Gon nzhul
22
Ngunii Xaa Tubka Nak lo Ches nu nzhé xaa:2 —Guzh lo Aarón nu lo re xgann xaa zee wii doo xaa respet lo gon kwaan nambey kwaan nzaa re xaa Israel lo na, zee nalebeedt re xaa le na kwaan nambey na, Xaa Tubka Nak.
3 &Noka ngunabeyy Dios zee yé xaa: Loka tub xaa nak dii cheen Aarón, xaa nak xaa beed zen gon kwaan nzaa xaa Israel lo na, Xaa Tubka Nak, koo xaa xaa leen li na.
4 &Chelee tub dii cheen Aarón xaa ne nzak lo yeezh kwaan nyall cho xaa, o xaa nroo nis cho, nyent mod gaw xaa gon ne chelee xaa nagakt nzhul xaa.
&Loka xaa kwaan gal cho tub kwaan ngok beed kwaan ngol ma ngut cho, o cho xaa kwaan nroo nis cho, 5 o gal xaa cho tub ma nze lazh lo yo o cho tub xaa beed, loka kwaan mle beed xaa, 6 gak beed xaa axta la yalnakaw nu gaz xaa, zee nzho mod gaw xaa gon kwaan nzhul. 7 Gorna yilo yaaz mbizh zeera gak nzhul xaa nu zeera nzho mod gaw xaa gon kwaan nzhul, nel leeya nak kwaan nzhaw xaa. 8 Nyent mod gaw xaa baal cheen ma nzhet sbaasa nu nixa ma kwaan mbit ma, o ma kwaan mle byog ma, nel gak beed xaa kwaan leeya. Na nak Xaa Tubka Nak.
9 &Re ngwleyy nzhaal le re kwaan ni na nu snee naletra xaa jwalt nu nixa nadedtra xaa bid lo yalgut nel nixa mle nanont xaa gon cheen. Na nak nak, Xaa Tubka Nak, xaa nle nambey re ngwleyy.
10 &Nik tub xaa zit nyent mod gaw gon kwaan nzhul. Nixa xaa mbaz garli ngwleyy nixa xaa nke zhiin lo xaa, 11 per nzho mod gaw xmos xaaya, xaa kwaan mzi ngwleyy o xaa ngol garli xaa.
12 &Chelee xchaap tub ngwleyy ka tub xaa nanakt ngwleyy, nyent mod gaw me gon kwaan nzhul kwaan nzhaw ngwleyy. 13 Per chelee xchaap ngwleyy lake byud, o laa xaabyi me nu nankanot me mad nu bare me garli xuz me, mod me techo, nzho mod gaw me kwaan nzhaw xuz me. Per lee re xaa zit, nik tub xaa nyent mod gawa.
14 &Chelee tub xaa gaw gon kwaan nzhul, per nanzeent xaaya nzhaal zere xaa gon kwaan ndaw xaa lo ngwleyy tub part lo gaay part. 15 Per lee re ngwleyy xaa Israel nalaat gak beed re kwaan nzaa xaa lo na, Xaa Tubka Nak, 16 nu chelee xaa gaw xaaya kwaan nambey, kala xaa le re xaa yezh jwalt zee nkin teed xaa ma nak gon kwaan zere xaa gorna nle wann xaa, Na nak, Xaa Tubka Nak, xaa nle nambey xaa."
Gon kwaan kayaa Xaa Tubka Nak
17 Lee Xaa Tubka Nak, ngunii lo Ches nu nzhé xaa:
18 —Guzh lo Aarón nu lo re xgann xaa nu lo rese xaa Israel: Loka tub re gu xaa Israel o xaa zit, xaa nzho lo re gu, zaa tub gon lo na, Xaa Tubka Nak, leezha myaan xaa tub kwaan o gorna nzaa xaa tub gon kwaan nzhal lextoo xaa, 19 nkin gak ma tub ma mach, ma wen, ma nankanot yalyizh mbakxiil yeen o chib o ngoon, zee gaka tub kwaan kayaa na. 20 Nazaat gu nik tub ma nkano yalyizh lo na, nel nakayaat na ma.
21 &Chelee tub xaa yaan le tub kwaan o zaa tub gon kwaan nzhal lextoo xaa lo na, Xaa Tubka Nak, ngoon o mbakxiil mod gon kwaan kwi wen xaa kwaan na, zee gak ma ma kayaa na nu nzhaal gak ma ma wen. 22 Nateedt gu tub ma syeg lo na, Xaa Tubka Nak, nixa ma ne nzak, nixa ma ngoch, nixa ma nzeb yeezh cho, nixa ma nzeb mbeed cho, nixa ma nkano bde, nixa nateedt gu nik tub re ma snee nak. 23 Per nzho mod zaa gu gon kwaan nzhal lextoo gu, tub la ngoon yeen o tub mbakxiil ma nawent o ma win, per lee gon ne nakayaat na, leezha myaan gu tub kwaan. 24 Nixa nateedt gu tub ma mgaazh xaa xko, ma ngo xaa xko, ma nchoog xaa xko lo na, Xaa Tubka Nak, nalet gu kwaane yizhyo cheen gu. 25 Nixa nakayaat gu re ma ne lo re xaa zit, zee teed gu ma mod gon kwaan nzhaw na, xaa nak Dios cheen gu nakayaat na ma kwaan nawent nak.
26 Ngunii Xaa Tubka Nak, lo Ches nu nzhé xaa:
27 —Gorna gal tub ngoon yeen, tub mbakxiil yeen o tub chib, zo ma kwaan xnaa ma tub gazh mbizh; lee mbizh xon, naz delant nzhola mod kayaa na, Xaa Tubka Nak, ma mod gon kwaan zeek xaa ma lo mdo.
28 &Nu nachoogt gu yenn tub la bak o tub mbakxiil kwaan xinn ma leeka mbizh.
29 Gorna lee gu teed ma nak gon, kwaan zaa gu dixkix lo na, Xaa Tubka Nak, teed gu ma tub mod nali zee kayaa na ma. 30 Nu leeka mbizh zee gaw gu ma; nu nixa nalaat gu nik stik ma stub mbizh. Na nak Xaa Tubka Nak.