Xomod teed xaa gon kwaan zere xaa gorna nlewann xaa
7
&Snee nak ley xomod nzhaal le xaaya gorna teed xaa gon kwaan zere xaa gorna nlewann xaa. Leeya nak tub kwaan nambey doo. 2 Ma kwaan nted xaa kwent cheen kwaan nlewann xaa nkin choog xaa yenn ma paro nzhut xaa re ma kwaan nzaa xaa nzhek, nu lee xren ma xo xaa dub welt cho mdo. 3 Nu zeek xaa re ze cheen ma, xwann ma, nu re ze kwaan nke cho xtrip ma. 4 Kiib rop xrinyon ma tubka kwaan re ze kwaan nke choya, nu kwan nke cho lextoo yix ma. 5 Zee lee ngwleyy zeeka lo mdo mod tub gon kwaan zaa xaa lo Xaa Tubka Nak, leeya nak zee zhe jwalt cheen xaa mlewann. 6 Nu rese ngwleyy nzho mod gaw re baal cheen ma, nel nambey naka kwaanzee leeka pa nambey nzhaal gaw xaaya.7 &Gon kwaan teed xaa zee zhe re jwalt cheen xaa nu gak nzhul xaa nu gon kwaan zere xaa gorna nlewann xaa, tubka mod le xaa ropa. Lee baal cheen ma zaa xaa lo ngwleyy, xaa teed ma kwent cheen yalnaban xaa. 8 Ngwleyy kwaan zeek ma kwaan kwent cheen tub xaa, leeka lo lee xaa lake yed cheen ma. 9 Seeka nak re gon cheen yalgon kwaan ngeex leen gor nu re kwaan ngeex leen chee nu kwaan ngeex lo zhil, nak cheen ngwleyy. 10 Seeka nak re gon cheen yalgon kwaan nzho nseyt leen nu kwaan nyent nseyt leen, leeya nak re kwaan nyalzo re xgann Aarón nu lal yalzo re xaaya.
11 &Kwaane nak ley xomod nzhaal zaa xaa gon kwaan kwi wen xaa kwaan na, Xaa Tubka Nak. 12 Cheleeya naka gon kwaan zaa xaa dixkix, zaa xaa gayet kwaan nanyut lebadur leen kwaan nzho nseyt leen, nu yat kwaan nteeb xaa nseyt lo, nu yat cheen arin wen doo kwaan nzho nseyt leen. 13 Tubka kwaan gon kwaan kwi wen xaa, leezha nzaa xaa dixkix lo Xaa Tubka Nak, nzhaal zaa xaa yat kwaan nyu lebadur leen. 14 Lo rese gon kwaan nzaa xaa ngoo xaa tub paroya nzaa lo Xaa Tubka Nak, nu lee stub paroya nak kwaan nlaa lo ngwleyy xaa nxo ren cho mdo zee kwi wen xaa. 15 Lee baal cheen ma kwaan teed xaa zee kwi wen kwaan na, Xaa Tubka Nak, gaw xaaya leeka mbizh zee nu nalaat xaa nik tika stub mbizh. 16 Cheleeya naka tub gon kwaan nzaa xaa nel ngulola ngok kwaan myaan xaa o naka tub gon kwaan ngol lextoo xaa zaa xaa, gaw xaaya leeka mbizh zee, cheleeya mlakeya nzho mod gaw xaaya stub mbizh. 17 Per cheleeya nzhala chon mbizh seetaka nzho baal kwaan mted xaa ma, nkin zeek xaa reya. 18 Nu cheleeya nzhala chon mbizh nzha nzho baal kwaan mted xaa zee kwi wen xaa, nu gaw xaaya nanont gon cheen xaa zee nu nixa nakayaat Xaa Tubka Nak xaa, nel nanzhaalt gaw xaa baal cheen ma kwaan mted xaa, nu xaa kwaan gaw kwaane, tich xaa kwib jwalt.
19 &Nu re baal kwaan gal cho tub re kwaan beed nagawt guya sinka yeka.
&Rese xaa nzhul nzho mod gaw kwaan mted xaa lo mdo. 20 Per chelee xaa beed gaw baal kwaan nak gon kwaan kwi wen xaa kwaan na, Xaa Tubka Nak, koo gu xaa yezh cheen gu.
21 &Xaa kwaan gal cho tub re kwaan beed chol naka kwaan beed cheen myet o naka re ma beed o rese kwaan yizhyo kwaan beed, nu zeera gaw xaa gon kwaan kwi wen xaa kwaan na, Xaa Tubka Nak, koo gu xaa yezh cheen gu."
22 Nu lee Xaa Tubka Nak ngunii lo Ches nu nzhé xaa: 23 "Guzh lo re xaa Israel kwaane: Nagawt gu nik cheep ze cheen ngoon, cheen mbakxiil yeen o cheen chib. 24 Ze cheen ma ngut sbaasa o ze cheen ma mbit ma nzho mod le xchiin xaaya stub mod, per nyent mod gaw xaaya.
25 &Loka xaa kwaan gaw ze cheen ma kwaan nzaa xaa lo na, Xaa Tubka Nak, kwaan nak gon, koo gu xaa yezh cheen gu.
26 Nu nexa paro nzho gu, nagawt gu baal kwaan nzho ren leen, cheen mbyin nu nixa cheen nik tub ma. 27 Nu loka xaa gaw ren, koo gu xaa yezh cheen gu."
28 Nu lee Xaa Tubka Nak ngunii lo Ches nu nzhé: 29 "Guzh lo re xaa Israel, lee gon kwaan zaa xaa lo na, Xaa Tubka Nak, nu wee xaaya zee kwi wen xaa kwaan na. 30 Leeka lee xaa yalaa gon lo Xaa Tubka Nak, ze nu laz ma nu kun xaaya lo na Xaa Tubka Nak. 31 Lee ngwleyy zeek ze lo mdo, per lee baal laz ma nak cheen Aarón nu cheen re xgann xaa. 32 Nu lee kor ma lad li kwaan nak gon kwaan kwi wen xaa zaa xaa lo ngwleyy. 33 Kor ma yalzo ngwleyy, xaa kwaan zeek ze lo mdo nu xo ren cheen ma kwaan kwi wen xaa. 34 Re xaa Israel teed ma lo na zee kwii wen xaa kwaan na, Na kayaa laz ma nu kor ma kwaan nkun xaa zee zaa naya lo Aarón nu xgann tira.
35 Lee re gon kwaan nzek xaa lo na, Xaa Tubka Nak, kwaane nak kwaan nyalzo Aarón nu re xgann xaa leeka mbizh kwaan le nzhul xaa xaa, gak xaa ngwleyy cheen na. 36 Xaa Tubka Nak ngunabeyy re xaa Israel zee leeka mbizh kwaan ngok nzhul xaa zaa xaa re kwaan nyalzo xaa lo xaa nu gaka tub ley kwaan tira lake lo xaa nu lo re xinn xaa.
37 Snee nak ley xomod nzhaal zaa xaa gon kwaan zeek xaa ma lo mdo, gon kwaan nak cheen yalgon, gon kwaan zhe re jwalt nu gak nzhul xaa, gon kwaan nzere xaa gorna nlewann xaa, gon kwaan gak xaa ngwleyy, nu gon kwaan kwi wen xaa. 38 Re kwaane mzaa Xaa Tubka Nak lo Ches yek yi Sinaí gorna lee re xaa Israel nzhi naz wen, zee ngunabeyy xaa xaa zee zaa xaa gon.