4
Zee lee Ches mkeb nzhé:—Lee re xaa nalet krer kwaan yé na, nu nixa nagont xaa kwaan yé na. Nu né xaa: "Namlut Xaa Tubka Nak lo lu."
2 Nu lee Xaa Tubka Nak nzhé:
—¿Cho kwaan nak kwaan nzho yaa lu?
Nu lee Ches mkeb:
—Xkag na.
3 Nu lee Dios nzhé:
—Labiya lo yo.
Nu lee Ches mlabiya lo yo. Zee ta ngoka tub mball. Zee mbachi Ches lo ma. 4 Zee nzhé Xaa Tubka Nak lo Ches:
—Segaa yaa lu nu bzen xwann ma.
Nu lee Ches msegaa yaa nu mzen ma. Zee ta mbare ma ngok ma yag yaa Ches stuba.
5 —Ble kwaane zee le re xaa krer mlu na lo lu. Nak na Xaa Tubka Nak, xaa nak Xtios re xey gu Abraham, Chak nu Kob.
6 Zee nzhé Xaa Tubka Nak:
—Lee nal cheep yaa lu leen xab lu.
Nu lee Ches mcheep yaa leen xab. Lee gorna mloo xaa yaa xaa, mwii xaa myall yaa xaa lo yeezh, nu nebse beg naya. 7 Zee nzhé Dios:
—Cheep yaa lu leen xab lu stuba.
Nu lee Ches mbare mcheep yaa leen xab. Lee gorna mloo xaa yaa xaa leen xab xaa stuba, ngulola ngok wen yaa xaa mod naka yilo. 8 Zee nzhé Xaa Tubka Nak:
—Chelee xaa nalet xaa krer yag kwaan ngok mball, nixa nalet xaa kas, zee le xaa krer yaa lu kwaan myall lo yeezh. 9 Nu chelee xaa nagont xaaya, nixa nalet xaa kas kwaan nii lu, lo nik tub rop kwaan gro ne, bloo nis Yuu Nilo nu bxoya lo yo. Lee nis kwaan koo lu nu xo lu lo yo gak ren.
10 Zee nzhé Ches lo Xaa Tubka Nak:
—¡Ay, Xaa Nabeyy, nagarlot wdizh wen na! Gorna nzhedizh na nzhak net luzh na, axta chuut na snee nzhedizh na nu zer yilo wdizh wen na nixa nal kayadizh be.
11 Nu lee Xaa Tubka Nak mkeb:
¿Cho mzaa roo myet? ¡Na nle zee nyent mod gon xaa o nyent mod wdizh xaa! ¡Na nle zee ngwii xaa o nyent mod wii xaa! Che naleet na nleya? 12 ¡Lee nal gwa; na zo kwaan lu gorna wdizh lu! ¡Nu na nii kwaan nzhaal yé lu!
13 Nu lee Ches nzhé:
—¡Ay, Xaa Nabeyy! Naab na, xaal stub xaa ya.
14 Zee lee Xaa Tubka Nak nayii lo Ches, nu nzhé:
—Lee wech lu Aarón, xaa dii cheen Leví, wen nzhedizh xaa. Nal zhin xaa lo lu nu yakla xaa ne xaa lo lu. 15 Guzh lo xaa kwaan nzhaal yé xaa. Nu na nzo kwaan ropse gu gorna wdizh gu nu lu na re kwaan nzhaal nii gu. Nu lu na cho kwaan nzhaal le gu. 16 Nu lee xaa nii lo yezh xkwent lu, nu teed xaa xtizh lu, nu zo lu xlugar na lo xaa. 17 Be xkag lu, nu kwaan leeya le lu re kwaan gro, kwaan ni na lo lu.
Ches mbare naz Egipto
18 Ches mbare lo Jetro, xaa nak xazhaap xaa, nu nzhé xaa:
—Naab na lo lu, laa nya na Egipto, nel nzhekla na nya na lazh na, zee ne na che mbanka re wech na.
Nu lee Jetro nzhé lo Ches:
—Wen nya lu.
19 Noka nzhé Xaa Tubka Nak lo Ches gorna nzoka xaa yizhyo Madián:
—Zyaa nu bare naz Egipto, nel ngutla re xaa nzhekla ngut lu.
20 Zee lee Ches mtexoob rop xgann xaa nu sa tich tub ngwes, nu mbare xaa naz Egipto. Nu mzen xaa yag kwaan mle Dios zee ngoka mball. 21 Nu nzhé Xaa Tubka Nak lo Ches:
—Lee gorna bare lu Egipto, zee le lu lo xaa nak faraón re kwaan gro kwaan mza na lo lu. Lee na le ned lextoo xaa nak faraón, nu nalaat xaa roo re xaa yezh Israel. 22 Nu yé lu lo xaa nak faraón: "Lee Xaa Tubka Nak né: 'Israel nak xgaan na, xaa yilotlaka lo na. 23 Nguniila na lo lu laa lu roo xgaan na, zee gool xaa lo na. Per chelee lu nalaat lu nya xaa, zee gut na xgann lu, xaa yilo.'"
24 Nu gorna nzhaze Ches naz paro gaa xaa, lee Xaa Tubka Nak nzhekla ngut xaa. 25 Zee lee sa xaa Séfora mzen tub ke ndox kwaan nak kuchi nu mchoog me cho xgann me. Nu mkee meya cho nii Ches, nu nzhé me lo Ches:
—Kwaan xren xgaan na, zee nyent cho kwaan gak lu.
26 Gorna ngune Dios kwaan mle Séfora, zee mlaa xaa mban Ches. Nu nzhé me:
—Kwaan xren xgaan na, nal wlipa nak lu sa na, nel lu nreke tich beey cheen re xaa Israel.
27 Nu zee lee Xaa Tubka Nak nzhé lo Aarón:
—Gwa wen zee kayaa lu Ches.
Zee ngwa Aarón Yi cheen Dios. Nu gorna nguzhal xaa Ches wen, zee mkayaa xaa xaa kwaan tub biit. 28 Zee mzaa Ches kwent lo Aarón rese wdizh kwaan nzhé Xaa Tubka Nak lo xaa, nu re kwaan gro kwaan mxaal xaa xaa le xaa. 29 Nu ngwa Ches nu Aarón, nu mtoop xaa rese xaa gol, xaa Israel. 30 Zee nzhé Aarón lo re xaa, rese kwaan nzhé Xaa Tubka Nak lo Ches, nu lo re xaa mle xaa re kwaan gro. 31 Nu lee re xaa Israel mbin kwaan nzhé Ches, nu gorna mzeen xaa lee Xaa Tubka Nak mbin re bid kwaan kaded xaa, zee mkichxub re xaa nu mbill re xaa lo xaa.