Gon kwaan zhe re jwalt zee gak nzhul xaa
4
Ngunii Xaa Tubka Nak lo Ches nu nzhé xaa:2 "Guzh lo re xaa Israel kwaane nak ley: Gorna lee tub xaa nle jwalt lo na, Xaa Tubka Nak, per namzeent xaa mle xaa kwaan mxaal na xaa nalet xaa.
3 & Cheleeya ngwleyy xaa non, nak xaa mle jwalt zee nzhoba tich re xaa yezh, zee nzhaal teed xaa tub ngoon yeen ma wen, kwent cheen jwalt cheen xaa lo na, Xaa Tubka Nak, zee zhe re xjwalt xaa. 4 Zee wee xaa ngoon yeen roo li na, Xaa Tubka Nak. Nu zhiib xaa yaa xaa yek ngoon yeen nu choog xaa yenn ma. lo na. 5 Zeera lee ngwleyy xaa non, zen tub chut ren cheen ngoon yeen zee wee xaaya roo li na. 6 Nu zeera le bsii ngwleyy kwen yaa xaa kwaan ren, nu chuun xaaya tub gazh welt lo na, Xaa Tubka Nak, paro nke ler ndok kwaan nsaaw Pa Nambey Doo. 7 Zee lee ngwleyy teeb ren cho rese xkach mdo paro nzek xaa yaal kwaan chul doo nzebech, kwaan nzo leen li na, Xaa Tubka Nak. Nu xo xaa xren ngoon yeen kwaan mlake naz nii mdo pa nzek xaa ma, kwaan nzo leen li na. 8 Zeera kiib xaa re ze kwaan nke cho xtrip ma nu re ze kwaan nzho lextoo ma kwaan che re xjwalt xaa. 9 Kiib rop xrinyon ma tubka kwaan re ze kwaan nke choya, nu kwaan nke cho lextoo yix ma, 10 modxa nkiib xaa ze lextoo ma kwaan kwi wen xaa kwaan na. Zeera lee ngwleyy zeeka lo mdo pa nzek xaa ma. 11 Per lee yed cheen ngoon yeen, nu rese baal cheen ma, yek ma, kor ma, lextoo ma, nu xke ma, 12 Zee koo xaa ma naz jwer roo yezh paro mbaz re xaa, tub pa nzhul paro ngobi xaa xkade, nu tich monton xkade zhiib xaa yag nu koo xaa ki.
13 &Cheleeya re xaa Israel nak xaa mle jwalt lo na, Xaa Tubka Nak, per namzent re xaa mle xaa kwaan mxaal na re xaa nalet xaa tich xaa nzhob jwalt. 14 per gorna zeen re xaa xana jwalt mle xaa, zee nzhaal teed rese xaa tub ngoon yeen, mod gon kwaan zhe re xjwalt xaa. Gon zee wee re xaa roo li na, 15 paro lee re xaa gol, xaa yezh, zhiib xaa yaa xaa yek ngoon yeen lo na, Xaa Tubka Nak, nu leeka baa choog xaa yenn ma. 16 Zeera lee ngwleyy non wee cheep ren cheen ngoon yeen leen li na. 17 Nu zeera le bsii ngwleyy kwen yaa xaa kwaan ren, nu chuun xaaya tub gazh welt lo na, Xaa Tubka Nak, paro nke ler ndok kwaan nsaaw Pa Nambey Doo. 18 Nu teeb xaa cheep ren yek xkach mdo kwaan nzo leen li na, Xaa Tubka Nak. Nu rese ren kwaan mlake xo xaa naz nii mdo paro nzek xaa ma, kwaan nzo paro nzeeb xaa leen li na. 19 Nu kiib xaa rese ze cheen ngoon yeen nu zeek xaaya lo mdo. 20 Leeka mod mle xaa gon kwaan zhe re jwalt cheen ngwleyy xaa sbaaka le xaa kwaan ngoon yeen ma teed xaa zee zhe re xjwalt xaa; nu snee le ngwleyy zee kix xaa yalnaban cheen re xaa yezh zee zhe jwalt cheen re xaa. 21 Zeera koo xaa dubse ngoon yeen naz jwer paro mbaz re xaa, nu zeek xaa ma mod mzek xaa ma yilo, snee nle xaa re ma nted xaa zee zhe jwalt cheen re xaa yezh.
