Ley cheen mbizh kwaan gak nzhul xaa
16
Ngunii Xaa Tubka Nak lo Ches gwluzh gorna ngulo ngut rop xgann Aarón, xaa ngut gorna mbii gax lo xaa. 2 Zee nzhé Xaa Tubka Nak lo Ches:—Guzh lo wech lu Aarón, nazeebt xaa gor kwaan nzhekla xaa leen Pa Nzhul Doo, kwaan nzob naz tich ler kwaan nke lo kaj cheen trat, delant lo kaj zee nayeta xaa gorna yun na leen xkaw kwaan roo tich kaj. 3 Aarón zeeb leen li na, Pa Nzhul Doo, kwaan re kwaane: kwaan tub la ngoon yeen ma teed xaa zee zhe re jwalt cheen xaa nu gak nzhul xaa nu tub mbakxiil ma zeek xaa lo mdo. 4 Nu gak xaa xab xaa kwaan nak ler nambey kwaan wen doo nu kaan xaa xkalsonsi xaa kwaan nak ler wen doo nu sii xaa sindor lextoo xaa kwaan nak ler wen doo nu ler kwaan chal xaa yek xaa kwaan wen doo. Nel kwaane nak ler nambey, kwaane gak xaa yilo gaz xaa.
5 &Lo re xaa yezh Israel, Aarón zen chop chib, ma mach, ma teed xaa zee zhe jwalt cheen xaa nu gak nzhul xaa nu tub mbakxiil ma kwaan gak gon kwaan zeek xaa lo mdo. 6 Yilo teed xaa ngoon yeen ma che jwalt cheen xaa, zee gak nzhul xaa nu re xaa li xaa kwaan na zee kwi wen xaa kwaan na, Xaa Tubka Nak. 7 Zeera zen xaa rop chib nu zo xaa ma lo na, Xaa Tubka Nak, roo li na. 8 Zeera koo Aarón swert cheen rop chib, tub ma gak xma na, Xaa Tubka Nak, lee stub ma sela xaa lo yizhyo bizh ma zaa xaa lo Azazela. 9 Lee chib ma kwaan yizo swert ma gak cheen Xaa Tubka Nak, nak ma teed Aarón zee zhe xjwalt re xaa nu gak nzhul xaa. 10 Nu lee stub chib ma kwaan yalzo swert ma zaa xaa lo Azazel yiidno xaa ma lo na Xaa Tubka Nak zee kwi wen xaa kwaan na nu sela xaa ma naz wen yizhyo bizh lo Azazel.
11 &Zee teed Aarón ngoon yeen kwent cheen Aarón mod gon zee zhe xjwalt xaa nu gak nzhul xaa nu kix yalnaban cheen xaa nu cheen re xaa li xaa, zee kwi wen xaa kwaan na. Nu zee choog xaa yenn ma mod gon kwaan zhe xjwalt xaa. 12 Zeera zen xaa kwaan nyu yaal leen kwaan ngazhe kwaan ki lo mdo, kwaan nzo lo na, Xaa Tubka Nak, nu chop lozhya yaal kwaan chul doo nzebech kwaan ngok byog nu wee xaaya naz tich ler kwaan nke leen Pa Nzhul Doo. 13 Nu zhiib xaa yaal lo bal lo na, Xaa Tubka Nak, nu lee zhen cheen yaal saaw tich tap kwaan nzhib roo kaj cheen trat zee nayeta xaa. 14 Nu zen xaa cheep ren cheen ngoon yeen nu chuun xaaya kwaan kwen yaa xaa cho tap naz ta lad li delant lo kaj nu chuun xaa ren kwaan kwen yaa xaa tub gazh welt choya. 15 Zeera choog xaa yenn chib, ma teed xaa zee zhe jwalt cheen re xaa yezh nu gak nzhul xaa. Nu wee xaa ren cheen ma naz tich ler kwaan nke leen Pa Nzhul Doo nu chuun xaa ren leeka mod mchuun xaa ren cheen ngoon yeen cho tap cheen kaj. 16 Nu snee le nzhul xaa leen Pa Nzhul Doo, kwent cheen re kwaan beed cheen re xaa Israel nu re jwalt cheen re xaa. Nu sneeka le nzhul xaa li na, Xaa Tubka Nak.
