Ley cheen yeezh kwaan nyall cho xaa
13
Ngunii Xaa Tubka Nak lo Ches nu lo Aarón, nu nzhé xaa:2 "Gorna lee tub xaa nzeki cho o nzhiib tub yeezh cho xaa o zhiib kwaan rus cho xaa, nkin wee xaa xaa lo ngwleyy Aarón o lo tub lo re xgann xaa. 3 Lee ngwleyy wii nel cho yeezha, chelee yich kwaan nzeeb lo yeezh nguna rus nu nzha reepa leen baal, telise naka yeezh kwaan nyall cho xaa. Nu gorna ne ngwleyy nel cho yeezh nzeb cho xaa, gorzee yé xaa xaa beed xaa.
4 &Chelee yeezh kwaan nzho lo baal na rus, nu nanzhareepta leen baal, nu nixa yich nanzhanat rus, zee lee ngwleyy sebyoo xaa tub gazh mbizh. 5 Gorna yilo yixoob gazh mbizh zee wii xaa stuba zee nel xomod nzhaka nu cheleeya seetaka nluya, zeera sebyoo xaa xaa stub gazh mbizh. 6 Yilo yixoob gazh mbizh stuba zee wii xaa nel xomod nzhaka, cheleeya nzhayetloya nu nanzhaxonnta lo baal, zee lee ngwleyy yé nzhul ngok xaa ne, sbaasa nak tub yeezh kwaan mzhib lo baal. Zee lee xaa ngok ne, zet xaa xab xaa zee gak nzhul xaa. 7 Per chelee kwaan mzhiib lo baal seetaka nzhaxonn gorna ngulo mwii ngwleyy loya, nu nzhéla xaa lee xaa ngok nzhul, kwaanzee nkin ya xaa lo ngwleyy stub welt zee wii xaa lo yeezh stuba. 8 Kwaanzee gorna wii ngwleyy lo xaa, nu ne xaa lee yeezh nzhaxonn dubse cho xaa, zee yé ngwleyy: 'Beed xaa, nkano xaa yeezh kwaan nyall cho xaa'.
9 &Gorna lee tub xaa nkano yeezh kwaan nyall cho xaa, nkin wee xaa xaa lo ngwleyy. 10 Zee wii ngwleyy lo xaa, chelee kwaan nzeki lo baal na rus, nu mleya zee nguna rus yich nu cheleeya nyun baal mban kwaan nzeki, 11 zee naka yeezh kwaan nyall cho xaa kwaan nayakwentra. Zee lee ngwleyy yé: 'Beed xaa'. Nu nankintra sebyoo xaa xaa, nu ngok beed xaa.
12 &Nu chelee yeezh kwaan nyall cho xaa liger doo mxen dubse nii xaa nu axta yek xaa, axta paro le ngwleyy gan yun a lo xaa, 13 zee lee ngwleyy wii lo xaa; zee nel che dub cho xaa ngulo mzhaal yeezh, zee lee ngwleyy yé: 'Nzhul xaa'. Nel lee yeezh kwaan nyal cho xaa nguna rus nu lee xaa ne ngok nzhul. 14 Per mbizh kwaan yun kwaane cho baal cheen xaa kwaan mban gak beed xaa. 15 Zee lee ngwleyy wii nel che yun baal cho xaa nu yé xaa: 'Beed xaa'. Nel nyun baal leen yeezh. Nel yeezh kwaan nyall cho xaa nkano xaa beed xaa'.
16 &Per chelee baal cheen xaa kwaan mban nyun na rus, zee ya lo ngwleyy, 17 zee wii xaa cho xaa, chelee ngwleyy ngune leeya na rus, zee yé xaa: 'Ngok nzhul xaa'.
