Ma nzhul nu ma beed
11
Xaa Tubka Nak ngunii lo Ches nu lo Aarón nu nzhé xaa:2 —Guzh lo re xaa Israel: "Re ma ne nzho mod gaw gu lo re ma kwaan nzho lo yizhyo, 3 re ma kwaan nzoog laaw nu re ma kwaan nzoxal nzhog nii. 4 Per nanzhaalt gaw gu re ma kwenta ma ne, nixa nzoog ma laaw ma per nanzoxalt nzhog nii ma:
&Kamey, nzoog ma laaw ma per nanzoxalt nzhog nii ma. Nak ma ma beed lo gu.
5 &Konej leen ke, nzoog ma laaw ma per nanzoxalt nzhog nii ma. Nak ma ma beed lo gu.
6 &Mlan, nzoog ma laaw ma per nanzoxalt nzhog nii ma. Nak ma ma beed lo gu.
7 &Kuch, nzoxal nzhog nii ma per nanzoogt ma laaw ma. Nak ma ma beed lo gu .
8 &Nanzhaalt gaw gu baal cheen re ma ne, nu nixa nanzhaalt gal gu cho re ma ngut. Nel nak ma ma beed lo gu.
9 &Nu re ma kwaan nzho leen nis, ma nzho leen nistoo o ma nzho leen yuu, nebse ma nzho mod gaw gu nak ma nzob xiil nu nke med tich. 10 Per lee re ma kwaan nankanot xiil nu nanket med tich nak ma ma beed lo gu, nixa nak ma ma nzho leen nistoo o leen yuu, nexa chol naro ma o chuut ma. 11 Nanzhaalt gaw gu baal cheen ma; nu nixa nanzhaalt gal gu cho re ma ngut, nel nak ma ma beed lo gu. 12 Rese ma kwaan nzho leen nis ma kwaan nankanot xiil nu nyent med tich, nak ma ma beed lo gu.
13 &Re mbyin ma kwaan nanzhaalt gaw gu, nak re ma ne, ma nak beed lo gu: msi, ngolbech, msi ma nzhaw mbal, 14 nu msi ma nzhaw nged nu reta lo msi ma nzhaw ma, 15 nu reta lo nga, 16 avestruz, kox, gaviota, nu reta lo msi, 17 mdid, cormorán, ibis, 18 calamón, pelícano, msi doo, 19 cigüeña nu rese lo myuz, abubilla, nu ngezin.
20 &Nu rese ma chuut, ma nzobi nu ma nze, nak ma beed lo gu, 21 Nzho mod gaw gu re ma nzobi nu ma nze, re ma nkano nii nkee briink. 22 Ma kwaan nzho mod gaw gu nak re ma ne: reta lo mbeso, xtyan, mbeso ndok, nu nril. 23 Per lee stub naz ma chuut kwaan nzobi nu ma nze nak ma ma beed lo gu.
24 &Kwaane nle beed xaa:
&Loka xaa gal cho tub re ma ngut, noka lee xaa gak beed axta yilo la yalnakaw.
25 &Nu loka xaa lep tub re ma ngut, nzhaal zet xaa xab xaa per gak beed xaa axta la yalnakaw.
26 &Rese ma kwaan tubka nak nzhog nii, nu nazoogt ma laaw ma, nu loka xaa gal cho ma noka lee xaa gak beed xaa.
27 &Nu ma kwaan nze kwaan lozhya ma nkano nii nu yaa ; nu loka xaa gal cho tub re ma ngut, noka lee xaa gak beed axta la yalnakaw 28 Nu leeka sbaa xaa kwaan lep tub re ma ne, ma ngut, nzhaal zet xaa xab xaa per gak beed xaa axta la yalnakaw, nel beed nak ma.
29 &Nu re ma ne kano gu mod ma beed, ma kwaan nze lextoo lo yo, mbey, mzin, nu sap, nu rese ma kwaan nze lextoo lo yo, 30 kwij, kokodrilo, wech, xambiil nu ngeden.
31 &Nu lo rese ma ne, nak ma beed lo gu. Nu loka cho gal cho tub re ma ngut ne, noka lee xaa gak beed axta la yalnakaw.
32 &Nu loka cho tub re ma ne, ma ngut kwaan la cho tub kwaan nak yag, ler, yed, sak o loka kwaan nle xchiin xaa nke xaa zhiin, nzhaal cheep xaaya leen nis, per gaka kwaan beed axta la yalnakaw; zeera gak nzhula stuba. 33 Nu chelee tub re ma ngut ne la leen tub yas yo, rese kwaan nzho leena gak beed zee lee xaa yas ne. 34 Nu rese kwaan nzhaw xaa kwaan mchuun nis kwaan nzho leen yas cho, noka leeya gak beed, nu rese nis kwaan nzho leena noka gak beed. 35 Nu rese ma ngut kwaan la cho tub kwaan gak beed; chol naka gor o garde, nkin luux xaaya nel naka tub kwaan beed lo gu. Nu sbaa nzhaal le guya. 36 Nebse xlen o pa ngozhaw gu nal nis, nebse kwaan baa lake nzhul. Per lee xaa kwaan gal cho ma ngut gak beed xaa. 37 Nu chelee tub re ma ngut la cho bizh kwaan xeen xaa lo yo seetaka gaka kwaan nzhul; 38 per cheleeya bizh ngulola ngok bsiiya nu la ma ngut choya, ngulola ngok beeda. 39 Nu cheleeya tub ma kwaan nzho mod gaw gu yet, xaa kwaan gal cho ma noka lee xaa gak beed axta la yalnakaw; 40 nu xaa kwaan gaw baal cheen ma ngut, nzhaal zet xaa xab xaa per gak beed xaa axta la yalnakaw; nu seeka xaa kwaan koo ma ngut, noka lee xaa zet xab per noka xaa gak beed axta la yalnakaw.
41 &Nu nagawt gu nik tub re ma kwaan nze lextoo lo yo; nel nak ma ma beed.
42 &Nik tub re ma kwaan nze lextoo lo yo, nagawt gu chol naka ma kwaan ngobxex lextoo lo yo o ma kwaan nkano tap nii o ma nkano zyen nii, nel nak ma ma beed lo gu. 43 Nu gak beed gu gu kwaan re ma ne, ma beed kwaan nze lextoo lo yo, 44 nel na nak Xaa Tubka Nak, xaa nak Xtios gu. Gok nambey gu, nel nambey nak na. Nu nalebeedt gu gu kwaan tub re ma kwaan nze lextoo lo yo. 45 Na nak Xaa Tubka Nak xaa kwaan mloo gu yizhyo Egipto zee gak na Xtios gu. Gok gu xaa nambey, nel na nak xaa nambey.