Xab ngwleyy
39
Ler sul, ler naxne nagaas nu ler naxne mdexkwaa xaa ler gak ngwleyy gorna zo xaa lo Xaa Tubka Nak. Nu sbaaka mdexkwaa xaa ler nambey gak Aarón, modxa ngunabeyy xaa lo Ches. 2 Nu noka mdexkwaa xaa kwaan nzhak mod mandil kwaan or, ler sul, ler naxne nagaas, ler naxne nu ler kwaan non doo. 3 Nu nales doo mdexkwaa xaa or nu mchoog xaaya zee mtib xaa ler sul, ler naxne nagaas, ler naxne nu ler kwaan non doo. 4 Nu mdexkwaa xaa chop lee ler kwaan nzhaal naz xuk ler, nu sbaa tuka zhaala. 5 Nu ler kwaan nsii lextoo xab xaa mzoba leeka cho xab xaa kwaan nak mod mandil nu tuka ngoka gorna mdexkwaaya. Mdexkwaa xaaya kwaan or nu ler sul, ler naxne nagaas, ler naxne nu ler kwaan non doo, nu mdexkwaa xaaya mod ngunabeyy Xaa Tubka Nak lo Ches. 6 Mdexkwaa xaa ke kwaan le onise nu mzob xaaya tich kwaan mdexkwaa xaa kwaan or, kwaan mke cho xab ngwleyy, nu lo rop ke mkee xaa le re xgaan Israel. 7 Nu mzob xaa rop ke xuk kwaan nzhak mod mandil, kwaan le zee zelazh xaa re xaa Israel modxa ngunabeyy Xaa Tubka Nak lo Ches.8 Nu mdexkwaa xaa kwaan kee laz xab xaa, leeka mod mdexkwaa kwaan nzhak mod mandil, kwaan or, ler sul, ler naxne nagaas, ler naxne nu ler kwaan non doo. 9 Nu lal na re taya, nu tub good nolla leeka stub good nanyaga. 10 Mke tap baal ke ticha, nu baal yilotlaka mkee xaa ke kwaan le rubi, topasio nu esmeralda kwaane nak baal yilotlaka. 11 Nu lee baal rop mkee xaa ke kwaan le granate, zafiro nu diamante. 12 Nu baal yon mkee xaa ke kwaan le jasinto, agata nu amatista. 13 Nu lee baal dap mkee xaa ke kwaan le berilo, onise nu jaspe. Nu rese ke ne mcheep xaa leen kwaan mdexkwaa xaa kwaan or. 14 Nu ngoka chiibchop ke, nel chiibchop le re xgaan Israel, nu kad lo tub ke mke le re chiibchop xgaan Israel.
15 Noka mkee xaa lo kwaan mke laz xab ngwleyy lak kaden kwaan nzhak mod kwaan nliib kwaan nak nebse or. 16 Sbaaka mdexkwaa chop kwaan mzhaal rop kwaan, nu chop argoy or, nu tubga mzob xaa kad tub ta lad kwaan nke cho laz xab xaa. 17 Nu mchaal xaa rop kaden kwaan nak or lo rop argoy rop skin kwaan nke laz xab ngwleyy. 18 Nu sbaaka mchaal xaa rop kaden or nu mchaal xaaya naz lo xuk xab xaa kwaan nke cho kwaan nak mod mandil. 19 Nu noka mdexkwaa xaa xchop argoy or kwaan mzob xaa rop skin kwaan nke cho laz xab xaa, kwaan nlu naz yat lo xab xaa kwaan nzhak mod mandil. 20 Nu mdexkwaa xaa xchop argoy or kwaan mzob xaa naz delant lo xuk xab xaa kwaan nzhak mod mandil, naz yat xeep gax roo len xab xaa, tich ler kwaan nzhak mod mandil msii xaa tub lee ler kwaan nsii lextoo xab xaa. 21 Lee argoy kwaan nzen kwaan nke laz xab ngwleyy, nzhaal kwaan argoy kwaan nzob cho mandil kwaan tub doo sul, zee tira nye zena cho laz mandil zee nagabta cho xab xaa, mod ngunabeyy Xaa Tubka Nak lo Ches.