18 &Gorna lee tub xaa mkano tub yeezh, nu gakwen xaa 19 nu cho xaa pa mlen yeezh mlake kwaan nzeki nu rus naya, o naxne naya, nkin ya xaa lo ngwleyy. 20 Chelee ngwleyy wii lo kwaan nzho len yezh cho xaa, nu lee yich nguna rus, zee yé xaa: 'Beed xaa'. Nel kwaan nkano xaa nak yeezh kwaan nyall cho xaa. 21 Per cheleeya pa mlen yeezh nangunat yich rus nu nixa nanzhota axta leen baal, sinka nzheyak wena, zee sebyoo xaa xaa tub gazh mbizh. 22 Cheleeya seetaka nzhaxonna leen baal, zee lee ngwleyy yé: 'Beed xaa'. Nel nkano xaa yeezh kwaan nyall cho xaa. 23 Per chelee yeezh rus mlake nebse paro mlena, nu nebse mlake bde cheen yeezh, zee lee ngwleyy yé: Nzhul nak xaa'.
24 &Cheleeya nzho tub xaa zhoog cho nu zhiib yeezh rus loya o naxne, 25 zee lee ngwleyy wii lo xaa. Chelee yich kwaan nzeeb loya na rus nu lee kwaan nawent na nzho axta leen baal, kwaanzee pa mzhoog mle yeezh kwaan nyall cho xaa; zee lee ngwleyy yé: 'Beed xaa'. Nel yeezh kwaan nyall cho xaa nkano xaa. 26 Cheleeya gorna yilo wii ngwleyy loya nu nyent yich rus loya, nu nixa nanzhota leen baal nu nzhaluxa, zee lee ngwleyy sebyoo xaa tub gazh mbizh. 27 Yilo yixoob gazh mbizh zee lee ngwleyy wii loya, chelee kwaan nawent nzhaxonn leen baal, zee yé xaa: 'Beed xaa'. Nel nkano xaa yeezh kwaan nyall cho xaa. 28 Per chelee kwaan nawent seetaka nzho loya nu nanzhaxonnta leen baal, nu nzhaluxa, zee naka nebse bde cheen kwaan mzhoog. Zee lee ngwleyy yé: 'Ngok nzhul xaa'. Nel nebse bde mke pa mzhoog.
29 &Gorna lee tub xaabyi o tub ngwnaa nkano yeezh yek o xanchii, 30 zee lee ngwleyy wii lo yeezh. Cheleeya tira nzhoya leen baal nu nzeb yich nayech loya nu cheepse yich, zee lee ngwleyy yé: 'Beed xaa'. Nel nkano xaa yeezh kwaan nzoxbab kwaan nyall yek xaa o xanchii xaa. 31 Per chelee ngwleyy wii lee yeezh kwaan nzob yek xaa kwaan nzoxbab nanzhota leen baal nixa nanzebt yich nagaas loya, zee sebyoo xaa xaa gazh mbizh. 32 Gorna yilo yixoob gazh mbizh, lee ngwleyy wii lo yeezh cheen xaa stuba, cheleeya nanzhaxonnta, nixa nyent yich nayech loya, nixa nanzhareepta leen baal, 33 zee lee ngwleyy nabeyy xaa ne zee yachub xaa yek xaa per nachubt xaa pa nzeb yeezh nu sebyoo xaa xaa stub gazh mbizh. 34 Yilo yixoob stub gazh mbizh zee lee ngwleyy wii lo yeezh kwaan nzoxbab, nu chelee kwaan nzoxbab nanzhareept leen baal, zee lee ngwleyy yé: 'Nzhul xaa'. Zee zet xaa xab xaa, zee gak nzhul xaa. 35 Per chelee yeezh kwaan nzoxbab nzhaxonn lo baal, gwluzh gorna ngulo ngok nzhul xaa, 36 zee lee ngwleyy wii lo xaa ne stuba. Chelee yeezh kwaan nzoxbab nzhaxonn lo baal nu ngulo nguna nayech yich yek xaa, ngok Beed xaa. 37 Per chelee xaa nzak xaa nanzhaxonnt yeezh kwaan nzoxbab yek xaa, nu mzhib yich nagaasa, nel ngokwena nu lee xaa ne ngok nzhul. Zee lee ngwleyy yé: 'Nzhul nak xaa'.
