Yalnzhul cheen xaa kwaan nyall cho
14
Ngunii Xaa Tubka Nak lo Ches nu nzhé xaa:2 "Kwaane nak tub ley kwaan gak cheen xaa nkano yalyizh kwaan nyall cho xaa: gorna gak nzhul xaa stuba zee nzhaal luu xaa xaa lo ngwleyy. 3 Zee wee xaa ngwleyy zit paro mbaz re xaa zee wii xaa lo xaa. Nu chelee ngwleyy ne lee yalyizh kwaan nyall cho xaa ne nzak ngokwenla, 4 zee lee ngwleyy xaal xaa yaxii chop mbyin ma mban ma nzhul, nu yag sedr nu ler naxne nu tub ram yix hisopo kwent cheen xaa nkano yalyizh kwaan nyal cho xaa. 5 Zeera lee ngwleyy xaal xaa zee gut xaa tub mbyin roo tub yas yo kwaan nzho nis xlen leen; 6 zeera zen xaa yag sedr nu ler naxne nu tub ram yix hisopo nu le bsii xaaya tubka kwaan mbyin mban leen ren cheen mbyin ngut lo nis xlen. 7 Zeera chuun xaa ren tub gazh welt cho xaa kwaan gak nzhul lo yalyizh kwaan nyall cho xaa nu yé xaa: 'Ngok nzhul xaa ne'. Nu lee mbyin mban sela xaa naz wen.
8 &Lee xaa kwaan gak nzhul zet xaa xab xaa nu chub xaa rese yich dubse xaa nu gaz xaa zee lake nzhul xaa. Zeera zeeb xaa paro mbaz re xaa, per lake xaa naz jwer yoo ler cheen xaa tub gazh mbizh. 9 Lee mbizh gazh chub xaa yek xaa nu chub xaa xlox xaa nu yich tich zaalo xaa nu rese yich cho xaa nu zet xaa xab xaa nu gaz dubse xaa kwaan nis, zee lake nzhul xaa. 10 Lee mbizh xon zen xaa chop mbakxiil yeen ma wen, nu tub mbakxiil yeen ma gol, ma nzho tub liin nu ma wen; noka xoop kil arin kwaan wen doo, kwaan nak gon cheen yalgon kwaan guch kwaan nseyt nu tub part lo chon part lo tub litr nseyt. 11 Zee lee ngwleyy xaa kwaan nle nzhul xaa, wee xaa xaa lo na, Xaa Tubka Nak, xaa kwaan ngok nzhul lo yalyizh kwaan nyall cho xaa. 12 Zee lee ngwleyy zen tub mbakxiil yeen ma mach nu teed xaa ma mod gon kwaan zere xaa gorna nlewann xaa, kwaan tub part lo chon part lo tub litr nseyt nu kun xaaya mod gon kwaan nkun xaa lo na, Xaa Tubka Nak. 13 Zee choog xaa yenn mbakxiil yeen pa nambey pa nchoog xaa yenn ma kwaan nted xaa zee gak nambey xaa, nu lee ma kwaan nzek xaa tira lo mdo lee ma nak gon kwaan le zee bare xaa gak xaa mod yilo nu gon kwaan nle nzhul xaa mdo ropse kwaane nak kwaan nyalzo ngwleyy gaw xaa nel naka kwaan nambey doo.
14 &Gwluzh zeera zen ngwleyy cheep ren cheen ma kwaan nak gon kwaan zere xaa gorna nlewann xaa nu teeb xaaya lad li xan nzha xaa kwaan gak nzhul, nu kwen yaa xaa kwaan nachaa lad li nu kwen nii xaa kwaan nachaa lad li. 15 Nu sbaaka zen ngwleyy tub part lo chon part lo tub litr nseyt nu teeb xaaya lozhya xaa lad beg, 16 nu le bsii xaa kwen yaa xaa lad li kwaan nseyt kwaan nzho lozhya xaa lad beg, nu chuun xaa nseyt kwaan kwen yaa xaa tub gazh welt lo na, Xaa Tubka Nak. 17 Lee nseyt kwaan lake kwaan nzho lozhya ngwleyy, teeb xaa lad li xan nzha xaa kwaan gak nzhul nu kwen yaa xaa kwaan nachaa lad li nu kwen nii xaa kwaan nachaa lad li, leeka paro mteeb xaa ren cheen ma kwaan nak gon kwaan zere xaa gorna nlewann xaa. 18 Lee nseyt kwaan lake lozhya xaa xo xaa yek xaa kwaan gak nzhul. Snee le ngwleyy zee gak nzhul xaa lo na, Xaa Tubka nak. 19 Zeera lee ngwleyy teed ma nak gon kwaan gak nzhul xaa, zee lee xaa na beed gak nzhul ; zeera choog xaa yenn ma kwaan zeek xaa lo mdo, 20 nu zeek xaa ma lo mdo tubka kwaan gon cheen yalgon. Nu snee lee ngwleyy zee gak nzhul xaa.
