Mdexkwaa xaa mdo kwaan nak brons
38
Nu leeka sbaa mdexkwaa xaa mdo kwaan yag meskit, pa zeek xaa ma. Nu mle noll xaaya tub gaay zhit yaa xaa, nu nanyaga tub gaay zhit yaa xaa, nu lal naxen rop taya, nu nzeba chon zhit yaa xaa. 2 Nu mdexkwaa xaa tap kach kwaan nroo kad tub skina zee tuka ngoka kwaan mdo nu dubse cho mdo mdeeb brons.3 Nu mdexkwaa xaa re kwaan nle xchinn xaa lo mdo: chee kwaan yo xkade leen, palet, tas, nu kwaan nkano zyen leyy, rese kwaane mdexkwaa kwaan brons. 4 Nu leeka kwaan brons mza xaa pa kwib ma nu mzhib xaaya rol net leen kwaan nak mdo.
5 Noka mdexkwaa xaa tap argoy kwaan teed xaa bar leen, nu mzob xaa dapse skina naz len, zee zena kwaan kwib ma lo kwaan nak brons. 6 Nu noka mdexkwaa xaa chop yag meskit nu mteeb xaa brons choya. 7 Nu mcheep xaa bar leen argoy kwaan mkee xaa rop ta cho mdo, zee nzho mod wee xaaya. Nu kwaan tab mdexkwaa xaa mdo kwaan gak mod tub kaj.
8 Nu noka mdexkwaa xaa tub chee paro nyanag xaa nu pa nzhiba kwaan nak brons. Nu mdexkwaa xaaya kwaan re spej kwaan nak brons, kwaan mzaa re ngwnaa me nzo nke zhiin roo li Xaa Tubka Nak.
Lach jwer roo li Xaa Tubka Nak
9 Nu sbaaka msaaw xaa roo lach jwer li Xaa Tubka Nak. Lee naz ta yat mkee xaa tub lee ler kwaan non doo kwaan noll tub gayoo zhit yaa xaa. 10 Nu sbaaka mdexkwaa xaa tub gal yiso nu tub gal pa nzo niiya nak brons; nu lee yiib kwaan nkenga ngench lo nu ngench ngok plat. 11 Nu lee naz ta ya, mkee xaa ler non doo, kwaan noll tub gayoo zhit yaa xaa, nu noka mdexkwaa xaa tub gal yiso nu tub gal kwaan mzo xana kwaan nak brons; nu lee yiib kwaan nkenga ngench lo nu ngench nak plat. 12 Nu noka ta nyaaz mbizh mkee xaa tub lee ler non doo kwaan noll choobchii zhit yaa xaa; nu chii yiso, nu chii kwaan mzo niiya; nu lee yiib kwaan nkenga ngench lo nu ngench ngok plat. 13 Nu lee ta nlen mbizh mkee xaa ler non doo kwaan na tub choobchii zhit yaa xaa. 14 Tub ta mkee xaa ler kwaan na chiin zhit yaa xaa, nu chon yiso nu chon pa nzo niiya. 15 Nu lee stub ta jwer roo lach li xaa, mkee xaa ler kwaan noll tub chiin zhit yaa xaa, chon yiso nu chon pa nzo niiya. 16 Nu rese ler non doo mkee xaa dubse welt choya. 17 Nu kwaan mzo nii yiso mdexkwaa xaa kwaan brons, nu lee yiib kwaan nkenga ngench lo nu ngench ngok plat; nu yek re yiso ngok plat. Nu rese yiso kwaan mzo roo lach jwer yoo mkano ngench kwaan nak plat. 18 Nu mdexkwaa xaa ler kwaan nyaww roo lach jwer yoo kwaan ler sul, ler naxne, nu ler naxne nagaas nu ler kwaan non doo. Nolla tub gal zhit yaa xaa, nu nzeba tub gaay zhit yaa xaa, leeka paro ne ler kwaan mkee xaa roo lach jwer li xaa. 19 Tub tap yiso cheena nu stub tap kwaan mzo niiya ngok brons, nu lee yek yiso, nu yiib kwaan nkenga ngench lo, nu ngench ngok plat. 20 Nu rese stak kwaan mzen ler cheen li Xaa Tubka Nak nu kwaan myaaw roo lach jwer li xaa ngok brons.
Re yiib kwaan mlexchinn xaa
21 Tub lanee nak kwaan mle xchinn xaa mza xaa li Xaa Tubka Nak paro nzo kaj cheen trat. Snee ngunabeyy Ches lo re xtii Leví nu ngunabeyy Itamar, xgann ngwleyy Aarón, lo xaa. 22 Bezaleel xgann Uri xos Hur, xaa nak lo dii cheen Judá, mdexkwaa xaa rese kwaan ngunabeyy Xaa Tubka Nak lo Ches. 23 Nu lo xaa nzho Aholiab xgann Ahisamak, xaa nak lo dii cheen Dan, xaa nzhak ntib re ler sul, naxne, nu naxne nagaas nu re ler kwaan non doo nu noka nzhak xaa nkee xaa dibuj.
24 Tub lanee or ngok gon kwaan mlexchinn xaa kwaan mdexkwaa li Xaa Tubka Na, tub yee gayoo nzho chongal gaay kil or, mod nchiix xaa re kwaan leen li xaa. 25 Lee plat kwaan mtoop re xaa lo re xaa yezh nak chon mil nzho chon gayoo chiinmtap kil, mod nchiix xaa re kwaan leen li Xaa Tubka Nak. 26 Rese xaa kwaan nzho tub gal liin, xaa nzho le list, rese xaa nak xaa tub xoop gayoo chon mil nzho gaay gayoo yirol xaa. Nu kad tub xaa mzaa gaay yirol gram plat. 27 Nu chon mil nzho chon gayoo kil plat kwaan mseyall xaa kwaan mdexkwaa kwaan mzo xan re yiso, kwaan nak li Xaa Tubka Nak nu re yiso kwaan mzen ler ndok. Nu kad tub pa mzo xan yiso, mdexkwaa xaa kwaan galbchiibchon kil plat. 28 Kwaan chon mil nzho chon gayoo chiinmtap kil plat, kwaan mtoop xaa lo re xaa yezh, mdexkwaa re yek yiso, yiib kwaan mzen ngench, nu re ngench. 29 Lee re brons kwaan mzaa re xaa gon ngok tub chop mil nzho chon gayoo galbchii xoop kil. 30 Kwaan brons ne mdexkwaa xaa kwaan mzo xaa xan yiso roo li Xaa Tubka Nak nu noka mdo pa mzek xaa ma mdexkwaa xaa kwaan brons, pa nzhib xaa ma lo, nu rese kwaan mlexchinn xaa lo mdo, 31 nu noka mdexkwaa xaa rese nii yiso kwaan mzo xaa dub welt roo lach jwer li Xaa Tubka Nak nu rese nii yiso kwaan mzo xaa roo li xaa nu noka rese stak kwaan mzen ler dub welt choya.