Yalnzhul cheen re ngwleyy
21
Xaa Tubka Nak nzhé lo Ches:—Guzh lo re ngwleyy, xgann Aarón, zee nagakt beed xaa kwaan tub re xaa ngut xaa yezh cheen xaa. 2 Per nebse xaa nzho mod gal xaa cho nak re sawlizh xaa, xaa yet, xuz xaa, xnaa xaa, xiin xaa, wech xaa, 3 o bzan xaa me mad, me namkanot xaabyi; kwaan tub re xaa ne nzho mod gak beed xaa. 4 Nagalt xaa cho tub re xaa ngut, xaa yezh, zee le xaa zee gak beed xaa, nel le xaa nak xaa non lo re xaa yezh.
5 &Nu nachubt xaa yich yek xaa, nu nixa nachoogt xaa xlox xaa, nu nixa nakeet xaa bde cho xaa. 6 Nkin gak nambey xaa lo na, xaa nak Xtios xaa, nu nanzhaalt le nanont xaa le na, nel lee xaa nak xaa nzaa gon kwaan nzhek lo na, Xaa Tubka Nak, kwaan nak mod kwaan nzhaw na, kwaanzee nkin gak nambey xaa.
7 &Nik tub ngwleyy nyent mod ka tub ngwnaa me nto cho, nu nixa me kwaan mlaa xaabyi, nu nixa me kwaan mchaal xaabyi, nel nzhul nak xaa lo na, xaa nak Xtios xaa. 8 Nkin le nambey lu xaa, nel lee xaa nak xaa nzaa gon kwaan nak mod kwaan nzhaw na, xaa nak Xtios xaa. Nu nambey gak xaa lo lu, nel na, Xaa Tubka Nak, nambey nak na, nu na nle nambey gu.
9 &Nu chelee xchaap ngwleyy gak me nto cho leeka lee me le zee nangwiit re xaa respet lo xuz me, zee yek me lo ki.
10 &Lee xaa nabeyy lo rese ngwleyy mkayaa xaa yalnabeyy gak xaa ler nzhul, nel mle nzhul xaa xaa kwaan nseyt kwaan nzhul kwaan mteeb xaa yek xaa. Kwaanzee nalaat xaa zob reech yich yek xaa, nu nixa nachazt xaa xab xaa kwaan nlu lee xaa nzho bel. 11 Nu nixa nareept xaa paro nzhob xaa ngut, nalet xaa zee gak beed xaa kwent cheen xuz xaa o xnaa xaa. 12 Naroot xaa leen li na zee nalebeedt xaa leen li na, xaa nak Xtios xaa, nel ngok nzhul xaa kwaan nseyt kwaan nle nzhul na xaa; na nak Xaa Tubka Nak.
13 &Lee ngwnaa kwaan gak xngwnaa xaa nkin gak me me kwaan zer chaal xaabyi. 14 Nu nakat xaa tub ngwnaa byud, nu nixa ngwnaa kwaan mlaa xaabyi, nu ngwnaa me mkano xaa lajwers, o me nto cho; xngwnaa xaa nkin gak me nik tub xaabyi zer chaal, me nak sawlazh xaa, 15 zee nalaat re xaa yezh wii respet lo re dii cheen xaa. Na nak Xaa Tubka Nak, xaa mle nambey xaa.
Kwaan nle zee nyent mod gak xaa ngwleyy
16 Xaa Tubka Nak nzhé lo Ches:
17 —Guzh lo Aarón: Nik tub dii cheen lu, xaa kwaan nawent nak, nyent mod bii lo na, nu zaa xaa gon kwaan nak mod kwaan nzhaw na. 18 Nik tub xaa kwaan nawent nyent mod bii lo na: xaa syeg o xaa mdeen, xaa nawent nak tub pa cho, 19 xaa kwaan ngoch nii o ngoch yaa, 20 xaa naleng nak tich o xaa chuut doo, xaa nzho beg garlo, xaa kwaan nzeb mbeed, o xaa kwaan nzeb yeezh kwaan nzoxbab, o xaa kwaan ngwa golp xko. 21 Nik tub xaa lo re dii cheen Aarón xaa nagakt wen nyent mod bii lo na, Xaa Tubka Nak, nu zeek xaa gon lo na. Nu chelee xaa nawent xaa; nyent mod zaa xaa gon kwaan nak mod kwaan nzhaw na, xaa nak Xtios xaa. 22 Nzho mod gaw xaa gon kwaan nzaa xaa lo na, xaa nak Xtios xaa, gon kwaan nambey lo re kwaan nambey. 23 Per nabiit xaa gax lo ler ndok kwaan nsaaw Pa Nambey Doo nixa lo mdo, chelee xaa nawent xaa, zee nalebeedt xaa leen li na, nel na nak Xaa Tubka Nak, xaa mle nambey re ngwleyy."
24 Sbaa nzhé Ches lo Aarón nu lo re xgann xaa, nu lo rese xaa Israel.