Dios mrezh Ches
3
Ches mkano xpakxiil Jetroa, xaa noka le Reuel, xaa nak xazhaap xaa, xaa nak ngwleyy naz Madián. Nu tub mbizh ngwa xaa naz wen, nu mzhin xaa naz yi Horeb, kwaan nak yi cheen Dios. 2 Nu baa, lee mandad cheen Xaa Tubka Nakb mlu lo xaa leen bal xsaw tub yag win. Nu lee Ches ngwii nu mzeen xaa, lee yag nze bal per nanzhekta. 3 Kwaanzee nzhé Ches:—¿Cho kwaan kwaane? Yasewii na nen cho kwaana, nu chozhiin nanzhekt yag.
4 Lee gorna ne Xaa Tubka Nak lee Ches nzesewii gax, zee nzhé xaa:
—¡Ches! ¡Ches!
Nu lee Ches mkeb:
—Lee na neeka.
5 Zee lee Xaa Tubka Nak nzhé lo xaa:
—Nabiitra lu gax; blache xkelyed lu, nel paro nzo lu nzhul doo nak. 6 —Nu noka nzhé xaa: —Na nak Xtios xey lu, Xtios Abraham, Xtios Chak nu Xtios Kob.
Kwaanzee lee Ches mzheb nu nyent mod mwii xaa lo Dios. Nu msaaw xaa garlo xaa.
7 Nu lee Xaa Tubka Nak seetaka kanii:
—Ne wen lu lee re xaa na, xaa Israel kaded doo bid lo re xaa Egipto, nu mbin na kwaan naab xaa lo yalnales cheen xaa lo re xaa nabeyy doo lo xaa. 8 Kwaanzee nzhal na zee ko na xaa lo re xaa Egipto, nu we na xaa yizhyo wen nu kwaan gro paro nxonn nizh nu mzhin mod nis, pa nzho doo kwaan gaw xaa. Yizhyo ne nak xkizhyo: xaa Canaán, xaa Het, xaa Amorreo, xaa Ferezeo, xaa Heveo, nu xaa Jebús. 9 Mbin na rese yalnales cheen re xaa Israel, nu ne na nawent nle re xaa Egipto xaa. 10 Kwaanzee nal xaal na lu lo xaa nak faraón naz Egipto, zee yiloo lu re xaa na, xaa nak xaa Israel.
11 Zee lee Ches nzhé lo Dios:
—¿Cho nak na, zee ya na lo xaa nak faraón, nu yilo na re xaa lazh na, xaa Israel, lo re xaa Egipto?
12 Nu lee Dios mkeb:
—Na nzo kwaan lu gorna koo lu re xaa lu yizhyo Egipto, nu rese gu gool lo na lo yi ne. Nu kwaane gak nseyn kwaan le na, zee ne lu na mxaal lu.
13 Nu lee Ches mkeb lo Dios:
—Chelee na ya na yé na lo re xaa lazh na: "Dios cheen re xey be xaa yilo, mxaal na lo re gu"; nu chelee xaa nabdizh xaa lo na, "¿Cho le xaa?", zee ¿cho kwaan yé na?
14 Nu lee Dios mkeb nzhé:
—Na nak Xaa Tubka Nak. Nu yé lu lo re xaa, "Lee Xaa Tubka Nak mxaal na lo gu". 15 —Nu noka nzhé Dios lo Ches: —Yé lu lo re xaa Israel: "Lee Dios, Xaa Tubka Nak, cheen re xey be, Xtios Abraham, Xtios Chak, nu Xtios Kob, mxaal na lo re gu. Kwaane nak kwaan le na tira lo re xtii gu. 16 Gwa toop re xaa gol, xaa Israel, nu guzh lo xaa: "Lee Dios, xaa nak cheen xey be, Xaa Tubka Nak, Xtios Abraham, Xtios Chak, nu Xtios Kob, mlu lo na, nu né xaa: 'Ne na xomod kaded gu bid Egipto.'" 17 Nu noka né xaa: "Ko na gu lo re bid kwaan kaded gu Egipto, nu we na gu lo tub yizhyo pa nxonn nizh nu mzhin mod nis, pa nzho doo kwaan gaw xaa. Yizhyo ne nak xkizhyo: xaa Canaán, xaa Het, xaa Amorreo, xaa Ferezeo, xaa Heveo, nu xaa Jebús." 18 Lee re xaa gol kenzha xtizh lu nu ya xaa kwaan lu lo rey Egipto. Nu yé gu lo xaa: "Lee Dios, Xaa Tubka Nak, Xtios re xaa hebreo, mbiid lo nu. Kwaanzee naab nu lo lu zee laa lu ya nu wen, paro ze xaa naz chon mbizh kwaan nii xaa. Baa teed nu ma lo xaa nak Xtios nu. 19 Na ne nazaat rey Egipto diizh roo gu, per lee na le zee zeyal xaa kwaan gro yalnabeyy cheen na. 20 Le xchinn na yalngezh cheen na, nu seweey na dubse yizhyo Egipto nu dedyall xaa wii xa lo rese kwaan le na, zeesi laa xaa roo gu. 21 Noka le na zee re xaa Egipto zelazh zyen kwaan wee gu, zee naroot gu kwaan nebse yaa gu. 22 Rese ngwnaa Israel nzhaal naab lo re me Egipto, me nzho gax garli me o re me kwaan zhin lo me, zee zelazh me re kwaan nak plat, or nu ler kwaan gak re xiin me. Sbaa zee wee gu re kwaan nkano xaa Egipto.