Ngol Ches
2
Tub xaabyi cheen dii Leví, mka tub ngwnaa, me nak leeka dii cheen Leví. 2 Nu mbeyxinn me zee mkano me tub xgaan me, nu mwii me chul doo nzhak mad, zee mkaxlaan me mad chon mbee. 3 Nu nagarlotra kaxlaan me mad masra mbizh, zee mzen me tub chekwid kwaan nak yix gozh. Nu msaaw meya kwaan chapapote nu duur, zee nazeebt nis leena. Nu zeera mlo me madoo leen chekwid, nu ngulo me chekwid kwaan nzho madoo leen, lo re yix gozh roo Yuu Nilo. 4 Nu lee tub bzan madoo, nzo zit xeep, ngwii me cho kwaan gak lo madoo.5 Nu gwluzh xeep lee xchaap xaa ngok faraón mkato roo yuu nzhataz. Nu lee re me nke zhiin lo me nzha zaa welt roo yuu, zee ta mwii xchaap xaa ngok faraón lee tub chekwid nzhibse lo nis leen yix gozh. Zee ngunabeyy me tub me nke zhiin lo me yaxii chekwid. 6 Nu gorna mxal me roo chekwid, zee mwii me lee tub madoo nzhose leen chekwid. Zee lee madoo mzelo mbazhe, nu lee xchaap xaa ngok faraón mlesla ne madoo. Nu nzhé me:
—Madoo ne nak madoo hebreo.
7 Zee lee bzan madoo mbii gax lo xchaap xaa ngok faraón nu nzhé:
—¿Cho kwaan nzak lu? ¿Chol yé na lo tub me lazh nu, me hebreo, me nzho xizh, zee zaa me nizh go madoo?
8 —Gwa lo me —nzhé xchaap xaa ngok faraón.
—Be mad, nu xeen mad. Na kix ka lu kano lu mad.
Nu lee xnaa madoo mbe madoo xeen. 10 Nu gorna ngulo mxen mad, zee ngwa laa me mad lo xchaap xaa ngok faraón. Zee lee xchaap xaa ngok faraón mle mad mod xinn me. Nu mlole me mad Ches, kwaan nii "Na mloo mad leen nis".
Ches mroo Egipto
11 Gorna ngoxla Ches, mroo xaa ngwasewii xaa lo re sawlazh xaa, nu ngune xaa bid doo nke re xaa zhiin. Zee mlu tub xaa Egipto lo xaa, kazaaya yenn tub sawlazh xaa. 12 Nu mwii xaa re ta, nu nyent cho mlu lo xaa, zee mbit xaa xaa Egipto nu msebyo xaa xaa leen yux. 13 Lee stub mbizh mroo Ches, nu ne xaa lee chop xaa Israel kadil, zee nzhé xaa lo xaa kakeeya:
—¿Chozhiin kakee luya yek leeka sawlazh be?
14 Nu lee xaa mkeb:
—¿Cho né lo lu nabeyy lu lo nu? ¿Che nel nzhekla lu gut lu na kwentaxa mbit lu xaa Egipto?
Zee mzheb doo Ches nu nzhé xaa:
—Ech, nela re xaa lee na mbit xaa Egipto.
15 Lee gorna mbin xaa ngok faraón kwaane, zee mzelo xaa nrenal xaa Ches, zee gut xaa xaa.
Per lee Ches mya ngu naz Madián. Nu mzob xaa gax roo bzo. 16 Ngu tub xaa le Reuela, xaa nak ngwleyy naz yizhyo Madián. Lee xaa nkano gazh xchaap. Nu re me ngwa roo bzo, zee koo me nis go re chib nu re xpakxiil xuz me. 17 Nu noka mzhin zlak xaa nkano xma, nu mtexonn xaa re xchaap Reuel. Per lee Ches mle yud me, nu mzaa nis ngu re xma me. 18 Nu gorna mzhin re me garli me, zee lee xuz me ngunabdizh:
—¿Chozhiin tant liger mbare re gu nal?
19 Zee lee re me mkeb nzhé:
—Tub xaa Egipto mla nu lo re stub naz xaa nkano xma, nu mloo xaa nis ngu nu, nu mzaa xaaya ngu rese ma.
20 Zee lee Jetro nzhé:
—¿Paro nzo xaabyi zee? ¿Chozhiin mlaa gu nzo techo xaa? Karre, gwa chezh gu xaa, zee yaad xaa gaw xaa kwaan be.
21 Zee lee Ches mzeyal ngu garli Jetro nu zee mzaa Jetro Séfora mka Ches. 22 Nu lee me mkano tub xgaan Ches nu Ches mlole mad Gersón nel nzhé xaa:
—Na nak xaa zit lo yizhyo ben.