21 &Chelee xaa prob xaa, nankanot xaa kwaan zi xaa ma, zee zen xaa tub mbakxiil yeen ma mach, mod gon kwaan kun xaa, lo kwaan nzere xaa gorna nle wann xaa zee kwii wen xaa kwaan na, Xaa Tubka Nak, nu chop kil arin kwaan wen doo kwaan guch kwaan nseyt, kwaan nak gon cheen yalgon nu tub part lo chon part lo tub litr nseyt, 22 nu chop ngog o chop palom, mod nzho moda lo xaa, tub ma zaa xaa zee gak nzhul xaa, lee stub ma zeek xaa lo mdo. 23 Lee mbizh xon gorna ngulo ngok nambey xaa wee xaa rese kwaane lo ngwleyy roo li na, Xaa Tubka Nak. 24 Zee lee ngwleyy zen mbakxiil yeen ma nak gon kwaan zere xaa gorna nlewann xaa nu tub part lo chon part lo tub litr nseyt nu kun xaaya mod gon kwaan nkun xaa lo na, Xaa Tubka Nak. 25 Zeera choog xaa yenn mbakxiil yeen, ma nak gon kwaan zere xaa gorna nlewann xaa, zee lee ngwleyy zen cheep ren cheen mbakxiil nu teeb xaaya lad li xan nzha xaa kwaan gak nzhul nu kwen yaa xaa kwaan nachaa lad li nu kwen nii xaa kwaan nachaa lad li. 26 Zee lee ngwleyy zhiib nseyt lozhya xaa lad beg, 27 nu kwaan kwen yaa xaa lad li chuun xaa nseyt kwaan nzho lozhya xaa lad beg gazh welt lo na Xaa Tubka Nak. 28 Zee noka ngwleyy teeb nseyt lad li xan nzha xaa kwaan gak nzhul nu kwen yaa kwaan nachaa lad li nu kwen nii xaa kwaan nachaa lad li leeka paro mteeb xaa ren cheen ma nak gon kwaan nzere xaa gorna nlewann xaa. 29 Lee nseyt kwaan lake kwaan nzho lozhya ngwleyy teeb xaa yek xaa kwaan na beed zee gak nzhul lo na, Xaa Tubka Nak. 30 Nu sbaaka teed xaa tub ngog o tub palom, loka mod nzho moda lo xaa kwaan gak nzhul. 31 Tub ma gak gon kwaan gak nzhul xaa, lee stub ma gak gon kwaan zeek xaa ma lo mdo nu kwaan gon cheen yalgon; snee lee ngwleyy zee gak nzhul xaa lo na, Xaa Tubka Nak. 32 Kwaane nak ley cheen xaa kwaan nkano yalyizh cheen yeezh kwaan nyall cho xaa, xaa nankanot kwaan zaa lo yalnzhul cheen."
Yalnzhul cheen yoo kwaan mke byop cho
33 Zee lee Xaa Tubka Nak ngunii lo Ches nu Aarón nu nzhé xaa: 34 "Gorna lee gu zeeb yizhyo Canaán, kwaan za na gak xcheen gu, chelee na le na zee kee byop cho lak yoo yezh cheen gu, 35 zee lee xaa kwaan nak cheen yoo yanii lo ngwleyy, nu yé xaa: "Nzak na ke byop cho li na. 36 Zee lee ngwleyy gorna zeraka zeeb xaa leen yoo, nabeyy xaa zee koo xaa rese kwaan nzho leen yoo, zee nagakt beed rese kwaan nzho leena. Zeera zeeb ngwleyy wii leena. 37 Zee wii xaa lo kwaan mke byop nu cheleeya nlu kwaan nke byop cho yoo lo xaa, kwaan na naye o kwaan naxne, kwaan nech nzho cho yoo, 38 zee lee ngwleyy roo leen yoo nu saaw xaa roo yoo dubse tub gazh mbizh. 39 Lee mbizh gazh lee ngwleyy yasewii. Zee ne che nlu nzhekera byop cho yoo, 40 zee nabeyy ngwleyy zee yakiib xaa re ke kwaan mke byop cho yoo nu yalabi xaaya zit roo yezh tub pa beed. 41 Zee noka nabeyy xaa re xaa zee koo xaa re ban kwaan nke cho bla cheen yoo nu lee kwaan koo xaa yalabi xaa zit roo yezh tub pa beed. 42 Zeera zen xaa stub naz ke nu zhiib xaaya paro mkiib xaa re ke yilo nu ban kub zee kobde xaa yoo.
43 &Nu Chelee cho yoo mbare mke byop stuba gwluzh gorna ngulo mzuub xaa cho ke nu gorna ngulo mchezhe xaa choya stuba, 44 zee lee ngwleyy zeeb yasewii; nu cheleeya seetaka nzhekera byop choya beeda. 45 Kwaanzee nzhaal luux xaa yoo nu re ke cheena nu re yag nu rese kwaan nak cheena nzhaal yalabi xaa zit roo yezh tub pa beed. 46 Loka xaa zeeb leen yoo rese mbizh kwaan ngunabeyy xaa leeya yaaw, xaa ne gak beed axta la yalnakaw. 47 Lee xaa kwaan gaa leen yoo zee, zet xaa xab xaa; noka xaa kwaan gaw leen yoo zee zet xaa xab xaa.
48 &Per chelee ngwleyy zeeb wii nu namketra byopa, gorna ngulola mdexkwaaya zee lee ngwleyy yé: 'Ngulola ngok nzhul yoo".nu naketra byop choya. 49 Zee zen xaa chop mbyin nu yag sedr, ler naxne nu tub ram yix hisopo, zee le nzhul xaa yoo; 50 zee gut xaa tub mbyin roo tub yas yo kwaan nzho nis xlen leen. 51 Zeera zen xaa yag sedr, tub ram yix hisopo, ler naxne nu mbyin mban nu le bsii xaaya kwaan ren cheen mbyin ngut nu kwaan nis xlen nu chuun xaaya tub gazh welt cho yoo. 52 Nu snee le nzhul xaa yoo kwaan ren cheen mbyin nu kwaan nis xlen nu kwaan mbyin mban, yag sedr nu tub ram yix hisopo nu ler naxne. 53 Zeera sela xaa mbyin mban naz wen. Snee le nzhul xaa yoo zee lake nzhula.