Yalzi rop ngok ran
8
Lee Xaa Tubka Nak nzhé lo Ches:—Gwa lo xaa nak faraón nu guzh lo xaa: "Snee né xaa: 'Laa nya re xaa lazh na, zee gol xaa lo na. 2 Chelee lu nalaat lu nya xaa, na xaal ran dubse xkizhyo lu. 3 Nu roo yuu roo zyen doo ran nu yixoob ma, zee zeeb ma garli lu nu lo xloon lu paro nzha lu, nu garli re xaa nke zhiin lo lu, nu re xaa lazh lu. Nu reep ma axta leen xkarde me, paro nkee me yat nzhob xtil. 4 Nu kee ma briink cho lu nu cho re xaa nke zhiin lo lu nu cho rese sawlazh lu.'
5 Lee Xaa Tubka Nak nzhé lo Ches:
—Guzh lo Aarón zee seli xaa yaa xaa kwaan xkag xaa roo yuu nu re pa nzho nis zee roo ran, zee yizhe ma dubse yizhyo Egipto.
6 Aarón mseli yaa lo nis nu dubse yizhyo Egipto nguzhe ran, ma mroo leen nis. 7 Nu lee wezh mle leeka kwaan mle Aarón kwaan yalnzhak cheen xaa, nu noka lee xaa mloo ran dubse yizhyo Egipto. 8 Zee lee xaa ngok faraón mrezh Ches nu Aarón nu nzhé xaa:
—Naab lo Xaa Tubka Nak, zee koo xaa ran lo na, nu lo re xaa lazh na; nu la na nya re xaa lu, zee teed xaa ma lo xaa.
9 Zee mkeb Ches lo xaa ngok faraón:
—Né cho gor nzhekla lu naab na lo Dios kwent cheen lu nu re xaa nke zhiin lo lu, nu re xaa lazh lu, zee bachi re ran lo lu nu leen li lu, zee lake ma nebse leen yuu.
10 Nu lee xaa ngok faraón nzhé:
—Leeka yee nzhekla na.
Nu lee Ches mkeb:
—Sbaa gaka. Zee ne lu nyentra cho nak mod Xtios nu, Xaa Tubka Nak. 11 Nu lee ran bachi garli lu, nu lake ma nebse leen yuu. Naletra ma tras lu, nixa re xaa nke zhin lo lu nu nixa re xaa lazh lu.
12 Ches nu Aarón mroo garli xaa ngok faraón, zeera ngunaab Ches lo Xaa Tubka Nak zee luux xaa re ran kwaan mxaal xaa lo xaa ngok faraón. 13 Lee Xaa Tubka Nak mle kwaan ngunaab Ches, nu ngut rese ran, ma ngu garli xaa ngok faraón, nu ma ngu dubse lach jwer nu ma ngu naz wen. 14 Nu mlek bdok xaa ran, nu mdexlaa doo ma dubse yizhyo. 15 Nu mwii xaa ngok faraón ngulola mded re kwaan ngok, zee lee xaa ngok faraón ngok ned lextoo nu nambint diizh modxa nzhé Xaa Tubka Nak.
Yalzi yon ngok ngruuzh
16 Lee Xaa Tubka Nak nzhé lo Ches:
—Guzh lo Aarón zee seli xaa xkag xaa zee gaske xaa xkag xaa lo yide cheen yo, zee gaka ngruuzh dubse yizhyo Egipto.
17 Nu sbaa mle xaa, nu lee Aarón mgaske xkag lo yide kwaan nzhi lo yo, zee ngoka ngruuzh; nu nkee re ngruuzha cho xaa nu cho re ma. Nu rese yide ngok ngruuzh dubse Egipto. 18 Nu lee re wezh mle zee ngak ngruuzh lo re kwaan mle xaa, per namgarlota lo xaa. Nu ngu ngruuzh lo re xaa nu lo re ma. 19 Zee lee re wezh nzhé lo xaa ngok faraón:
—Kwaane nak yalngezh cheen Dios.
Per lee xaa ngok faraón ngok ned lextoo nu nambint diizh modxa nzhé Xaa Tubka Nak.
Yalzi dap ngok ngeg
20 Nu lee Xaa Tubka Nak nzhé lo Ches:
—Garziil doo gwa lo xaa nak faraón gorna zhin xaa roo yuu, nu guzh lo xaa: "Xaa Tubka Nak né snee: 'Laa nya xaa lazh na zee gool xaa lo na. 21 Nu chelee lu nalaat lu re xaa lazh na, zee xaal na rese lo ngeg lo lu, lo re xaa nke zhiin lo lu nu lo re xaa Egipto. Nu yizhe ma dubse yizhyo Egipto nu axta yo ma leen li re xaa Egipto. 22 Nu gorna lee re kwaane gak koxa na yizhyo Gosén pa nzho xaa lazh na, paro nayazhalt nik tub ngeg, zee yilo ne lu lee na nak Xaa Tubka Nak lo yizhyo ne. 23 Nu xaa le na re xaa lazh na nu re xaa lu. Kwaan gro ne gak yee garziil. 24 Nu lee Xaa Tubka Nak sbaa mleya. Nu mzhin rese ngeg, mreep ma garli xaa ngok faraón nu garli re xaa nke zhiin lo xaa, nu dubse yizhyo Egipto. Nu lee ma mle zee mlux dubse yizhyo.
25 Nu lee xaa ngok faraón mrezh Ches nu Aarón, nu nzhé xaa:
—Zyaa gu zee teed gu ma lo Xtios gu, per naroot gu yizhyo Egipto.
26 Per lee Ches mkeb:
—Nawent le nu komba, nel re ma kwaan zaa nu lo Xaa Tubka Nak, nzak re xaa Egipto nyent mod teed xaa ma. Chelee re xaa Egipto ne, lee nu teed ma zee zaake xaa nu. 27 Nzhaal ya nu wen paro ze nu chon mbizh, zee teed nu ma lo Xaa Tubka Nak, mod né xaa lo nu.
28 Zee nzhé xaa ngok faraón lo xaa:
—Za na diizh ya gu yo wen, paro teed gu ma lo Xaa Tubka Nak, nebse nayat gu tant zit doo, nu naab gu xkwent na lo Xtios gu.
29 Nu lee Ches mkeb:
—Nal gorne roo na lo lu nee, zee naab na lo Xaa Tubka Nak, lee garziil zee bachi rese ngeg lo lu, nu lo re xaa nke zhiin lo lu, nu lo re yezh cheen lu. Nu tira nakadetra lu nu, laa lu nya re xaa lazh nu, nu teed nu ma lo Xaa Tubka Nak.
30 Zee lee Ches mroo lo xaa ngok faraón nu ngunii xaa lo Xaa Tubka Nak. 31 Zee lee Xaa Tubka Nak mle modxa ngunaab Ches, nu mkiib xaa rese lo ngeg lo xaa ngok faraón, nu lo re xaa nke zhiin lo xaa, nu lo yezh cheen xaa. Nu onka stub ngeg nglake. 32 Nu lee xaa ngok faraón mle ned lextoo xaa stuba, nixa namlaat xaa nya re xaa Israel.