—Nazhebt gu.
Nanakt na Dios.
20 Gu nle xgab mle kwaan nawent lo na;
per lee Dios mle kwaan wen nu zee mban zyen doo myet.
21 Nazhebt gu,
na za kwaan gaw gu nu re xinn gu.
Nu mle wen xaa nu ngunii chul doo xaa lo xaa.
22 Che nu re wech xaa mlake ngu Egipto.
Che mban tub gayoo chii liin.
23 Nu mle xaa gan ngune xaa lo xos Efraín.
Nu noka mle xaa gan ngune xaa lo xinn Maquir,
xaa nak xgann Manasés.
Nu mle xaa gan mdeezh xaa xos nzha xaa.
24 Tub mbizh Che nzhé lo re wech xaa:
—Merla yet na.
Nu Dios koo re xtii be lo yizhyo ne,
zee wee xaa xaa yizhyo kwaan mcheroo Dios zaa xaa lo Abraham,
Chak nu Kob.
25 Zee mcheroo Che lo re wech xaa nu nzhé xaa:
—Wli Dios yiid lo gu nu koo xaa gu nee,
gorna gak kwaane wee gu xchit na.
26 Che nzho tub gayoo chii liin gorna ngut xaa yizhyo Egipto nu msekwiizh xaa xaa nu mlo xaa xaa leen yin.