Ches nu Aarón ngwa lo xaa ngok faraón
5
Ngulo mded kwaane, ngunii Ches nu Aarón zee ngwa xaa lo xaa ngok faraón, nu nzhé xaa:—Lee Xaa Tubka Nak, Xtios nu, re xaa Israel, né: "Laa nya yezh cheen na naz wen zee le xaa yalni lo na".
2 Nu lee xaa ngok faraón mkeb:
—¿Cho nak Xaa Tubka Nak, zee gon na xtizh xaa nu la na nya re gu, xaa Israel? Nixa nalabeyyt na Xaa Tubka Nak, nu nixa nalat na nya gu.
3 Ches nu Aarón nzhé:
—Per lee Dios, Xaa Tubka Nak, Xtios re xaa hebreo, mbiid lo nu. Kwaanzee naab nu lo lu zee laa lu ya nu wen, paro ze xaa naz chon mbizh kwaan nii xaa. Baa teed nu ma lo Dios nu zaa nu gon lo xaa, zee nateedt xaa nu bid kwaan yalyizh nu kwaan spad.
4 Zee lee rey Egipto nzhé:
—Ches nu Aarón, mas wen zyaa gu, nalet gu tras re xaa ne. Bare gu lo xchinn gu. 5 Wii, nzhikwaa doo xaa Israel Egipto, nu lee gu nanlaat nya xaa ke xaa zhiin.
6 Leeka mbizh zee, mxaal xaa ngok faraón re xaa nabeyy lo re xaa Israel, nu lo re xaa nzo lo xaa, nu nzhé xaa:
7 —Lee nee naz delant nazaat gu paj dexkwaa re xaa bsoo kwenta nal. Laa leeka lee xaa yaxiiya. 8 Nu ngunaab gu dexkwaa xaa tub lal zeeka bsoo, nu nixa nalaket loya. Nel lee re xaa Israel ne nak re xaa nchaab, kwaanzee nkee xaa bi, nu naab xaa nya xaa zee teed xaa ma lo Xtios xaa. 9 Masra kee gu xaa zhiin. Ble xchinn gu xaa, zee nakanot xaa tyemp gon xaa re yalkade kwaan nzhé Ches nu Aarón.
10 Nu gorna mroo re xaa nabeyy lo re xaa Israel nu re xaa nzo lo xaa, zee ngwa yé xaa lo re xaa Israel:
—Lee faraón né: "Nazatra na yix dexkwaa xaa bsoo". 11 Leeka gu nzhaal yikwaana nu yitoopa mod nzho moda lo gu. Nu nixa nalaket loya kwenta yilo.
12 Zee lee xaa yezh Israel mroo dubse Egipto nzha kwaan paj naz wen lexchinn xaa. 13 Rese mbizh lee xaa nabeyy lo xaa ndexkwaa bsoo, nabeyy zee dexkwaa xaa leeka lal bsoo kwaan ndexkwaa xaa leezha nzaa xaa paj. 14 Nu mas nla xaa nabeyya tich re xaa nzo lo re xaa Israel, mer xaa mleey xaa nu mbezh xaa:
—¿Xomod naaze nu nalzhe namlet gu gan mdexkwaa gu lak kwaan mdexkwaa gu yilo? 15 Nu lee re xaa nabeyy lo re xaa Israel, ngwa nguzoba lo xaa ngok faraón, nu nzhé xaa:
—¿Chozhiin snee nle lu lo nu, xaa nke zhiin lo lu? 16 Nanzaatra xaa paj lo nu, xaa nke zhiin lo lu, nu nabeyy xaa zee kaxkwaa nu tub lal bsoo kwaan mdexkwaa nu yilo. Leel nla xaaya tich xaa nu yezh cheen lu mleya.
17 Nu lee xaa ngok faraón mkeb:
—¡Nchaab gu, nchaab doo gu, kwaanzee nii gu yated gu ma lo Xaa Tubka Nak! 18 Gwa gu, bke gu zhiin. Nexa per nanzaat xaa paj lo gu, nebse zaa gu lal bsoo kwaan ngaxkwaa gu yilo.
19 Zee lee xaa nabeyy lo re xaa Israel, mle doo xgab nel nzhé xaa lo xaa nagarlot lake lo bsoo kwaan dexkwaa xaa yizata mbizh. 20 Gorna mroo xaa lo xaa ngok faraón, ngune xaa lo Ches nu lo Aarón nzo naz jwer nkambaz xaa. 21 Nu nzhé xaa lo xaa:
—Lee Xaa Tubka Nak ngwii nen cho kwaan kale gu. Nzhekla nu lee xaa naab kwent lo ropse gu. Nel gu mleya, zee lee xaa nak faraón nu re xaa nke zhiin lo xaa ngwii nawent lo re be, nu leeka gu mlo kuchi yaa xaa zee gut xaa nu.
Ches mbadizhno Dios
22 Zee mbadizhno Ches Xaa Tubka Nak: