Naket xaa zhiin liin gazh
25
Ngunii Xaa Tubka Nak lo Ches yek yi Sinaí nu nzhé xaa:2 —Guzh lo re xaa Israel: Gorna reep gu yizhyo kwaan za na lo gu, nagaant gu yizhyo nu nixa naket gu zhiin liin gazha, zee le non gu na, Xaa Tubka Nak. 3 Xoop liin gaan gu xkizhyo gu nu xoop liin chub gu xkag ub gu zee toop gu xle loya. 4 Per liin gazh lee xkizhyo gu kwaz deskans zee le non gu na, Xaa Tubka Nak, nixa nagaant gu xkizhyo gu nu nixa nachubt gu yag ub cheen gu; 5 natoopt gu xle lo kwaan sbaasa mlen xkizhyo gu nu nixa natoopt gu ub lo kwaan sbaasa mlen. Lee yizhyo kwaz deskans tub liin. 6 Kwaanzee, rese kwaan zaa yizhyo liin kwaan naket gu zhiin loya, nzho mod gaw guya per nanebt gu nzho mod gawa sinka noka re xaa nke zhiin lo gu nu re me nke zhiin lo gu nu re xaa zit xaa nzho lo gu. 7 Nu noka re ma kwaan nkano gu nu re ma nzho xkizhyo gu gaw rese kwaan zaa yizhyo dubse tub liin..
Liin kwaan kwezh xaa kach
8 &Gazh welt koo gu kwent gazh liin kwaan naket gu zhiin, zee gaka choobyee liin, 9 nu mbizh chii xchee mbee gazh, mbizh kwaan zhe jwalt cheen gu, kwezh gu kach dubse xkizhyo gu. 10 Zee lee liin choobchii koxa gu nu yé gu lo re xaa xkizhyo gu lee xaa mla. Zee gaka tub liin kwaan kwezh xaa kach nu rese xaa nzonlaa nzho mod bare xaa xkizhyo xaa paro nzho re sawlizh xaa. 11 Lee liin choobchii gak liin kwaan kwezh xaa kach: liin zee nagaant gu nu nixa natoopt gu xle lo kwaan sbaasa mlen xkizhyo gu nu nixa natoopt gu ub kwaan sbaasa mlen. 12 Liin kwaan kwezh xaa kach liin zee gak nambey lo re gu nu gaw gu rese kwaan len sbaasa lo xkizhyo gu.
13 &Nu liin kwaan kwezh xaa kach rese xaa bare xkizhyo xaa. 14 Gorna to gu tub lee yizhyo lo wechxinn gu, o zi gu tub lee yizhyo lo xaa, nakadet gu xaa. 15 Chelee lu zi tub le yizhyo lo wechxiin lu per nkin zi lu ya loka lak paro nona re liin kwaan nzho jwalt kwezh xaa kach, nu le xaa toya nkin to xaa loka lak non re yalgon kwaan nzho jwalt koo xaaya lo re liin kwaan nzho jwalt gan xaaya 16 Cheleeya nzho jwalt zyen liin kwaan kwezh xaa kach, zeetaka kar no na; per cheleeya xeepse liin nzho jwalt, zee to xaaya loka lal non re yalgon kwaan nzho jwalt koo xaaya
17 &Nakadet lu nik tub wechxinn lu, sinka bzheb gu ne gu na, xaa nak Xtios gu, nel na nak Xaa Tubka Nak. 18 Blozhaw gu ley cheen na nu ble gu rese kwaan ngunabeyy na gu; zee wen yo gu lo yizhyo. 19 Zee yizhyo zaa xle nu gaw guya axta yizhe lextoo gu nu yo gu lo yizhyo nu nalet gu xgab.
20 &Nu chelee xaa nabdizh xaa lo gu: "¿Cho kwaan gaw be liin gazh, chelee be nagaant be nu nixa natoopt be yalgon?", 21 ni na lo gu lee liin xoop zaa na kwaan gro doo, zee yo kwaan gaw gu dubse chon liin. 22 Gorna lee gu gaan liin xon, seetaka kayaw gu yalgon kwaan liin mded nu seetaka gaw guya axta gorna yilo yiga yalgon cheen stub liin.
Ley cheen xomod le xaa gan xkizhyo xaa stuba
23 &Lee yizhyo nadoota tira, nel yizhyo nak xcheen na, gu nak mod xaa zit nu mod xaa stub yezh 24 Kwaanzee lo dubse xkizhyo gu, re xaa nzho mod kano re yizhyo kwaan ngok cheen xey gu.
25 &Chelee wech lu gak xaa prob nu to xaa xkizhyo xaa lo stub xaa, zee lee sawlizh xaa gak xaa ya ziya lo xaa mkaayaya.
