Ley cheen yalnzhul nu kwaan wli
19
Ngunii Xaa Tubka Nak lo Ches nu nzhé xaa:2 —Guzh lo re xaa Israel:
"Gok nambey gu, nel nambey nak na, Xaa Tubka Nak xaa nak Xtios gu.
3 &Kad tub gu le non gu xuz gu nu xnaa gu. Nu blozhaw gu zhe sab. Nel na nak, Xaa Tubka Nak, xaa nak Xtios gu.
4 &Nagoolt gu lo re maj kwaan nak yag, nu nixa nadexkwaat gu stub maj kwaan nak yiib. Na, Xaa Tubka Nak, xaa nak Xtios gu.
5 &Gorna zaa gu tub gon kwaan kwi wen gu kwaan Xaa Tubka Nak, bzaa guya kwaan tub mod kwaan nyula xaa. 6 Nu daw guya leeka mbizh kwaan zaa guya, o stub mbizh nu kwaan lake zeek guya mbizh yon. 7 Chelee tub xaa gawa mbizh yon naka tub kwaan nanont; nu nakayaat xaaya nel ngulola mlaaya, 8 nu loka xaa gawa ded xaa bid cheen jwalt kwaan mle xaa nel mle beed xaa kwaan nambey cheen na, Xaa Tubka Nak. Koo gu xaa yezh cheen gu.
9 &Gorna nzhin mbizh kwaan toop lu yalgon cheen lu, natoopt lu rese kwaan nzeb roo wri nu nixa re gaw kwaan mlake leen xkizhyo lu. 10 Nabaret gu kwaan gu rese ub, nu nixa natoopt gu re kwaan mrenzeb lo yag; leeya nak kwaan gaw re xaa nyent kwaan gaw nu re xaa zit. Na, Xaa Tubka Nak, xaa nak Xtios gu.
11 &Nalewannt lu, nakadet lu, nu nixa na kilt lu wechxinn lu.
12 &Nazeeta lu le na sbaasa, zee sbaa le lu nanont le na, xaa nak Xtios lu. Na nak Xaa Tubka Nak.
13 &Nalet lu kwaan nawent lo wechxinn lu, nu nixa nalewannt lu xaa.
&Nu nixa nakixt lu lo xaa nke zhiin lo lu axta stub mbizh.
14 &Naket lu lo xaa kwee, nu nixa nakwekt lu kwaan ralnii xaa syeg, sinka bzheb ne Xtios lu. Na nak Xaa Tubka Nak.
15 &Nagakt lu nanalit gorna naab lu kwent, naroot lu xjabor xaa prob o xaa rik, sinka naab kwent tub mod nali.
16 &Nagawyixt lu samyet lu, Nagakt lu yalkawet lo xaa nzhut wechxinn lu. Na nak Xaa Tubka Nak.
17 &Nayot yalnayii lextoo lu ne lu wechxinn lu. &Bgalno wechxinn lu gorna nzhaal galno lu xaa. Zee nadedt lu bid lo jwalt cheen xaa.
18 &Nalet lu kwaan nawent kwaan mle wechxinn lu lo lu, nakozhawt lu yalnayii lextoo lu ne lu re sawlazh lu. Kela wechxinn lu modxa nkela lu lu. Na nak Xaa Tubka Nak.
19 &Blozhaw re kwaan nii ley cheen na. Nachaalt lu xma lu kwaan stub lo ma. Nakot lu chop lo ben xkizhyo lu. Nu nixa nagakt lu ler kwaan ndib chop lo yil.
20 &Loka cho xaa chaal tub ngwnaa me nak mos me nakladiizh ka stub xaabyi, me zer laa xaa kwaan nabeyy lo me, rop xaa me ded bid lo kwaan yé xaa non lo xaa, per naguta xaa rop xaa, Nel zer zi xaa me nu zer gak me me nzonlaa. 21 Zee lee xaabyi ne teed tub mbakxiil ma gak mod gon kwaan zere xaa gorna lw wann xaa , nu wee xaaya roo li na. 22 Zee kix ngwleyy cheen jwalt kwaan mle xaa kwen cheen gon nzere xaa gorna nle wann xaa teed lo na, Xaa Tubka Nak, zee zhe re jwalt cheen xaa kwaan mle xaa.
23 &Gorna reep gu leen yizhyo kwaan za na lo gu, nu xen gu reta lo yag xle, dubse tub chon liin nagawt gu xle loya, sinka ble guya mod tub kwaan beed, kwaan nanzhaalt gaw gu, 24 per lee liin dap rese xle roo xa, nu gaka tub gon kwaan nzaa gu lo na, Xaa Tubka Nak, 25 per lee gaay liin nzhola mod gaw gu xle cheena. Snee mod xen doo kwaan mxeen gu. Na, Xaa Tubka Nak, xaa nak Xtios gu.
26 &Nagawt gu baal kwaan nzho ren leen. Nu nixa naseedt gu yé gu cho kwaan gak gwluzh nu nixa nalet gu yalwezh.
27 &Nachubt gu yich yek gu nu nixa nachoogt gu yek yich xlox gu.
28 &Nu nixa nakeet gu bde cho gu, nu nixa nakoot gu cho gu kwent cheen re xaa ngut. Na nak Xaa Tubka Nak.
29 &Nalet gu zee gak xchaap gu tub me nto cho zee nagakt beed yizhyo nu nixa nayizhet kwaan beed lo yizhyo cheen gu.
30 &Blozhaw gu zhe sab, mbizh kwaan nanket gu zhiin, nu noka wii gu respet lo li na. Na nak Xaa Tubka Nak.
31 &Nayat gu lo re xaa nzhak yalwezh xaa mbezh nzhedizh kwaan re xaa ngut; nel kayak beed gu kwent cheen re xaa ne. Na nak Xaa Tubka Nak, xaa nak Xtios gu.
32 &Bzoli gu nu le gu respet re xaa nzeb rus yek nu re xaa gol. Bzheb gu ne gu Xtios gu. Na Nak Xaa Tubka Nak.
33 &Gorna lee tub xaa zit yo lazh gu, nalet gu kwaan nawent lo xaa. 34 Sinka ble gu xaa mod tub gu, bkela gu xaa mod gu, nel noka gu ngok xaa zit gorna ngu gu yizhyo Egipto. Na, Xaa Tubka Nak, xaa nak Xtios gu.
35 &Nakadet gu lo re medid kwaan chiix gu, paro ngaya nu paro neya. 36 Nkin le xchiin gu xobex zee ne gu paro ngaya nu paro neya tub mod nali. Na nak Xaa Tubka Nak, Xtios re gu, xaa mlo gu yizhyo Egipto.
37 &Blozhaw gu ley cheen na nu ble gu rese kwaan ngunii na. Na Nak Xaa Tubka Nak.