22 Noka mdexkwaa xaa tub kwaan nak mod mandil nebse kwaan yil sul. 23 Nu rolta xsawwa naz ya nkin yed yeer paro ded yenn xaa, nu rop xkwaa ndiba, zee nye gak paro ded yenn xaa, zee narazta. 24 Nu mdexkwaa xaa dub welt nii ler, tub kwaan nzhak mod garnad, kwaan ler sul, ler naxne nagaas, ler naxne nu ler kwaan non doo. 25 Nu noka mdexkwaa xaa kampan chuut kwaan nak nebse or, nu mkee xaaya xsaw re garnad dub welt nii ler. 26 Tub kampan nu tub garnad, nu stub kampan nu stub garnad mkee xaa dub welt nii ler kwaan mlexchinn xaa leen li Xaa Tubka Nak modxa ngunabeyy xaa lo Ches.
27 Nu noka mtib xaa ler noll kwaan ler non doo, kwaan gak Aarón nu re xgann xaa. 28 Nu noka mdexkwaa xaa kwaan nral yek xaa nu kwaan nkadoo yek xgann xaa, kwaan ler kwaan non doo. Nu noka mdexkwaa xaa re kalsonsi kwaan ler non doo. 29 Nu noka ler kwaan nzii leen xab xaa mdexkwaa xaa kwaan ler sul, ler naxne nagaas, ler naxne nu ler non doo kwaan mtib xaa modxa ngunabeyy Xaa Tubka Nak lo Ches.
30 Nu lam kwaan mdexkwaa xaa kwaan neb or mzob xaa cho koron kwaan nzob lachuzh xaa. Nu choya mkee xaa tub kwaan nzhé: "NAMBEY DOO XAA NE LO XAA TUBKA NAK." 31 Nu lo lam mlo xaa tub lee yil sul zee mzhaal lachuzh xaa, lo kwaan nral yek xaa.
Ngulo mzelo xaa li Xaa Tubka Nak
32 Snee ngulo mza xaa li Xaa Tubka Nak pa zhaal xaa kwaan lee xaa; kwaan mdexkwaa re xaa Israel modxa ngunabeyy xaa lo Ches; nu snee ngulo mdexkwaa xaaya. 33 Nu mbe xaa li Xaa Tubka Nak kwaan nak ler lo Ches, nu rese kwaan lexchinn xaa leena: ngench, tab, yag, yiso nu re kwaan zo xan yiso; 34 nu kwaan msaaw ticha kwaan nak yed cheen mbakxiil kwaan mgoo naxne, nu kwaan nak yed kwaan chul doo nzhak, nu ler kwaan mke naz loya; 35 nu mbe xaa kaj cheen trat nu kwaan nyaaw rooya, nu bar kwaan nzhe xaaya; 36 nu mbe xaa mes cheen yat nu bas nu yat kwaan nzhib xaa lo mes lo na; 37 nu noka mbe xaa bruj kwaan nak nebse or, nu re kwaan nzaa xni, nu rese kwaan nle xchinna, nu nseyt kwaan zaaya xni; 38 nu mdo kwaan nak or, nu nseyt kwaan le nzhul, nu yaal kwaan chul nzebech, nu ler kwaan yaaw roo li Xaa Tubka Nak; 39 nu noka mdexkwaa xaa mdo, nu kwaan brons mdexkwaa xaa pa kwib ma zeek xaa, nu mdexkwaa xaa bar kwaan zen xaa, nu re kwaan nle xchinn xaa loya. Noka mdexkwaa xaa chee nu pa kwiba; 40 nu noka mbe xaa ler kwaan nsaaw lach, nu yiso cheena, nu kwaan nzo xana, nu ler kwaan nke pa nzeeb xaa roo lach, nu re doo cheena, nu stak cheena, nu rese kwaan lexchinn xaa leen li Xaa Tubka Nak, pa zhaal xaa kwaan lee xaa; 41 nu noka mbe xaa ler kwaan gak ngwleyy gorna zo xaa pa nambey, nu ler nzhul kwaan gak ngwleyy Aarón, nu ler kwaan gak re xgann xaa gorna zo xaa gak xaa ngwleyy.