6
Lee Xaa Tubka Nak nzhé lo Ches:—Lee nal laach lu nen cho kwaan le na lo xaa nak faraón, nu kwaan yalngezh cheen na le na zee koo xaa gu lo xkizhyo xaa.
Dios mbare mrezh Ches
2 Dios seetaka kawdizh kwaan Ches, nu nzhé xaa:
—Na nak Xaa Tubka Nak. 3 Nu mlu na lo Abraham, lo Chak, nu lo Kob, kwaan le na: "Dios, Xaa Nkano Dubse Yalnabeyy". Nu nanzhét na lo xaa mer le na lee na nak "Xaa Tubka Nak". 4 Noka myaan na kwaan lee xaa za na yizhyo Canaán, yizhyo kwaan ngu re xaa lak liin mod xaa nkanze. 5 Nu nal, mbin na xomod nzhonn re xaa Israel lo re bid kwaan kated xaa xaa, lo zhiin kwaan nke xaa lo re xaa Egipto. Kwaanzee mselazh na kwaan myaan na lo re xey xaa. 6 Kwaanzee nal, guzh lo re xaa Israel: "Na nak Xaa Tubka Nak. Ko na gu lo re zhiin bid cheen xaa Egipto, nu sela na gu kwaan yalngezh cheen na nu naab na kwent lo re xaa Egipto. 7 Nu we na re gu zee gak gu yezh cheen na, nu gak na Xtios gu. Nu sbaa ne gu, na nak Xaa Tubka Nak, Xtios gu, xaa mloo gu lo zhiin bid kwaan mle gu Egipto. 8 We na gu yizhyo kwaan mcheroo na za na lo Abraham, nu lo Chak nu lo Kob. Nu za naya gak xcheen gu. Na nak Xaa Tubka Nak."
9 Ches mbare nzhé kwaane lo re xaa Israel, per lee re xaa nambinta, nel tant nle doo xaa xgab xchinn xaa nu nales doo nzhak xaa. 10 Zee lee Xaa Tubka Nak nzhé lo Ches:
11 —Gwa nu guzh lo xaa nak faraón, zaa diizh roo re xaa Israel yizhyo Egipto.
12 Per lee Ches mkeb:
—Nixa nambint re xaa Israel xtizh na. ¿Xomod lee xaa nak faraón gon xtizh na? Snee net doo nzhedizh na.
13 Zee lee Dios mxaal Ches nu Aarón, zee yé xaa lo xaa ngok faraón zee koo xaa re xaa Israel yizhyo Egipto, nu noka yé xaa lo re xaa Israel zee nzhaal roo re xaa yizhyo Egipto.
Dii cheen Kob
14 Xaa ne nak re xaa non lo re dii cheen Kob.
Lee re xinn Ben, xaa yilotlaka lo Israel nak: Hanoc, Falú, Hezrón nu Carmi.
15 Lee re xinn Simeón nak: Jemuel, Jamín, Ohad, Jaquín, Zohar nu Saúl, xinn tub me Canaán.
16 Lee re xinn Leví nak: Gersón, Coat nu Merari. Nu mban Leví tub gayoo galbchiibgazh liin.
17 Lee re xinn Gersón nak: Libni nu Simei.
18 Lee re xiin Coat nak: Amram, Izhar, Hebrón nu Uziel. Nu mban xaa tub gayoo galbchiibchon liin.
19 Lee re xinn Merari nak: Mahli nu Musi.
20 Nu lee Amram mka Jocabed, me nak bzan xuz xaa. Nu mzan me Aarón nu Ches. Nu mban Amram tub gayoo galbchiibgazh liin.
21 Lee re xinn Izhar nak: Coré, Nefeg nu Zicri.
22 Lee re xinn Uziel nak: Misael, Elzafán nu Sitri.
23 Nu lee Aarón mka Elisabet, xchaap Aminadab, bzan Naasón. Nu mkano me: Nadab, Abiú, Eleazar nu Itamar.
24 Nu lee re xinn Coré nak: Asir, Elcana nu Abiasaf.
Re xaa ne nak xaa non lo re xtii Leví.
25 Eleazar xgann Aarón mka tub xchaap Futiel, me mzan Finees. Nu rese xaa ne nak dii cheen Leví.
26 Xaa ne nak Aarón nu Ches, xaa nzhé Xaa Tubka Nak lo: "Koo re dii Israel, yizhyo Egipto loka lak nak re xtii xaa. 27 Xaa ne nak xaa ngunii lo xaa ngok faraón, zee koo xaa re xaa Israel lo yizhyo Egipto.
Dios mrezh Ches nu Aarón
—Na nak Xaa Tubka Nak. Gwa nu guzh lo xaa nak faraón rese kwaan ni na lo gu. 30 Nu lee Ches mkeb lo Xaa Tubka Nak:
—Nagont xaa nak faraón xtizh na. ¡Net doo nii na!