Kwaan beed cheen xaabyi
15
Ngunii Xaa Tubka Nak lo Ches nu lo Aarón nu nzhé xaa:2 —Guzh lo re xaa Israel kwaane: Loka xaabyi xaa kwaan nkano yalyizh kwaan nroo nis cho yed cho, gak beed xaa. 3 Chelee cho yed cho xaabyi nlu nroo nis o nyaawa, kwaane nle beed yed cho xaa, nu nis kwaan nroo cho xaa nle beed re kwaane. 4 Nu noka xloon xaa kwaan nzha xaa lo, kwaan mxoya lo noka gak beed, nu noka re kwaan nzob xaa lo gak beed. 5 Nu loka xaa gal cho xloon xaa zet xaa xab xaa, nu gaz xaa per gak beed xaa axta la yalnakaw. 6 Nu loka xaa zob lo kwaan mzob xaa nroo nis cho yed cho, zet xaa xab xaa nu gaz xaa per gak beed xaa axta la yalnakaw. 7 Nu seeka xaa kwaan gal cho xaa kwaan nroo nis cho, zet xaa xab xaa nu gaz xaa per gak beed axta la yalnakaw. 8 Nu chelee xaa nroo nis cho chuk cho re xaa nzhul, zet xaa xab nu gaz xaa per gak beed xaa axta la yalnakaw. 9 Nu rese yagxil kwaan ngo xaa tich ma kwaan zob xaa kwaan nroo nis cho gak beed. 10 Nu loka cho xaa gal cho tub re kwaan nzob xaa lo xaa kwaan nroo nis cho gak beed xaa axta la yalnakaw; nu loka cho wee tub re kwaane zet xaa xab xaa nu gaz xaa per gak beed xaa axta la yalnakaw. 11 Rese xaa kwaan gal xaa nroo nis cho nu nayanagt xaa, xaa kwaan gal cho xaa nkin zet xaa xab xaa nu gaz xaa per gak beed axta la yalnakaw. 12 Chelee xaa kwaan nroo nis cho gal cho chee kwaan nak yo lee xaaya, per cheleeya naka chee kwaan nak yag zet xaaya kwaan nis.
13 Nu gorna yilo gakwen xaa nroo nis cho yed cho, zee koo xaa kwent gazh mbizh zee gak nzhul xaa. Nu zet xaa xab xaa nu gaz xaa kwaan nis xlen, zee gak nzhul xaa. 14 Nu lee mbizh xon wee xaa chop ngog o chop palom lo Xaa Tubka Nak nu zaa xaa ma lo ngwleyy. 15 Zee lee ngwleyy teed tub ma zee gak nzhul xaa nu lee stub ma gak gon kwaan zeek xaa ma lo mdo, sbaa le ngwleyy zee gak nzhul xaa mroo nis cho lo Xaa Tubka Nak.
16 Gorna lee tub xaa nchaal ngwnaa, nu zee nkin gaz xaa per gak beed xaa axta la yalnakaw. 17 Rese ler nu rese kwaan nak yed kwaan la nis kwaan nroo cho xaa cho, zet xaaya kwaan nis per gak beeda axta la yalnakaw. 18 Gorna chaal xaabyi kwaan tub ngwnaa xaa nroo nis cho, ropse xaa gaz per gak beed axta la yalnakaw.
Kwaan beed cheen ngwnaa
19 Gorna lee tub ngwnaa nded ren lextoo, gak beed me tub gazh mbizh. Nu loka cho gal cho me gak beed xaa axta la yalnakaw. 20 Nu re kwaan nzha me lo gorna nded ren lextoo me noka leeya gak beed. Nu rese kwaan nzob me lo gorna nded ren lextoo me noka leeya gak beed. 21 Nu loka cho gal cho xloon me zet xaa xab xaa, nu gaz xaa per gak beed xaa axta la yalnakaw. 22 Nu loka cho gal cho re kwaan nzob me lo, zet xaa xab xaa nu gaz xaa per gak beed xaa axta la yalnakaw. 23 Nu loka cho gal cho kwaan nzhob lo xloon me o lo yagxil kwaan nzob me lo, gak beed xaa axta la yalnakaw. 24 Nu loka cho chaal ngwnaa me kwaan nded ren lextoo, noka lee xaa yeda cho nu gak beed xaa gazh mbizh, nu noka xloon xaa kwaan nzha xaa lo gak beed.
25 Nu gorna lee tub ngwnaa nded ren lextoo zyenra mbizh lo modxa nded ren lextoo me rese mbizh zee gak beed me modxa leezha wen nded ren lextoo me. 26 Nu noka lo loon kwaan nzha me lo gorna nded ren lextoo me gak beed modxa leezha wen nded ren lextoo me, Nu rese kwaan nzob me lo gak beed modxa leezha wen nded ren lextoo me. 27 Nu loka cho gal cho re kwaan beed ne, zet xaa xab xaa nu gaz xaa, per gak beeda axta la yalnakaw. 28 Nu gorna lee me gakwen lo ren, zee koo me kwent gazh mbizh gorna yilo ngak nzhul me lo ren. 29 Nu lee mbizh xon wee me chop ngog o chop palom lo Xaa Tubka Nak nu zaa me ma lo ngwleyy. 30 Zee lee ngwleyy teed tub ma zee gak nzhul me, lee stub ma gak gon kwaan zeek xaa ma lo mdo, sbaa le ngwleyy zee gak nzhul me lo ren kwaan nded lextoo me lo Xaa Tubka Nak.
31 Snee le re gu, xaa Israel, zee bachii gu lo re kwaan beed, zee nayeta gu lo re kwaan nanzhult cheen gu, nu nalebeedt gu li na, kwaan nzob saaw lo re gu, pa nzhaal na kwaan re gu.