Xni kwaan ke leen li Xaa Tubka Nak
(Ex 27:20-21)
24
Ngunii Xaa Tubka Nak lo Ches nu nzhé xaa:2 —Guzh lo re xaa Israel zee yiidno xaa nseyt cheen yag olib, kwaan nzhul doo, zee ke xni leen li na. Zee rese bruj tubka zaaya xni. 3 Aarón dexkwaa bruj kwaan zaa xni leen yoo, naz tich ler kwaan nke lo kaj cheen trat, zee tubka zaaya xni lo na, Xaa Tubka Nak, dubse yaal. Kwaane gak tub ley kwaan tira lo re dii cheen gu. 4 Nu dexkwaa xaa re xni kwaan nzob yek bruj kwaan nak or, zee tubka zaaya xni lo na, Xaa Tubka Nak.
Pan kwaan nzaa xaa lo Xaa Tubka Nak
5 &Bzen arin kwaan wen doo nu keex lu chiibchop yat; nu kad cha yat gak nga tap kil. 6 Nu zhiib guya lo na, Xaa Tubka Nak, lo mes kwaan nak nebse or, chop baal kwek guya nu xopga yat kad baal. 7 Nu kad baal zhiib gu yaal kwaan nzhul nu sbaa lee yat gak kwaan chul doo nzebech, kwaan gak mod tub gon kwaan nzelazh gu na, Xaa Tubka Nak. 8 Lee yat ne zhiib xaa tubka lo na, Xaa Tubka Nak, yizata zhe sab. Kwaane gak tub kwaan tira yaan na lo re xaa Israel. 9 Lee yat ne nak kwaan gaw Aarón nu re xgann xaa nu gaw xaaya tub pa nambey, nel naka tub gon kwaan nambey lo na, Xaa Tubka Nak. Kwaane nak tub ley kwaan tira.
Bid kwaan ded xaa nge lo Dios
10 Lo re xaa Israel ngu tub xaabyi, xgann tub ngwnaa me Israel nu lee xuz xaa nak xaa Egipto. Nu ngu tub mbizh lee xaabyi ne mkwaan tub dil paro mbaz re xaa. 11 Per lee xgann ngwnaa me Israel mzelo mde lo le Xaa Tubka Nak. Zee mbe xaa xaa lo Ches. (Lee xnaa xaa le Selomit, xchaap Dibri, me nak dii cheen Dan). 12 Nu mlo xaa xaa lozhyib axta gorna yé Xaa Tubka Nak cho kwaan le xaa kwaan lee xaa. 13 Zee lee Xaa Tubka Nak nzhé lo Ches:
14 —Bloo gu xaa kwaan mde lo na naz paro mbaz re gu, loka xaa kwaan mbin kwaan ngunii xaa, bzhib gu yaa gu yek xaa, zee lee xaa yezh zaake xaa. 15 Guzh lo re xaa Israel: loka xaa ke lo le na, ded xaa bid kwent cheen jwalt cheen xaa. 16 Kwaanzee loka xaa kwaan ke lo le na, Xaa Tubka Nak, nzhaal yet xaa; rese xaa yezh zaake xaa, nexa chol xaa zit xaa o xaa ngol lo re guya, chelee xaa ke xaa lo na, Xaa Tubka Nak, nzhaal yet xaa.
17 &Loka xaa gut samyet nzhaal yet xaa.
18 &Loka xaa gut xma stub xaa zaa xaa stub ma zonii ma mbit xaa.
19 &Loka xaa kwaan seweey wechxinn, sbaaka seweey xaa xaa: 20 loka tub xaa kiich stub xaa noka xaa zee yech, chelee tub xaa kich zaalo stub xaa noka zaalo xaa zee yech nu chelee tub xaa kiib leyy stub xaa noka leyy xaa zee yiib; mod mle xaa leeka sbaa le re xaa xaa.
21 &Loka xaa kwaan gut tub ma kix xaa ma, per lee xaa kwaan gut tub xaa nzhaal yet xaa.