17 &Nik tub xaa nyent mod zeeb leen li na, gorna lee Aarón ya le nzhul xaa re xaa leen Pa Nzhul Doo nu axta gorna roo xaa, kwaane nii gorna gak nzhul leeka lee xaa nu re xaa li xaa nu rese re xaa yezh Israel, 18 nu zeera le nzhul Aarón lo mdo kwaan nzo lo na, Xaa Tubka Nak, nu zen xaa cheep ren cheen ngoon yeen nu cheep ren cheen chib nu teeb xaaya cho rese xkach mdo nu dub welt choya. 19 Nu zen xaa cheep ren nu chuun xaa ren kwaan kwen yaa xaa tub gazh welt cho mdo. Nu snee le nambey xaaya, zee gak nzhula lo re kwaan beed cheen xaa Israel.
20 &Gorna lee Aarón yilo le nzhul leen li na, Xaa Tubka Nak, nu zo xaa tub chib mach ma mban lo na. 21 Nu zhiib Aarón rop yaa xaa yek chib ma mban nu yé xaa rese kwaan beed nu rese jwalt cheen xaa Israel. Nu snee lee chib wee rese jwalt cheen xaa nu xaal xaa ma lo yizhyo bizh zee zaa xaa ma lo xaa nak diizh wee ma. 22 Nu lee chib mach zee sela xaa lo yo bizh zee wee ma rese kwaan nawent, kwaan mle re xaa naz wen lo yo bizh.
23 Zeera lee Aarón ya leen li na nu koche xaa xab xaa kwaan wen doo, kwaan nzhak xaa gorna nzeb xaa leen Pa Nzhul Doo, nu baa laa xaaya. 24 Nu zeera gaz xaa leeka leen li na nu gorna yilo gak xaa xab stuba, zeera roo xaa nu zeek xaa gon cheen xaa nu zeek xaa gon zee kix xaa yalnaban cheen nu cheen re xaa yezh. 25 Nu zeek xaa ze cheen ma lo mdo zee zhe jwalt cheen xaa nu gak nzhul xaa. 26 Lee xaa kwaan msela chib mach naz lo yo bizh ma mzaa lo Azazel, zet xaa xab xaa nu gaz xaa, zeera nzho mod zeeb xaa paro mbaz re xaa.
27 &Zeera koo xaa ngoon yeen nu chib, ma mted xaa, ma kwaan mle nzhul re xaa kwaan ren kwaan mbe xaa leen Pa Nzhul Doo nu zeera zeek xaa yed cheen ma nu baal cheen ma nu xke ma zit paro mbaz re xaa. 28 Lee xaa kwaan zeek re kwaane zet xaa xab xaa nu gaz xaa zeera nzho mod zeeb xaa paro mbaz re xaa.
29 &Kwaane nak tub ley kwaan tira naluxt lo re gu; lee chii xche mbee gazhb lee re gu nzhaal kwan nu nagawt gu nik tub kwaan nu nixa naket gu zhiin, nixa re xaa ngol lo re gu nu nixa re xaa zit xaa nzho lo re gu, 30 nel mbizh zee gak nzhul gu lo re jwalt cheen gu lo na, Xaa Tubka Nak. 31 Kwaane gak tub mbizh kwaan naket gu zhiin nu kwan gu zee nagawt gu nik tub kwaan; kwaane nak tub ley kwaan tira naluxt lo re gu. 32 Lee ngwleyy xaa mkayaa yalnabeyy zo xlugar xuz xaa nu gak xaa xab xaa kwaan nak ler wen doo kwaan nambey, 33 nu le nambey xaa leen li na nu noka le nambey xaa lo mdo nu noka le nambey xaa rese ngwleyy nu rese xaa yezh xaa nzhi baa.
34 &Kwaane nak tub ley kwaan tira naluxt lo re gu. Kwaane le gu tub welt yizata liin zee zhe jwalt cheen re xaa Israel."
Nu mle Ches modxa ngunabeyy Xaa Tubka Nak.