Wdizh gwluzhtlaka kwaan ngunii Kob
49
Kob mrezh re xgann xaa nu nzhé xaa:
—Bii gu gax lo na,
zee ni na nen cho kwaan gak lo gu gwluzh.
2 Bii gax gu zee gon guya,
xgaan.
Kenzha gu kwaan nii na lo gu,
nel na nak Israel,
xuz gu.
3 ’Ben,
lu nak xgaan na xaa yilo.
Lu mlu mkano na jwers,
nel lu nak mod xle kwaan mza na yilotlaka
nu lu mkano yalnabeyy cheen xaa yilo.
4 Nu lee nal,
nagaktra lu xaa yilo.
Nak lu mod nistoo kwaan nagarlot saaw xaa lo,
nel mle lu kwaan nawent ngoot lu lo xloon na,
leezha ngootno lu tub xngwnaa na.a
5 ’Simeón nu Leví nak wech;
nu kwaan spad cheen gu mbit gu re xaa sbaasa.b
6 Nanzheklat na zo na pa nzo gu,
nixa nanzheklat na yoo na pa yo gu.
Nel lee gorna nayii gu mbit gu re myet;
nu mle reenk gu ngoon,
nebse nel nzhekla gu mle guya.
7 ¡Xobde na lo yalnayii cheen gu!
¡Xobde na lo yalnakap cheen gu!
Zee chech na gu dubse pa yo xtii na,
nu reech gu lo dubse yizhyo Israel.
8 ’Judá,
lu nabeyy lo re xaa nayii ne lu
nu lee re wech lu gool lo lu
nu kich yek xaa lo lu.
9 Judá,
xgaan na,
lu nak mod tub mbezh yeen.
Lu nak mod tub mbezh nakap
nu gorna ngulo ndaw lu ma nu nya lu ngoot lu
nu,
¿cho gap balor koxche lu?
10 Nyent cho nzho mod kiib yalnabeyy lo lu,
Judá,
nixa baston kwaan nzho yaa lu,
axta gorna yiid xpixwann baston,
xaa nabeyy dubse yizhyo.
11 Nu kado lu xpur yenn lu cho yag ub
nu xinn xngwes lu cho yag ub kwaan chul doo.
Nu zet lu xab lu kwaan nebse xis ub
nu ler cheen lu kwaan xis ub kwaan na kwenta ren.
12 Naxne nagaas le xis ub garlo lu
nu lee keleyy lu na rusra ke nizh.
13 ’Zabulón,
lu yo roo nistoo paro nroo bark
nu lee xkizhyo lu zhin axta yezh Sidón.
14 ’Isacar,
ngezh doo lu mod tub bur,
ma nax xsaw chop korrel.
15 Gorna ngune lu wen yizhyo pa kwaz lu,
zee yo lu yizhyo kwaan wen doo
nu gak lu mod tub xaa nke xchinn lo stub xaa
nu kwaan dub lextoo lu ke lu zhiin.
16 ’Dan,
lu nabeyy mer lo re sawlazh lu,
mod rese dii cheen na,
xaa nak xgaan na.
17 Gak lu lal kwenta tub mball,
lal kwenta tub mball wiz
ma naxto leen naz.
Nu gawye lu xancheek nii gway,
zee renzeb xaa nzob tich ma.
18 ’¡Ay,
Xaa Nabeyy,
nebse kwaz na koo lu na lo re xaa nayii ne na!
19 ’Gad,
re xaa nayii ne lu saaw xaa lu,
per lee gwluzh zee renal lu xaa,
gorna nanlet xaa xgaba.
20 ’Aser,
lee lu kano zyen doo kwaan gaw
nu zaa luya gaw rey.
21 ’Neftalí,
lu gak kwenta tub mzhin ma nzo nlaa
nu chul doo gak re xinn lu.
22 ’Che,
lu nak kwenta tub yag kwaan nzo roo nis,
kwaan nzaa zyen doo xle.
Nu luch cheena nzen cho bla.
23 Lee re xaa nakap mkee wez yenn lu
nu tubka nayii xaa ne xaa lu.
24 Per lee yaa lu tubka nye nzho wez.
¡Dixkix Xtios na,
Xaa Nkano Dubse Yalnabeyy!
¡Dixkix za na lo Dios,
xaa nkano nu nkanap Israel!
25 ¡Lee Xtios na,
zle yud lu!
¡Lee Dios,
Xaa Nkano Dubse Yalnabeyy,
nii wen lo lu!
Le xaa zee la yey nu xni mbizh lo xkizhyo lu
nu le xaa zee roo nis nech leen yizhyo yog re xkag lu,
modxa chul nke tub mad laz xnaa mad.
26 Na nii wenra lo lu modxa ngunii xuz na nu xey na lo na.
Grora kwaane ke re yi ndok kwaan naluxt.
Lu nak xaa nzhaal kayaa re kwaane lo re wech lu.
27 ’Benjamín,
lu nak mod tub mbew ma nayii doo
nu garziil nzhaw ma,
ma ngab ma,
lee mzhel yizhyo nle rol ma kwaan nlake.
Kob ngut nu mgaach
28 Rese xaa ne ngok chiibchop dii cheen Israel nu kwaane ngunii xuz xaa lo re xgann xaa kwaan nzhaal kayaa xaa,
gorna ngunii wen xaa lo xaa.
29 Zeera lee Kob mlaa lak wdizh lo re xgann xaa nu nzhé xaa:
—Merla yet na.
Kaach gu na paro ngubyo re xey na,
leen yiloo kwaan nzob yizhyo Efrón,
xaa Het.
30 Lee yiloo Macpela nzob naz yizhyo Canaán,
naz pa nlen mbizh,
xkizhyo Mamre.
Leeya mzi Abraham lo Efrón,
zee gaach re sawlizh xaa.
31 Baa mgaach Abraham nu sa xaa Sara,
Chak nu sa xaa Bek nu noka mkaach na Lea baa.
32 Lee yizhyo nu yiloo mzuuya lo re xaa Het.
33 Ngulo mlaa xaa diizh lo re xinn xaa,
zee tas ngoot xaa nu ngut xaa.