Mkayaa Aarón nu re xgann xaa yalnabeyy gak xaa ngwleyy
8
Ngunii Xaa Tubka Nak lo Ches nu nzhé xaa: 2 "Brezh Aarón nu re xgann xaa nu noka bzen xab xaa, nu nseyt kwaan nle nzhul xaa, nu ngoon yeen ma teed xaa zee gak nzhul xaa, nu rop mbakxiil nu chekwid cheen yat kwaan nanyut lebadur leen, 3 nu noka bkasa rese xaa yezh roo li na, Xaa Tubka Nak".4 Nu mle Ches modxa ngunabeyy Xaa Tubka Nak, nu mkasa xaa rese xaa yezh. 5 Zee nzhé Ches lo rese xaa yezh: "Kwaane ngunabeyy, Xaa Tubka Nak, le re be".
6 Zee lee Ches ngunabeyy zee ngwa Aarón nu re xgann xaa, nu msegaz xaa xaa kwaan nis. 7 Zee msegak xaa xab ngwleyy Aarón nu msii xaa sindor lextoo xaa; zeera mzhib xaa ler noll ler sul, nu ticha mzhib xaa kwaan nzhak mod mandil, nu mkado xaaya kwaan sindor kwaan nzob cho mandil. 8 Zeera mkee xaa kwaan laz xab xaa, nu naz leena mkee xaa Urim nu Tumima. 9 Noka mchal xaa ler yek xaa nu lachuzh xaa nu tich ler kwaan mral yek xaa mkee xaa tub lee lam kwaan nak or, kwaan nambey modxa ngunabeyy, Xaa Tubka Nak lo Ches.
10 Zeera mzen Ches nseyt kwaan nle nambey xaa, nu mteeb xaaya cho li Xaa Tubka Nak, nu rese kwaan nzho leena, mle nambey xaa. 11 Nu zeera mchuun xaa nseyt tub gazh welt cho mdo, nu cho re kwaan nle xchinn xaa loya, nu cho chee kwaan nyanag xaa leen nu kwaan nzhiba lo. Sbaa mle nambey xaa reya.
12 Zeera lee Ches mchuun nseyt kwaan le nambey xaa yek Aarón, zee gak nambey xaa mod ngwleyy. 13 Zeera ngunabeyy Ches zee ngwa re xgann Aarón zee msegak xaa xab xaa, nu msii xaa sindor leen xaa nu mchal ler yek xaa, modxa ngunabeyy Xaa Tubka Nak lo Ches.
14 Zeera ngunabeyy Ches zee nguxii xaa ngoon yeen ma teed xaa zee gak nzhul xaa. Aarón nu re xgann xaa mzhib yaa yek ngoon yeen. 15 Zee lee Ches mchoog yenn ma, nu mzen xaa ren cheen ma kwaan kwen yaa xaa nu mteeb xaaya cho rese xkach mdo zee ngok nzhula nu dubse cho mdo, zee gak nambeya.
16 Zeera lee Ches mkiib ze kwaan nke cho xtrip ma, nu kwaan nke cho lextoo yix ma, nu ze kwaan nke cho rop xrinyon ma, nu mzek xaaya lo mdo. 17 Per lee baal cheen ngoon yeen , nu yed cheen ma, nu xke ma mzek xaa lo ki naz jwer roo yezh paro mbaz re xaa, modxa ngunabeyy Xaa Tubka Nak lo Ches.
18 Zeera ngunabeyy Ches zee yaxii xaa mbakxiil ma zeek xaa lo mdo. Zee lee Aarón nu re xgann xaa mzhib yaa yek ma. 19 Zee lee Ches mchoog yenn ma nu mchuun xaa ren cheen ma dub welt cho mdo. 20 Zee lee Ches, mle byog ma nu mzek xaa yek ma lo ki nu re kwaan ngok byog nu xze ma. 21 Zeera lee Ches mzet xtrip ma nu kor ma kwaan nis, nu mzek xaa rese lo mdo, mod gon kwaan chul doo nzebech modxa ngunabeyy Xaa Tubka Nak lo Ches.
22 Gwluzh zeera ngunabeyy Ches zee nguxii xaa stub mbakxiil, ma teed xaa zee kayaa xaa yalnabeyy mod ngwleyy. Aarón nu re xgann xaa mzhib yaa yek ma. 23 Zee lee Ches mchoog yenn ma. Nu mzen cheep ren cheen ma, zee mteeb xaaya lad li xan nzha Aarón, nu kwen yaa xaa kwaan nachaa lad li, nu kwen nii xaa kwaan nachaa lad li. 24 Zee lee Ches ngunabeyy zee ngwa re xgann Aarón, nu mteeb xaa ren lad li xan nzha xaa, nu kwen yaa xaa kwaan nachaa lad li, nu kwen nii xaa kwaan nachaa lad li.
25 Zeera mkiib Ches, ze nu xwann ma nu rese ze kwaan nke cho xtrip ma, nu ze kwaan nke cho lextoo yix ma, nu rop xrinyon ma, nu kor ma lad li. 26 Nu mzen xaa yat kwaan nzho leen chekwid, kwaan nanyut lebadur leen, kwaan nzo lo Xaa Tubka Nak. Ches mzen yat kwaan myeex leen gor, kwaan nanyut lebadur leen, nu kwaan nuch kwaan nseyt, nu mzen xaa gayet nu tubka mzhib xaaya kwaan ze nu kor ma lad li. 27 Nu zeera mzhib xaa rese lozhya Aarón nu lozhya re xgann xaa, kwaan mkun xaa lo mdo lo Xaa Tubka Nak. 28 Zeera mzen Ches kwaan nzheno xaa stub welt, nu mzek xaaya lo mdo tubka kwaan ma kwaan nzek xaa tira. Snee nted xaa ma zee kayaa yalnabeyy xaa mod ngwleyy, nel naka gon kwaan kwaan chul doo nzebech xaa lo Xaa Tubka Nak.
29 Zeera lee Ches mbe laz ma, nu mkun xaaya lo Xaa Tubka Nak, kwaan mted xaa zee kayaa ngwleyy yalnabeyy mod ngwleyy, kwaane nak baal kwaan ngolzo Ches modxa ngunabeyy Xaa Tubka Nak.
30 Gwluzh zeera mzen Ches nseyt kwaan nle nambey xaa, nu ren kwaan nzhob lo mdo, nu mchuun xaaya cho Aarón nu cho xab xaa, nu cho re xgann xaa nu xab re xgann xaa. Nu snee ngok nambey Aarón nu xgann nu xab xaa.
31 Zee lee Ches nzhé lo Aarón nu lo re xgann xaa: "Seyey gu baal roo li Xaa Tubka Nak, nu daw guya kwaan yat kwaan nzho leen chekwid, modxa ngunabeyy na, gorna nzhé na: 'Aarón nu re xgann xaa gaw baal ne nu yat ne'. 32 Nu zeek gu baal nu yat kwaan mlake. 33 Nabachit gu roo li Xaa Tubka Nak, dubse tub gazh mbizh, axta yilo nzhin mbizh kwaan kayaa gu yalnabeyy mod ngwleyy. 34 Nel lee Xaa Tubka Nak ngunabeyy kwaan mle be nalzhe zee mle nzhul xaa gu. 35 Kwaanzee nzhaal lake gu zhe nu yaal garli Xaa Tubka Nak, tub gazh mbizh. Le gu kwaan ngunabeyy Xaa Tubka Nak, zee nayeta gu, nel kwaane né xaa lo na.
36 Aarón nu re xgann xaa mle rese kwaan modxa nzhé Xaa Tubka Nak lo Ches.