7
Zee lee Xaa Tubka Nak nzhé lo Ches:—Wii, na le lu kwenta dios lo xaa nak faraón, nu lee wech lu Aarón teed xtizh lu. 2 Lu nii rese kwaan lo Aarón, re kwaan nii na zee lee xaa yéya lo xaa nak faraón, zee laa xaa roo re xaa Israel yizhyo Egipto. 3 Nu le na lee xaa nak faraón gak ned lextoo, nu le na kwaan gro doo lo re xaa Egipto. 4 Nu lee xaa nak faraón nagont xaa xtizh gu zee lu na yalnabeyy cheen na lo re xaa Egipto, nu snee ko na re xiin na, xaa Israel, yizhyo Egipto loka lak nak re xtii xaa, leezha naab na kwent lo xaa. 5 Nu gorna lu na yalnabeyy cheen na lo re xaa Egipto, nu ko na re xaa Israel naz ba, zee ne xaa Egipto, lee na nak Xaa Tubka Nak.
6 Zee mle Ches nu Aarón modxa nzhé Xaa Tubka Nak lo xaa. 7 Nu nzhap Ches tub tap gal liin nu Aarón nzho tap gal chona gorna ngunii xaa lo xaa ngok faraón.
Bar cheen Aarón
8 Zee lee Xaa Tubka Nak nzhé lo Ches nu lo Aarón:
9 —Chelee xaa nak faraón né: "Le gu tub kwaan gro", zee yé lu lo Aarón: "Bzen xkag lu nu labiya lo yo, zee gaka mball".
10 Zee ngwa Ches nu Aarón lo xaa ngok faraón nu mle xaa modxa nzhé Xaa Tubka Nak lo xaa. Nu lee Aarón mlebi xkag lo xaa ngok faraón, nu lo re xaa nke zhiin lo xaa, nu lee xkag xaa ngok mball. 11 Zee mrezh xaa ngok faraón re xaa nzhak nu re wezh nu leeka kwaan mle Aarón mle xaa kwaan yalnzhak cheen xaa. 12 Nu tubga xaa mlebi xkag lo yo nu ngoka mball, per lee mball cheen Aarón mdeb re mball cheen re wezh. 13 Nu lee xaa ngok faraón ngok ned doo lextoo, nu namkenzhat xaa modxa nzhé Xaa Tubka Nak.
Yalzi yilotlaka ngok ren
14 Gwluzh nzhé Xaa Nabeyy lo Ches:
—Lee xaa nak faraón ngok tub xaa ned nu nanzheklat xaa laa xaa roo re xaa Israel. 15 Per yee garziil doo yasewii lu gorna lee xaa la roo Yuu Nilo, zee kwaz lu roo yuu, nu wee lu xkag lu kwaan ngok mball. 16 Baa yé lu lo xaa: "Lee Xaa Tubka Nak, Xtios re xaa hebreo, mxaal na nii na: 'Laa nya re xaa lazh na wen zee gool xaa lo na'. Per axta nal zer gon lu xtizh na." 17 Snee né Xaa Tubka Nak: "Kwaan kwaane zee ne lu lee na nak Xaa Tubka Nak, gorna la na xkag na kwaan nzho yaa na leen nis roo yuu, zee lee nis gak ren. 18 Lee re mbal yet, nu lee yuu dexlaa. Lee re xaa Egipto zhiib xkap lextoo go nis ba."
19 Lee Xaa Tubka Nak nzhé lo Ches:
—Guzh lo Aarón: "Zen xkag lu nu seli yaa lu lo rese yuu nu rese pa nzho nis Egipto zee gaka ren. Nu rese nis kwaan nzho leen yas yo nu yas yag gak ren.
20 Nu lee Ches nu Aarón mle mod ngunabeyy Xaa Tubka Nak, nu mlep Aarón xkag xaa nu mdeske xaaya lo nis kwaan nzho Yuu Nilo, nu ne xaa ngok faraón nu ne re xaa nke zhiin lo xaa lee rese nis kwaan nzho yuu ngok ren. 21 Rese mbal ngut. Nu lee yuu ndexlaa doo, nu nyent mod go re xaa nis yuu. Dubse Egipto ngu ren. 22 Nu lee re wezh, xaa Egipto, mle leeka re kwaan mle Aarón kwaan yalnzhak cheen xaa. Nu lee lextoo xaa ngok faraón ngok ned, nu nambint xaaya mod nzhé Xaa Tubka Nak. 23 Nu lee xaa ngok faraón mbare paro nabeyy xaa nu namkenzhat xaa kwaan ba. 24 Nu rese xaa Egipto mdeen pos roo yuu nel nyent mod go xaa nis yuu. 25 Gazh mbizh gwluzh, lee Xaa Tubka Nak mle zee ngok nisa stub welt.