Jwalt Cheen Nadab nu Abiú
10
Nadab nu Abiú xgann Aarón, mzen kwaan nyu yaal leen, nu mlo xaa ki nu yaal leena, nu mzek xaa yaal tub mod nanzhaalt le xaa lo Xaa Tubka Nak, kwaan nanzhét xaa lo xaa le xaa. 2 Zee mroo tub bal paro nzo Xaa Tubka Nak, zee mzeka rop xaa, zee ngut rop xaa roo lach li xaa. 3 Zee lee Ches nzhé lo Aarón:—Kwaane nzhé Xaa Tubka Nak:
"Loka xaa bii gax lo na lu na yalnambeyy cheen na lo xaa,
nu lo rese xaa Israel lu na lee na non doo nak."
Zee lee Aarón zheta ngok.
4 Zee mrezh Ches Misael nu Elzafán, xgann Uziel, xaa nak xich Aarón, nu nzhé xaa lo xaa:
—Te gu zee koo gu rop sawlizh gu xaa ngut leen li Xaa Tubka Nak nu be gu xaa naz jwer roo yezh, pa mbaz re xaa.
5 Zee mbii gax rop xaa, nu kwaan leeka xab xaa mchal xaa rop xaa ngut nu mbe xaa xaa naz jwer roo yezh pa mbaz re xaa, mod ngunabeyy Ches. 6 Zee lee Ches nzhé lo Aarón nu lo xgann xaa Eleazar nu Itamar:
—Nanzhaalt zobrech yich yek gu nixa nachazt gu xab gu, kwaan nlu lee gu nales doo nzhak, zee nayeta gu, napa lee yalnayii cheen Xaa Tubka Nak la tich rese xaa yezh. Per lee re sawlizh gu, xaa Israel, nales doo gon lo rop xaa ngut lo bal kwaan mxaal xaa. 7 Nixa nabachit gu roo li Xaa Tubka Nak, zee nayeta gu, nel lee gu ngulola ngok nambey kwaan nseyt cheen xaa.
Zee mle re xaa modxa ngunabeyy Ches.
8 Zee lee Xaa Tubka Nak ngunii lo Aarón nu nzhé xaa:
9 —Nixa lu, nixa xgann lu nanzhaalt go xis ub nu nzoo gorna zeeb gu leen li na, Xaa Tubka Nak, napa lee gu kayet. Nel kwaane nak tub ley kwaan naluxt lo rese xtii gu. 10 Zee nzho mod labeyy gu kwaan nambey lo re kwaan sbaasa, kwaan nzhul nu kwaan nanzhult. 11 Zee nzho mod luu gu lo rese xaa Israel rese ley kwaan mza na, Xaa Tubka Nak, lo Ches.
12 Zee nzhé Ches lo Aarón lo Eleazar nu lo Itamar, rop xgann Aarón, xaa kwaan mlake lo xaa:
—Bzen gu gon cheen yalgon kwaan mlake kwaan mzek gu lo Xaa Tubka Nak, nu daw guya paro nzo mdo, per nakot gu lebadur leena, nel leeya nak tub kwaan nambey. 13 Nu gaw guya tub pa nambey, nel leeya nak kwaan ngolzo re xgann gu, gon kwaan mzaa gu lo Xaa Tubka Nak, nel kwaane ngunabeyy xaa. 14 Nu laz ma, kwaan nak gon kwaan kun xaa, nu kor ma, kwaan zaa gu, nzhaal gaw guya tub pa nzhul. Nzho mod gaw luya nu re xgann lu nu re xchaap lu, nel kwaane nak gon zee kwi wen xaa Israel kwaan lee xaa, nu gu yalzoya. 15 Lee kor ma nu laz ma kwaan mkun gu lo mdo , Xaa Tubka Nak, yalzo gu, nu ze cheen ma zeek gu lo ki. Nel kwaane nyalzo lu nu xgann lu, Nel kwaane nak tub ley kwaan tira lo re xaa Israel modxa ngunabeyy na.
16 Zee lee Ches ngunabdizh chib ma mted xaa, zee zhe re jwalt cheen xaa nu gak nzhul xaa, per leezha mbin xaa ngulola mzek re xaa dub ma, zee ngunayii xaa lo Eleazar nu lo Itamar, rop xgann Aarón xaa mlake lo Aarón, nu nzhé xaa lo xaa:
17 —¿Chozhiin nandawt gu gon kwaan le nambey gu tub pa nambey? Nel leeya nak kwaan nambey, nel lee Xaa Tubka Nak mzaa lo gu le gu kwaane, zee zhe jwalt cheen xaa nu kix xaa yalnaban kwent cheen re xaa yezh. 18 Ne na nambet gu ren cheen ma leen li Xaa Tubka Nak, kwaanzee nzhaal gaw gu gon roo li xaa, modxa ngunabeyy na.
19 Zee lee Aarón mkeb lo Ches nu nzhé xaa:
—Wii, nalzhe mbe xgaan na ma lo Xaa Tubka Nak, tub ma mzek xaa tira nu stub ma mzaa xaa zee zhe re jwalt cheen xaa nu gak nzhul xaa. ¿Chol ngaw naya nanyulat Xaa Tubka Naka?
20 Gorna mbin Ches kwaan nzhé Aarón, mzeyal xaa mbin xaaya.