Mzelo ngwleyy Aarón mted ma
9
Mbizh xon Ches mrezh Aarón nu re xgann xaa, nu re xaa gol xaa Israel. 2 Nu nzhé xaa lo Aarón: "Bzen tub ngoon yeen ma gak gon zhe re jwalt cheen xaa nu gak nzhul xaa nu tub mbakxiil ma wen, ma gak gon kwaan zeek xaa lo mdo, nu bzaa ma lo Xaa Tubka Nak. 3 Nu lo re xaa Israel yé lu zee zaa xaa tub chib ma gak gon kwaan zhe re jwalt cheen xaa nu gak nzhul xaa, tub ngoon yeen nu tub mbakxiil yeen ma nzho tub liin, ma wen, ma gak gon kwaan zeek xaa lo mdo, 4 tub ngoon yeen nu tub mbakxiil gut xaa lo Xaa Tubka Nak zee kwi wen xaa kwaan le xaa. Nu noka yaadno xaa gon kwaan nak cheen yalgon kwaan nzho nseyt leen, nel nal zhe luu xaa lo be ."5 Nu mbe re xaa Israel kwaan ngunabeyy Ches, axta roo li xaa. Nu rese xaa yezh mbii gax nu zheta mzo li re xaa lo Xaa Tubka Nak. 6 Zee lee Ches nzhé: "Kwaane nak kwaan ngunabeyy Xaa Tubka Nak. Ble guya zee lee Xaa Tubka luu lo be mod tub xni naro doo."
7 Zeera nzhé Ches lo Aarón: "Bii gax lo mdo, nu teed tub ma zee zhe re jwalt cheen xaa nu gak nzhul xaa nu tub ma kwaan gak gon kwaan zeek lu lo mdo. kwaan kix lu kwent cheen yalnaban cheen lu nu kwent cheen yalnaban cheen re xaa yezh mod ngunabeyy Xaa Tubka Nak.
8 Nu zee lee Aarón mbii gax lo mdo nu mted xaa tub ngoon yeen zee zhe re jwalt cheen xaa nu nzhul xaa . 9 Zeera mzaa re xgann xaa ren lo xaa, nu kwaan kwen yaa xaa mzen xaa ren nu mteeb xaaya yek rese xkach mdo nu lee ren kwaan mlake mxo xaa xan mdo. 10 Zeera mzek xaa re ze lo mdo; nu xrinyon ma nu re ze kwaan ke cho lextoo yix ma kwaan nak gon kwaan zhe re jwalt cheen xaa nu gak nzhul xaa, mod ngunabeyy Xaa Tubka Nak Ches. 11 Per lee baal nu yed cheen ma mzek xaa naz jwer pa mbaz re xaa.
12 Aarón mchoog yenn ma kwaan nak gon kwaan zeek xaa ma lo mdo nu lee re xgann xaa mzaa ren lo xaa, nu lee xaa mxo ren dub welt cho mdo. 13 Zeera lee re xgann xaa mbe gon kwaan tira zeek xaa lo mdo, yek ma nu re baal kwaan mle byog xaa kwaan nak gon, nu lee Aarón mzeka ma lo mdo. 14 Zeera mzet xaa xtrip ma nu kor ma, zee mzek xaa dub ma lo mdo.
15 Zeera mzaa Aarón gon kwaan nak kwent cheen re xaa Israel. Mzen xaa chib, ma kwaan nak gon kwaan zhe re jwalt cheen xaa nu gak nzhul xaa, nu mchoog xaa yenn ma, leeka mod mle xaa kwaan yilo. 16 Gorna mted xaa gon kwaan nzek xaa ma lo mdo, mle xaaya mod zhaal le xaaya. 17 Zeera mzaa xaa gon cheen yalgon, kwaan mzen xaa tub lozhya xaa nu mzek xaaya lo mdo tubka kwaan gon kwaan nzek xaa ma lo mdo, kwaan nzek xaa garziil.
18 Aarón mchoog yenn ngoon nu mbakxiil, ma kwaan mzaa re xaa Israel, ma nak gon kwaan kwi wen xaa. Nu lee re xgann xaa mzaa ren lo xaa, nu lee xaa mxo ren dub welt cho mdo. 19 Zeera mzaa xaa ze cheen ngoon nu cheen mbakxiil, xwann ma, ze cheen xtrip ma, rop xrinyon ma nu kwaan nke cho lextoo yix ma. 20 Nu mzhib xaa ze lo laz ma. Zeera mzen Aarón ze nu mzek xaaya lo mdo. 21 Per lee laz ma nu kor ma lad li mkun xaaya lo Xaa Tubka Nak, mod ngunabeyy xaa lo Ches.
22 Nu Aarón mlep xaa yaa xaa lo rese xaa Israel nu ngunii wen xaa lo xaa, gorna ngulo mzaa xaa gon kwaan zhe re jwalt cheen xaa nu gak nzhul xaa, nu gon kwaan nzek xaa ma lo mdo, nu gon kwaan kwi wen xaa. 23 Ches nu Aarón mreep leen li Xaa Tubka Nak, nu gorna mroo xaa ngunii wen xaa lo re xaa yezh. Zee mlu lo re xaa yezh tub xni naro doo. 24 Mroo bal paro nzo Xaa Tubka Nak nu mzeka rese ma kwaan yek nu rese ze kwaan nzhob lo mdo. Gorna ngune re xaa kwaane, rese xaa yezh mbill kwaan yalnix nu mkichxub xaa nu axta mla lachuzh xaa lo yo.