22 &Cheleeya tub xaa non mle tub jwalt lo na, Xaa Tubka Nak, per namzeent xaa mle xaa kwaan mxaal na xaa nalet xaa, 23 per gorna zeen xaa mle xaa jwalt, zee nzhaal wee xaa tub gon cheen xaa tub chib, ma mach, ma wen. 24 Nu zhiib xaa yaa xaa yek chib, nu choog xaa yenn ma paro nzhut xaa ma nzek xaa lo na, Xaa Tubka Nak, nel lee ma nak ma teed xaa zee zhe re xjwalt xaa. 25 Nu zeera le bsii ngwleyy kwen yaa xaa kwaan ren, nu teeb xaaya cho rese xkach mdo paro nzek xaa ma, zeera xo xaa ren kwaan mlake naz nii mdo paro nzek xaa ma. 26 Zeera zeek xaa rese xze ma lo mdo, modxa nle xaa kwaan xze ma kwaan kwi wen xaa kwaan na, zee gak nzhul xaa ; nu snee kix ngwleyy zee zhe jwalt cheen non.
27 &Cheleeya tub xaa yezh mle tub jwalt lo na, Xaa Tubka Nak, per namzeent xaa mle xaa kwaan mxaal na xaa nalet xaa, 28 per gorna zeen xaa mle xaa jwalt, zee nzhaal wee xaa tub chib gol, ma wen, mod gon cheen xaa, kwent cheen jwalt kwaan mle xaa. 29 Nu zhiib xaa yaa xaa yek ma teed xaa zee zhe xjwalt xaa nu zeera choog xaa yenn ma paro nzek xaa ma lo mdo. 30 Zeera lee ngwleyy zen cheep ren cheen ma kwaan kwen yaa xaa, nu teeb xaaya cho rese xkach mdo paro nzek xaa ma, zeera xo xaa ren kwaan mlake naz nii mdo paro nzek xaa ma. 31 Noka kiib xaa rese xze ma, modxa mkiib xaa xze ma nak gon kwaan kwi wen xaa kwaan na, nu zeek ngwleyya lo mdo paro nzek xaa ma, kwaan nak bech kwaan chul doo lo na, Xaa Tubka Nak, zee kix ngwleyy yalnaban cheen xaa zhe re xjwalt xaa.
32 &Chelee xaa zee yiidno tub mbakxiil yeen ma teed xaa zee zhe jwalt cheen xaa, nzhaal yiidno xaa tub mbakxiil, ma gol, ma wen. 33 Nu zhiib xaa yaa xaa yek ma, nu zeera choog xaa yenn ma paro nzhut xaa ma nzek xaa, nel lee ma nak ma teed xaa zee zhe re xjwalt xaa. 34 Zeera lee ngwleyy zen ren cheen ma kwaan kwen yaa xaa zee gak nzhul xaa, nu teeb xaaya cho rese xkach mdo paro nzek xaa ma, nu rese ren kwaan mlake xo xaa naz nii mdo paro nzek xaa ma. 35 Zeera kiib xaa rese xze ma modxa mkiib xaa xze mbakxiil, ma mted xaa zee kwi wen xaa kwaan na. Nu zeek ngwleyy ze cheen ma lo mdo paro nzek xaa ma, tubka kwaan re gon cheen na, Xaa Tubka Nak; zee kix ngwleyy kwen cheen jwalt cheen xaa zee zhe jwalt cheen xaa.