Gon kwaan nlewann xaa kwaan yalnkade
6
Ngunii Xaa Tubka Nak lo Ches nu nzhé xaa:2 "Cheleeya nzho tub xaa nle beed kwaan mloo xa, Xaa Tubka Nak, nu yé xaa lo wechxinn xaa lo re kwaan mtache xaa lo xaa o kwaan mlaa xaa lo xaa kanap xaa, o mkiib xaa kwaan lajwers nu yé xaa namzent naya, 3 o yé xaa nanguzhalt na nik tub kwaan mzowen nu mcheroo xaa sbaasa lo re kwaane, 4 tich xaa nzhob jwalt kwaan mlewann xaa, o kwaan mkiib xaa lajwers o kwaan nguzhal xaa, 5 o loka stub re kwaan mcheroo xaa sbaasa. Zee nzhaal zere xaa rese lo bixwanna nu zaa xaa tub part lo tub gaay part kwaan nona. Zeera zaa xaa gon cheen xaa kwent cheen kwaan mlewann xaa. 6 Lee ma nzhaal teed xaa lo na, Xaa Tubka Nak, gak tub mbakxiil mach ma wen. Nu lee ngwleyy nzhaal wii lo ma ne che non ma, zee gak ma gon kwaan zere xaa gorna mlewann xaa zee zhe re kwaan nawent kwaan mle xaa. 7 Zee lee ngwleyy kix yalnaban cheen lo Xaa Tubka Nak zee jwalt cheen xaa.
Xomod nzhaal zeek xaa ma lo mdo
8 Zee ngunii Xaa Tubka Nak, lo Ches nu nzhé xaa:
9 "Guzh lo Aarón nu lo re xgann xaa kwaane nak ley cheen xomod zeek xaa ma lo mdo. Lee ma zeek xaa kwib lo ki kwaan tubka nzebal lo mdo dubse yaal nu axta yani yizhyo, zee yek ma lo bal kwaan nze lo mdo. 10 Gorna lee bal ngulo mzek ma, zeera lee ngwleyy kaan xkalsonsi xaa kwaan wen doo nu gak xaa xab xaa kwaan wen doo. Zeera toop xaa xkade cheen ma lo mdo nu kwek xaaya naz xkwes mdo. 11 Zeera chee xaa xab xaa, nu gak xaa stub ler, zeera koo xaa xkade naz jwer paro mbaz re xaa tub pa nzhul.
12 &Lee bal kwaan nze lo mdo nayuyyta, sinka lee ngwleyy zhiib yag loya yizata garziil, nu kwek wen xaa ma yek lo mdo nu zeek xaa xze ma lo mdo zee kwi wen xaa kwaan na. 13 Lee bal tubka ze lo mdo nu nasuuyt xaaya."
Gon cheen yalgon
14 &Kwaane nak ley cheen gon cheen yalgon kwaan zaa re xaa xgann ngwleyy Aarón nu zhiib xaaya lo na, Xaa Tubka Nak, 15 nu ngwleyy Aarón zen tub lozhya arin kwaan wen doo kwaan nak gon cheen yalgon, kwaan nzho nseyt leen nu rese yaal kwaan zeek xaa lo mdo, gon kwaan chul doo nzebech kwaan selazh na, Xaa Tubka Nak. 16 Zee lee ngwleyy Aarón nu re xgann xaa gaw re kwaan mlake. Nu nayot lebadur leena nu gaw xaaya tub pa nambey jwer roo li na Xaa Tubka Nak. 17 naseyeyt xaaya kwaan lebadur, nel kwaan nzhaw re ngwleyy nak gon kwaan mloo xa, Xaa Tubka Nak . Nu naka kwaan nambey doo, mod gon kwaan teed xaa zee zhe jwalt cheen xaa nu gak nzhul xa nu mod gon kwaan zere xaa gorna lewann xaa. 18 Rese xaabyi, xaa nak xtii ngwleyy Aarón tira nzho mod gaw xaa re kwaan mlake kwaan mzaa xaa lo Xaa Tubka Nak, Nu loka xaa gal cho gon ne gak nambey xaa."
Gon cheen re ngwleyy
19 Ngunii Xaa Tubka Nak lo Ches nu nzhé xaa:
20 "Kwaane nak gon kwaan zaa ngwleyy Aarón nu re xgann xaa lo na, Xaa Tubka Nak, mbizh kwaan gak nzhul xaa mod ngwleyy: chop kil arin kwaan wen doo kwaan nak gon cheen yalgon. Rola zaa xaa garziil nu zrola zaa xaa mzhel yizhyo, nu yizata mbizh zaa xaaya. 21 Nu keex xaaya leen chee nu zhaala kwaan nseyt; nu zaa xaa re kwaan byog mod gon kwaan chul doo nzebech lo na, Xaa Tubka Nak. 22 Snee nzhaal zaa ngwleyy non, xaa mkayaa yalnabeyy lo xuz xaa Aarón. Kwaane nak tub ley kwaan nzhaal le xaa tira lo na, Xaa Tubka Nak. Nu rese zeek xaa. 23 Rese gon cheen ngwleyy zeek xaa tira: nu nyent cho nzho mod gawa."
Gon kwaan zhe jwalt cheen xaa nu gak nzhul xaa
24 Zee lee Xaa Tubka Nak ngunii lo Ches nu nzhé xaa:
25 "Guzh lo Aarón nu lo re xgann xaa, kwaane nak ley cheen gon kwaan nzhe jwalt cheen xaa nu gak nzhul xaa: Leeka paro nzhut xaa ma kwaan tira nzek xaa lo mdo, leeka baa nzhut xaa ma kwaan zhe jwalt cheen xaa nu gak nzhul lo na, Xaa Tubka Nak, nel naka tub kwaan nambey doo. 26 Lee ngwleyy xaa teed ma gaw xaa ma roo li na, Xaa Tubka Nak, tub pa nambey. 27 Rese kwaan gal cho baal cheen ma gak nambey, nu chelee ren cheen ma chuun cho ler, zee zet xaaya tub pa nzhul. 28 Lee chee kwaan nak ban kwaan myeex gon leen, lee xaaya; nu cheleeya leen chee kwaan nak brons, kobya xaa leena nu zet xaaya kwaan nis.