Gon Cheen Yalgon
2
&Gorna lee tub xaa zaa gon cheen yalgon lo na, Xaa Tubka Nak, lee gon gak arin kwaan wen doo nu cheep xaa nseyt leena nu yaal leena. 2 Zeera lee re xgann Aarón, xaa nak ngwleyy; wee tub lozhya arin kwaan wen doo kwaan nzho nseyt leen, nu tubka chaal xaaya kwaan yaal zee zeek xaaya lo mdo, mod gon. Kwaane nlu le xaa mzaa rese lo na, Xaa Tubka Nak, kwaan nak bech kwaan chul doo nzebech. 3 Lee gon kwaan mlake, kwaan mzaa gu lo na, Xaa Tubka Nak, gak cheen Aarón nu re xgann xaa, nel nambey doo naka.4 &Gorna zaa xaa tub gon cheen yalgon kwaan yeex leen gor lo na, nzhaal gaka arin kwaan wen doo kwaan nanyut lebadur leen, kwaan guch kwaan nseyt, o nzho mod gaka gayet kwaan nanyut lebadur leen, kwaan ndeeb nseyt lo.
5 &Cheleeya gon cheen gu nak gon cheen yalgon kwaan yeex lo zhil nzhaal gaka arin kwaan wen doo kwaan nanyut lebadur leen nu kwaan guch kwaan nseyt. 6 Le byog xaaya nu chuun xaa nseyt ticha nel naka tub gon cheen yalgon.
7 &Nu cheleeya gon cheen yalgon kwaan yeex leen chee nzhaal dexkwaaya kwaan arin kwaan wen doo nu gucha kwaan nseyt. 8 Lee gon cheen yalgon kwaan mdexkwaa xaa, wee xaaya lo na, Xaa Tubka Nak; nu zaa xaaya lo ngwleyy, zee lee ngwleyy weeya axta lo mdo. 9 Nu lee ngwleyy zen cheep gon nu zeek xaaya lo mdo, kwaan nlu zee selazh xaa rese nak kwaan mkayaa na, Xaa Tubka Nak, kwaan nak bech kwaan chul doo nzebech. 10 Lee gon kwaan mlake, kwaan mzaa gu lo na, Xaa Tubka Nak, gak cheen Aarón nu re xgann xaa, nel nambey doo naka.
11 &Nik tub gon cheen yalgon kwaan zaa xaa lo na, Xaa Tubka Nak, nayot lebadur leen nixa mzhin, nel nyent mod zeek gu lebadur nu nixa nyent mod zeek gu mzhin lo na. 12 Nzho mod zaa xaa lebadur nu mzhin lo na, Xaa Tubka Nak, mod gon cheen xle kwaan yilotlaka, per nazeekt xaaya lo mdo, nel nanakta tub bech kwaan chul doo nzebech.
13 &Rese gon cheen yalgon nzhaal ko gu zed leena, nu nixa nalaat xaa yo jwalt zed leen gon cheen yalgon kwaan nlu mod myaan Dios kwaan lee xaa. Rese gon kwaan zaa xaa nzhaal ko xaa zed leena.
14 &Gorna zaa xaa nzhobxtil mod tub gon cheen xle kwaan yilotlaka lo na, Xaa Tubka Nak, zoog xaaya zee yeexa lo ki. 15 Blo gu nseyt leena nu yaal leena nel leeya nak tub gon cheen yalgon. 16 Nu lee ngwleyy zeek cheepa lo mdo, mod gon. Kwaane nlu zee selazh xaa rese nak kwaan mkayaa na, Xaa Tubka Nak.