Re mbizh cheen re yalni kwaan non
(Ex. 12, Lev. 16, Num. 28-29, Dt. 16)
23
Ngunii Xaa Tubka Nak lo Ches nu nzhé xaa:2 —Yé lu lo re xaa Israel: kwaane nak re yalni nambey kwaan le gu lo na Xaa Tubka Nak, nel na mlaya.
3 &Xoop mbizh ke gu zhiin, per lee mbizh sab kwaz gu, nel naka tub mbizh nambey lo na Xaa Tubka Nak, nu nik tub zhiin naket gu nu mrezh re xaa yezh zee zhaal gu kwaan re xaa tub mod non doo nexa paro nzho gu.
4 &Kwaane nak re yalni kwaan mla na, Xaa Tubka Nak, nu brezh re xaa yezh zee zhaal gu kwaan re xaa tub mod non doo nu le guya mer mbizh kwaan naka.
5 &Yalni cheen Paskwa cheen na, Xaa Tubka Nak, zelo zhe chida xche mbee yilotlaka gorna nzhazhel yizhyo. 6 Leeka chiin xche mbee ne zelo yalni kwaan nzhaw xaa yat kwaan nanyut lebadur leen lo na, Xaa Tubka Nak. Nu gazh mbizh gaw gu yat kwaan nanyut lebadur leen. 7 Lee mbizh yilotlaka brezh gu re xaa yezh zee zhaal gu kwaa re xaa tub mod non doo nu mbizh ne nik tub zhiin nalet gu. 8 Dubse tub gazh mbizh zeek gu gon lo na, Xaa Tubka Nak. nu mrezh re xaa yezh zee zhaal gu kwaan re xaa tub mod non doo nu nik tub zhiin naket gu."
9 Zee le Xaa Tubka Nak nzhé lo Ches:
10 —Guzh lo re xaa Israel: gorna reep gu leen yizhyo kwaan za na lo gu, gorna koo gu yalgon cheen gu, yalaa gu tub yaaya kwaan yilotlaka lo ngwleyy. 11 Zee lee ngwleyy kuna lo na, Xaa Tubka Nak, stub mbizh zhe sab zee kayaa na xaa. 12 Leeka mbizh zee teed gu tub mbakxiil yeen, ma tub liin, ma wen, tub ma kwaan zeek xaa lo mdo lo na, Xaa Tubka Nak. 13 Nu noka zaa gu tap kil arin kwaan wen kwaan nuch nseyt, kwaan nak gon cheen yalgon kwaan yek, kwaan nak bech kwaan chul doo lo na, Xaa Tubka Nak nu noka zaa gu tub litr nis ub kwaan gak gon kwaan nak xis ub. 14 Nagawt gu yat nu nixa kwaan mbyeex o kwaan kub, axta gorna yalaa gu gon lo na, xaa nak Xtios gu. Kwaane nak tub ley kwaan tira lo re dii cheen gu, nexa paro nzho gu.
15 &Koo gu kwent gazh sman yilo ded mbizh sab, kwaane nak mbizh kwaan wee gu gon kwaan kun xaa lo mdo lo na; 16 koo gu kwent choobchii mbizh per noka sab garziil; zee zaa gu gon cheen yalgon kwaan kub lo na Xaa Tubka Nak. 17 Loka paro nzho gu zee yiidno gu chop yat mod gon kwaan kun xaa lo na kwaan yilo, nu chop yat kwaan mdexkwaa tap kil arin, kwaan mbyeex kwaan lebadur. 18 Tubka kwaan yat zaa gu gazh mbakxiil yeen, ma tub liin ma wen, nu tub la ngoon yeen nu chop mbakxiil. kwaan nak gon kwaan zeek gu ma zaa guya kwaan gon cheen yalgon nu gon cheen xis ub, kwaan nak gon kwaan chul doo nze bech lo na, Xaa Tubka Nak.
19 &Zeera zaa gu tub chib, ma mach ma wen, ma gak gon kwaan zhe xjwalt nu gak nzhul xaa chop mbakxiil yeen, ma nzho tub liin ma kwaan nak gon kwaan kwi wen gu kwaan na. 20 Zee lee ngwleyy zaa rop mbakxiil yeen, tubka kwaan yat, kwaan nak kwaan yilotlaka, kwaan nak gon kwaan kun xaa lo na, Xaa Tubka Nak, tub gon kwaan nambey lo na, Xaa Tubka Nak, kwaan nak kwaan gaw ngwleyy.
21 &Leeka mbizh zee mrezh re xaa yezh zee zhaal gu kwaan re xaa tub mod non doo Nu mbizh ne nik tub zhiin naket gu. Kwaane nak tub ley kwaan tira lo re dii cheen gu nexa paro nzho gu.
