Yalzi gaay ngok xkalyizh re ma
9
Zee lee Xaa Tubka Nak nzhé lo Ches:—Gwa lo xaa nak faraón nu guzh lo xaa: "Lee Xtios re nu, xaa hebreo, né: 'Laa nya xaa lazh na, zee gool xaa lo na. 2 Nu chelee lu nalaat lu nya xaa, nu nanet lu, 3 zee lee Xaa Tubka Nak le kwaan nakap lo re xma lu, ma nzhikwaa naz wen kwaan tub yalyizh, zee yet re ma: gway, ngwes, kamey, ngoon, chib, nu mbakxiil. 4 Per lee Xaa Tubka Nak, koxa re xma xaa Israel lo re xma xaa Egipto. Per lee xma re xaa Israel nayeta nik tub ma."
5 Nu lee Xaa Tubka Nak ngunii cho gor le xaaya, nu nzhé xaa:
—Kwaane le na yee.
6 Nu stub mbizh lee Xaa Tubka Nak mle zee ngut rese xma xaa Egipto; per lee re xma xaa Israel nanguta nik tub ma. 7 Zee lee xaa ngok faraón mxaal xaa ngwasewii ne che ngut xma xaa Israel, per nyent cho ngok xma xaa. Zee lee xaa ngok faraón ngok ned lextoo, nu namzaat xaa diizh roo re xaa Israel.
Yalzi xoop ngok yeezh
8 Zee lee Xaa Tubka Nak nzhé lo Ches nu lo Aarón:
—Ches, bzen tub paro xkade kwaan nzho leen gor zee gwa lo xaa nak faraón nu baa lebi luya naz ya. 9 Zee lee xkade gak yide, nu reecha dubse yizhyo Egipto. Nu gorna kaana cho re ma nu cho re xaa, zee len yeezh cho xaa.
10 Zee mzen xaa xkade nu ngwa xaa lo xaa ngok faraón, nu baa lee Ches mlebi xkade naz yiba, zee mlen yeezh cho re ma nu cho re xaa. 11 Zee lee wezh nagarlot ngzo lo Ches, nel noka cho xaa mlen yeezh nu cho rese xaa Egipto. 12 Per lee Xaa Tubka Nak, mle ned lextoo xaa ngok faraón nu nambint xaa modxa nzhé xaa Xaa Tubka Nak, lo Ches.
Yalzi gazh ngok yuuke
13 Zee lee Xaa Tubka Nak nzhé lo Ches:
—Garziil guxche nu gwa lo xaa nak faraón zee guzh lo xaa: "Xtios re nu, xaa hebreo né: 'Laa nya re xaa lazh na zee gool xaa lo na. 14 Nu chelee lu nalaat lu nya xaa, zee xaal na yalzi lo lu nu lo rese xaa nke zhiin lo lu nu lo rese xaa Egipto; nyentra stub Dios lo yizhyo kwenta na. 15 Per lee nal nzho mod xaal na tub yalyizh kwaan yalnabeyy cheen na lo lu nu lo re xaa lu zee tira yet gu nu nazotra gu lo yizhyo ne. 16 Per lee nal, zer le naya, nel nzhekla na luu yalnabeyy cheen na lo lu zee ne lu le na non dubse lo yizhyo. 17 Ngulo mded re yalzi ne, chelee lu seetaka nalaat lu nya re xaa na, 18 yee leeka gor ne, xaal na tub yuuke kwaan ndok doo, kwaan zer la nik tub welt Egipto. 19 Snee nabeyy lu zee kozhaw xaa xma lu tub pa nyaaw, nel la yuuke. Gorna laya guta rese ma nu rese xaa nzo wen, nu lee ma nzhozhaw nyent cho gak.
20 Ngu lak xaa mke zhiin lo xaa ngok faraón mzheb doo mbin kwent kwaan mzaa Xaa Tubka Nak, kwaanzee nzhé xaa lo re xaa nke zhiin lo xaa, toop xaa re ma nu cheep xaa ma pa nyaaw nu noka lee xaa. 21 Ngu zlak xaa nambint kwaan zhe Xaa Tubka Nak nu mlaa xaa xma nu xaa nke zhiin lo xaa naz wen, pa nanyaawt. 22 Zee lee Xaa Tubka Nak nzhé lo Ches:
—Lep yaa lu naz yiba, zee dubse Egipto la yuuke, lo xaa, lo ma, nu lo rese yag kwaan nzeb Egipto. 23 Ches mlep xkag naz yiba, nu lee Xaa Tubka Nak, mle ngoch ngwzi , nu lee bal ngwzi mla lo yizhyo nu mla yuuke kwaan naro doo dubse yizhyo Egipto. 24 Lee yuuke nu bal ngwzi tuka mla nu nanetra kwaza, kwaan zer zaa re xaa Egipto kwent. 25 Lee yuuke mluux rese kwaan nzho yizhyo Egipto. Mluuxa myet nu mluuxa re ma, nu rese yag kwaan nzeb wen. Nu mle bdaaxa rese yag kwaan nzeb yizhyo ba. 26 Nebse yizhyo Gosén, pa nzho re xaa Israel, namlat yuuke.
27 Zee lee xaa ngok faraón mxaal xaa yichezh Ches nu Aarón, nu nzhé xaa:
—Mzeen na mle na kwaan nawent; na mleya nu re xaa yezh cheen na, nu wli nak Xaa Tubka Nak. 28 Naab lo Xaa Tubka Nak zee nayechtra ngwzi nakap nu nalatra yuuke. Zee lee na la nya gu, nu nasaawtra na lo gu.
29 Zee lee Ches mkeb:
—Nal gorna roo na yezh ne, lep na yaa na lo Xaa Tubka Nak, zee naselatra xaa yuuke nu nayechtra ngwzi, zee ne lu lee yizhyo nak cheen xaa. 30 Na ne wen, lee lu nu re xaa nke zhiin lo lu seetaka nanzhebt ne Dios, Xaa Tubka Nak.
31 Lee yix lino nu yix sebad tira mlux, nu yix sebad nzebla son nu lee yix lino nak yeey. 32 Nu lee nzhobxtil nu yix espelta nik tub kwaan nangokt, nel gwluzh nzaaya.
33 Gorna ngulo ngunii Ches lo xaa ngok faraón, zee mroo xaa yezh, nu mlep xaa yaa xaa nu ngunii xaa lo Xaa Tubka Nak. Gorzee mlaz yuuke nu mlaz yey nu nixa nagochtra ngwzi. 34 Nu mwii xaa ngok faraón, nakalatra yey nixa yuuke, nu nixa bi nanyutra, nixa nanzhechtra ngwzi, nu mbare xaa mle xaa jwalt. Nu nixa nanebt lee xaa ngok ned, noka re xaa nke zhiin lo xaa. 35 Nu lee xaa ngok faraón ngok ned lextoo nu nanzheklat xaa nya re xaa Israel, mod nzhé Xaa Tubka Nak lo Ches.