Yalzi xon ngok mbeso
10
Lee Xaa Tubka Nak nzhé lo Ches:—Gwa lo xaa nak faraón, nel na mle ned lextoo xaa nak faraón nu lextoo re xaa nke zhiin lo xaa, zee lu na re kwaan gro doo lo xaa, 2 zee yé luya lo re xinn lu nu lo re xos lu, re kwaan mle na naz Egipto, snee ne gu lee na nak Xaa Tubka Nak.
3 Zee lee Ches nu Aarón ngwa lo xaa ngok faraón nu nzhé xaa:
—Snee né Xaa Tubka Nak, Xtios re xaa hebreo: "¿Cho gor laa lu gak nadoo lu lo na, zee laa lu nya re sawlazh na zee gol xaa lo na? 4 Nu chelee lu nalaat lu nya xaa, zee yee lee na xaal mbeso xkizhyo lu. 5 Nu kwi ma dubse yizhyo nu nixa naluutra lo yo kwi ma, zee gaw ma re kwaan mlake lo yuuke nu noka gaw ma lo re yag kwaan nzeb wen. 6 Nu yizhe ma leen li lu nu leen li re xaa nke zhiin lo lu nu leen li re xaa Egipto. Gaka tub kwaan zer ne re xuz gu nixa re xey gu, axta mbizh zee nu axta mbizh nal."
Ngulo ngunii xaa, zee lee Ches mbare nu mroo lo xaa ngok faraón. 7 Zee lee xaa nke zhiin lo xaa ngok faraón nzhé:
—¿Cho gor laa xaa ne nu nachaldiltra xaa be? Laa nya xaa ne gool xaa lo Xtios xaa, Xaa Tubka Nak. ¿Che nanet lu dubse Egipto mluxla?
8 Zee lee xaa ngok faraón mxaal xaa ngwa chezh Ches nu Aarón stuba nu nzhé xaa:
—Gwa bill lo Xtios lu, Xaa Tubka Nak. Per yilotlaka né gu cho xaa nya.
9 Per lee Ches mkeb:
—Nzhaal nya nu kwaan re xaa yeen nu xaa gol, nu kwaan re xgann nu nu re xchaap nu; nu noka kwaan re ngoon nu re mbakxiil, nel lo re nu gaka tub yalni lo Xaa Tubka Nak.
10 Nu lee xaa ngok faraón nzhé:
—Nlu doo kale gu kwaan nawent nu nzak gu lee Xaa Tubka Nak nzo kwaan gu ¿Xomod la na nya gu kwaan re xinn gu? 11 Nagakta sbaa, gwa gu nebse re xaabyi, zee gool xaa lo Xaa Tubka Nak, nel sbaa ngunaab gu.
—Bseli yaa lu lo yizhyo Egipto, zee yaad mbeso. Nu luux ma rese yix kwaan nzeb yizhyo Egipto, nu kwaan mlake gorna ngulo mla yuuke.
13 Ches mseli xkag lo yizhyo Egipto, nu lee Xaa Tubka Nak mxaal tub mbi naz pa nlen mbizh kwaan mroo dubse Egipto, zhe nu yaal. Nu nguni yizhyo stub mbizh lee mbi kwaan mroo pa nlen mbizh mbiidno mbeso, 14 ma mri dubse yizhyo Egipto, ma zer yo nu nixa nayotra gwluzh modxa mbizh zee. 15 Nu zyen doo ma ngu nu nguzhe ma dubse yizhyo, nu nixa nanlutra lo yo. Nu ndaw ma rese yix nu rese xle kwaan mlake lo yag gorna ngulo mla yuuke. Nu nixa nik tub pa Egipto namlaketra lag lo yag nu nixa namlaketra yix wen. 16 Gorzee lee xaa ngok faraón mle doo prad mxaal xaa ngwachezh Ches nu Aarón, nu nzhé xaa:
—Mle na jwalt lo Xaa Tubka Nak nu lo re gu. 17 Nu nal naab na yenlazh lu re jwalt cheen na, nu nii lu lo Dios zee kiib xaa re bid kwaan kaluux na.
18 Nu mroo Ches lo xaa ngok faraón, nu ngunii xaa lo Xaa Tubka Nak. 19 Zee lee Xaa Tubka Nak mxaal tub mbi kwaan naro doo naz paro nyaz mbizh, nu mbeya rese mbeso axta leen Nistoo Naxne. Nu nik stub mbeso namlaketra dubse yizhyo Egipto. 20 Per lee Xaa Tubka Nak mle ned lextoo xaa ngok faraón, nu lee xaa namlaat nya re xaa Israel.
Yalzi yee ngok yalnakaw
21 Nu lee Xaa Tubka Nak nzhé lo Ches:
—Lep yaa lu naz yiba, zee la yalnakaw dubse yizhyo Egipto, axta nzho mod zeen xaaya leen lextoo xaa.
22 Nu mlep Ches yaa Ches naz yiba, nu chon mbizh mla yalnakaw gro doo dubse yizhyo Egipto. 23 Nik tub xaa namlut lo wechxinn, nu nyent cho mroo dub chon mbizh, per paro nzho rese xaa Israel nguka xni mbizh. 24 Nu zee lee xaa ngok faraón ngunabeyy xaa mrezh Ches, nu nzhé xaa lo Ches:
—Gwa gu bill gu lo Xaa Tubka Nak nu be gu xinn gu, nebse lake re mbakxiil nu re chib nu re ngoon cheen gu.
25 Per lee Ches mkeb:
—Laa wee nu re xma nu, nu teed nu ma lo Xtios nu, Xaa Tubka Nak. 26 Nu re xma nu nya kwaan re nu, nu nik tub ma nalaket. Nu lo re ma kweey nu ma teed nu lo Xaa Tubka Nak, nu nanet nu xana ma naab Dios lo nu gorna zeraka zhin nu baa.
27 Nu lee Xaa Tubka Nak mle ned lextoo xaa ngok faraón, nu lee xaa ngok faraón namlaat nya xaa. 28 Nu nzhé xaa ngok faraón:
—¡Bachi garli na! Nu nabaretra lu lach lu lo na. Nu mbizh kwaan lach lu lo na, ¡gut na lu! 29 Nu lee Ches mkeb:
—Wen né lu, nalachtra na lo lu.