26 &Per cheleeya nyent sawlizh xaa xaa ziya lo xaa nu lee xaa nguzhal demi lo xaa nzho mod zi xaaya stuba, 27 zee koo xaa kwent liin kwaan mdoya zee zi xaaya lo xaa kwaan mziya lo xaa stuba loka paro nona, zee bareya gaka xcheen xaa stuba. 28 Per chelee xaa nayazhalt re demi kwaan zi xaaya lo xaa kwaan mto xaaya lo, seetaka gaka cheen xaa kwaan mziya axta liin kwaan kwezh xaa kach, zee bareya gaka cheen xaa stuba.
29 &Cheleeya nzho tub xaa to tub yoo kwaan nzho leen yezh, kwaan nyaww dub welt nu zer yixoob tub liin zee nzho mod zi xaaya stuba. 30 Cheleeya ngulo yixoob tub liin nu nalet xaa gan zi xaaya, nabareta lo xaa liin kwaan kwezh kach sinka seetaka naka xcheen xaa nu cheen re dii cheen xaa. 31 Lee re yoo kwaan nzhi naz re yezh chuut, kwaan nayaawt naka mod tub lee yizhyo kwaan nzho mod zi xaa nu kwaan bare liin kwaan kwezh xaa kach.
32 &Re xaa nak dii cheen Leví tubka nzho mod zi xaa li xaa, kwaan mkano xaa leen yezh kwaan nak xcheen xaa. 33 Chelee tub re xaa dii cheen Leví nyentra mod ziya stuba zere xaaya liin kwaan kwezh xaa kach nel lee yoo nzob leen yezh cheen re xaa Leví, naka kwaan laa xaa lo re sawlizh xaa nu lo re xaa Israel. 34 Per lee yizhyo kwaan nzhi dub welt lo re dii cheen Leví, nyent mod to xaaya, nel tira naka xcheen xaa.
35 &Cheleeya tub wechxinn lu gak xaa prob, ble yud xaa modxa nle lu yud xaa zit, xaa nzho lo re gu. 36 Nanaabt lu xinn demi gorna tache lu demi, sinka bzheb ne Dios, zee lee wechxinn lu yo kwaan lu tubka. 37 Gorna tache lu demi nanaabt lu xinna nu nixa nanaabt lu demi lo xaa gorna tache lu kwaan gaw xaa. 38 Na nak Xaa Tubka Nak, xaa nak Xtios gu, xaa kwaan mloo gu yizhyo Egipto nu xaa kwaan mzaa yizhyo Canaán lo gu zee gak na Xtios gu.
39 &Nu chelee wechxinn lu gak xaa prob nu né xaa lo lu: "To na na lo lu", nakanot lu xaa zhiin mod tub xaa nazhext ka, 40 bkano xaa mod tub xaa nke zhiin nu mod tub xaa nzho kwaan lu; axta gorna yixoob liin kwaan kwezh xaa kach. 41 Zeera sela lu xaa kwaan re xinn xaa nu bare xaa lo re sawlizh xaa nu kayaa xaa re kwaan ngok xcheen xuz xaa, 42 nel rese gu xaa nke zhiin lo na, na mloo gu yizhyo Egipto; kwaanzee nadot xaa mod xaa nke zhiin, xaa kwaan nazhext ka. 43 Nagakt lu tub xaa nabeyy doo lo xaa sinka bzheb ne Xtios lu.
44 &Per nzho mod zi gu xaa ke zhiin nu xaa stub yezh nu nakixt gu ka xaa, xaa nanakt xaa Israel. 45 Nu noka nzho mod zi gu xaa nke zhiin lo gu, xaa ngol xkizhyo gu lo re sawlizh re xaa zit, xaa nzho lo re gu. Re xaa ne gak re xaa ke zhiin lo gu xaa nakixt gu ka. 46 Nu nzho mod lake xaa ne lo re xiin gu rese mbizh kwaan mban xaa. Per lo re wechxinn gu, xaa Israel nagakt gu tub xaa nabeyy doo lo xaa.
47 &Cheleeya xaa zit xaa nzho lo gu gak rik; nu tub re wechxinn gu gak xaa prob nu to xaa xaa lo tub re xaa zit o tub re sawlizh xaa xaa zit, 48 yilo to xaa xaa nzho mod tub re sawlizh xaa nzho mod bare zi xaa tuba, 49 xich xaa o stub re sawlizh xaa. Cheleeya nzho moda lo xaa, leeka lee xaa nzho mod zi xaa stuba. 50 Lee xaa nu xaa nabeyy lo xaa nzhaal koo xaa kwent nel lak mbizh nzha ded liin kwaan mdo xaa nu axta liin kwaan kwezh xaa kach, zee ne xaa paro zi xaa xaa ke zhiin tub labaa liin. 51 Nu cheleeya nzho jwalt zyen liin kwezh xaa kach nu le ngulola mtoya nkin zeera xaa demi kwaan mto xaaya. 52 nu cheleeya nzho jwalt lakse liin kwaan kwezh xaa kach, zee lakse kwaan kix xaa lo xaa nabeyy lo xaa lo liin kwaan nzho jwalt. 53 Lee xaa nabeyy lo xaa nzhaal le xaa xaa mod tub xaa ka xaa nke zhiin tub liin. Nu nazeyalt gu nabeyy doo xaa xaa.