38 &Nu gorna lee xaabyi o ngwnaa nkano zyen doo kwaan rus lo baal cho xaa, 39 zee wii ngwleyy lo baal cho xaa. Cheleeya luu kwaan rus lo xaa nu kwaan nagaas cheep naka nebse tub kwaan mzhiib lo baal, cheleeya nebse sbaaya, nzhul nak xaa.
40 &Chelee tub xaabyi gab yich yek nu lake yed yek xaa, nzhul xaa zee. 41 Nu cheleeya yich lachuzh xaa gab nu lakeya neb yed, noka nzhul xaa zee. 42 Per cheleeya nzho kwaan rus o naxne lo pa neb yed na, chol naz yek xaa o naz lachuzh xaaya, yeezh kwaan nyall kazhiiba. 43 Zee lee ngwleyy wii lo xaa chelee paro yed na nzeki nu na rus nu naxne, mod na yeezh kwaan nyall cho xaa, 44 zee lee ngwleyy yé: 'Beed xaa'. Nel nyal yeezh kwaan nzeb yek xaa'.
45 &Xaa kwaan nkano yeezh kwaan nyall cho xaa nkin gak xaa ler kwaan mraz cho nu laa xaa yich yek xaa, nu saaw xaa cheep garlo xaa nu kozhe xaa nu yé xaa: '¡Beed na! ¡Beed na!' 46 Nu gorna nkano xaa yeezh ne nak xaa xaa beed; nkin yo techo xaa naz jwer pa mbaz re xaa.
Ley cheen kwaan mke byop
47 &Gorna lee ler kwaan nak yich led mbakxiil o kwaan nak ler wen doo, 48 o yil, o re kwaan nak yed, 49 nu cheleeya ke byopa zee na nayeya o naxneya, cho ler o cho yed o cho re yil, zee nzhaal yalu xaaya lo ngwleyy. 50 Zee lee ngwleyy wii loya, nu kozhaw xaaya tub gazh mbizh. 51 Nu gorna yixoob gazh mbizh zee wii xaa loya, zee nel che nzhaxonna lo yil cheen ler o lo stub kwaan nak yed, nu cheleeya nzhaxonna, zee mke byop kwaan nakapa: zee leeya gak beed. 52 Zeek xaa dubse ler zee, kwaan nak yil, o ler kwaan nak yich led mbakxiil o ler kwaan wen doo o kwaan nak yed, nel mke byopa; nkin yeka lo ki. 53 Per chelee ngwleyy ngulo mwii xaa loya nu nanzhaket byop cho re yil, o cho re ler o cho re kwaan nak yed, 54 zee lee ngwleyy nabeyy zee yazet xaaya nu kozhaw xaaya stub gazh mbizh.
55 &Gorna yilo koo xaaya, zee lee ngwleyy wii loya, nu chelee xaa ne xaa lal nzhaka nixa nanzhakeet byopa. Ngok beeda zee zhaal zeek xaaya lo ki, nel mkee byop naz leena o naz ticha. 56 Per gorna yilo yeta, chelee ngwleyy wii leeya nguna mor, zee choog xaa cho ler o yed o re yil. 57 Per cheleeya nyuna cho ler stuba nu cho re yil o cho re kwaan nak yed nu nzhake byopa stuba zee zeek xaaya lo ki nel mkee byopa. 58 Per chelee ler nu re yil o re kwaan nak yed zet xaaya nu yiib re kwaan mke byop choya, zee bare xaa zet xaaya stuba, zee gak nzhula."
59 Kwaane nak ley leezha kee byop cho ler kwaan nak yich led mbakxiil o ler kwaan wen doo nu re yil o re kwaan nak yed zee yé ngwleyy beeda o nzhula.