22 &Gorna zhin mbizh kwaan toop gu yalgon cheen gu, natoopt gu rese kwaan nak gaw kwaan mlake leen xkizhyo gu, leeya nak kwaan gaw re xaa nyent kwaan gaw nu re xaa zit. Na nak Xaa Tubka Nak, xaa nak Xtios gu.
23 Zee ngunii Xaa Tubka Nak lo Ches nu nzhé xaa:
24 —Guzh lo re xaa Israel: mbizh yilotlaka lo mbee gazh gak tub mbizh kwaan naket gu zhiin, nu mrezh re xaa yezh zee zhaal gu kwaan re xaa tub mod non doo gorna kwezh kach. 25 Mbizh zee nik tub zhiin naket gu, sinka zaa gu lo na, Xaa Tubka Nak tub gon."
26 Zee lee Xaa Tubka Nak nzhé lo Ches:
27 Lee chii xchee mbee gazh nak mbizh kwaan zhe re jwalt cheen gu. nu mrezh re xaa yezh zee zhaal gu kwaan re xaa tub mod non doo zee zhaal gu zee zaa gu tub gon lo na. 28 Nik tub zhiin naket gu mbizh ne, nel mbizh ne nak mbizh kwaan zhe re jwalt cheen gu, zee kwii wen gu kwaan na, Xaa Tubka Nak, xaa nak Xtios gu. 29 Rese xaa kwaan nankwant mbizh ne, koo xaa xaa yezh. 30 Nu loka xaa kwaan ke zhiin mbizh ne, na ko xaa yezh.
31 &Kwaanzee, nik tub zhiin naket gu. Kwaane nak tub ley kwaan tira lo re dii cheen gu nexa paro nzho gu. 32 Mbizh kwaan nak mbizh kwaan naket gu zhiin nu kwan gu. Mbizh sab ne nkin kozhaw gu mzhel yizhyo zhe yee xche mbee gazh nu axta mzhel yizhyo stub mbizh."
33 Zee ngunii Xaa Tubka Nak lo Ches nu nzhé xaa:
34 —Guzh lo re xaa Israel: chiin xche mbee gazh zelo yalni cheen ramad zee le non gu na, Xaa Tubka Nak. 35 Mbizh yilotlaka mrezh re xaa yezh zee zhaal gu kwaan re xaa tub mod non doo nu nik tub zhiin naket gu mbizh ne. 36 Tub gazh mbizh zaa gu gon lo na Xaa Tubka Nak. Nu lee mbizh xon mrezh re xaa yezh zee zhaal gu kwaan re xaa tub mod non doo zee zaa gu gon lo na Xaa Tubka Nak nel naka yalni kwaan le non gu na; nu mbizh ne nik tub zhiin naket gu.
37 &Kwaane nak yalni kwaan mlaa na Xaa Tubka Nak, leezha mrezh xaa re xaa yezh tub mod non doo, zee zaa gu gon lo na, gon cheen yalgon nu ma kwaan nzek xaa lo mdo zee kwii wen xaa kwaan na, nu gon cheen xis ub, mod naka kad mbizh. 38 Rese yalni ne nak kwaan nle xaa mbizh kwaan nyalzo ya nixa nanakta sab, mbizh cheen na, Xaa Tubka Nak, zee zaa xaa kwaan zelazh xaa, gon kwaan myaan xaa zaa xaa nu gon kwaan nzhal lextoo xaa.
39 &Mer chiin xche mbee gazh, yilo toop gu yalgon nu dubse tub gazh mbizh le gu yalni cheen Xaa Tubka Nak. Mbizh yilotlaka nu mbizh xon gak tub mbizh kwaan naket gu zhiin, tub mbizh non doo. 40 Mbizh yilotlaka toop gu xle cheen yag kwaan chul doo nu ram yag yin nu yag kwaan nzeb doo lag lo nu yag la zyas kwaan nzeb ro yuu nu dubse tub gazh mbizh gak nix lextoo gu lo na, Xaa Tubka Nak, xaa nak Xtios gu. 41 Kad liin dubse tub gazh mbizh le gu yalni, zee le non gu na, Xaa Tubka Nak. Le guya mbee gazh. Kwaane nak tub ley kwaan tira lo re dii cheen gu. 42 Dubse tub gazh mbizh yo gu xramad gu. Rese xaa ngol mer lo xaa Israel yo leen xramad xaa, 43 zee ne rese dii cheen gu, le na mle zee mban rese xaa Israel leen ramad gorna mlo na xaa yizhyo Egipto. Na nak Xaa Tubka Nak, xaa nak Xtios gu.
44 Sbaa nzhé Ches lo re xaa Israel re yalni kwaan mlaa Xaa Tubka Nak le xaa.