Re kwaan nzho leen li Xaa Tubka Nak
37
Bezaleel mdexkwaa kaj cheen trat kwaan yag meskit, nu nolla chop zhit yirol, nu nanyaga tub zhit yirol, nu nzeba tub zhit yirol. 2 Nu mteeb xaa or naz ticha nu naz leena, nu leeka kwaan or mkee xaa dibuj choya. 3 Nu mzob xaa tap argoy kwaan nak or choya, nu mzoba dapse skina, chop argoy tub ta nu xchopa stub ta. 4 Nu mdexkwaa xaa bar cheen yag meskit nu mteeb xaa or choya. 5 Nu mcheep xaa bar leen argoy kwaan nke xkwes kaj cheen trat zee nzho mod wee xaa kaj. 6 Kwaan neb or mdexkwaa xaa kwaan nyaaw roo kaj, chop zhit yirol nolla, nu tub zhit yirol nanyaga. 7 Nu kwaan marti mdexkwaa xaa chop kwaan nlu kwenta mandad cheen Xaa Tubka Nak, kwaan le kerubin kwaan nak or, nu mzo xaaya rop skin tap kwaan nyaaw roo kaj. 8 Tub kwaan nyun kwenta mandad cheen Xaa Tubka Nak kwaan le kerubin mroo tub skin nu stub skin; nu tuka naka kwaan tap kwaan nyaaw roo kaj. 9 Lee kwaan nyun kwenta mandad cheen Xaa Tubka Nak, nu kwaan rop xiila nsaawa tich kaj, nu nzhaal lo ropse, nu ngwiiya tich kaj.10 Noka mdexkwaa xaa mes kwaan nak yag meskit, ngok nolla chop zhit yaa xaa nu nanyaga tub zhit yaa xaa nu nzeba tub zhit yirol. 11 Nu mteeb xaa or choya nu noka mkee xaa dibuj kwaan or dub choya. 12 Nu mlaa xaa dapse xkwes mes tub lozhya xaa, noka mkee xaa dibuj kwaan nak or choya. 13 Nu mdexkwaa xaa tap argoy or mzob xaaya dapse skin nii mes. 14 Lee re argoy mzob yat paro ngeed dap xkwes mes, nu lee leen argoy nded bar zee nzho mod wee xaa mes. 15 Lee re bar kwaan nzhe xaa mes mdexkwaa xaa kwaan yag meskit nu mteeb xaa or choya. 16 Noka re kwaan nkin xaa lo mes mdexkwaa xaa kwaan or: yann, kucher, kantaplor, nu kop kwaan yo gon kwaan nak nis ub.
17 Nu sbaaka mdexkwaa xaa tub bruj kwaan nak neb or, nu mdexkwaa xaaya kwaan marti nu nkanoya: xana, niiya, xkopa, choya pa nak mod xan yeey, nu kwaan nak mod yeey nroo choya. 18 Tub xoop yaaya nkanoya choya: chona tub ta nu chona stub ta. 19 Nu tub lad yaaya nkanoya chon kop kwaan nak mod yeey cheen almendro kwaan dub xana, nu sbaaka stub yaaya nkanoya xchon kop kwaan nak mod yeey cheen almendro kwaan dub xana, nu sbaa lee bruj nkano xoop yaa. 20 Noka niiya nkano tap kop kwaan nak mod yeey cheen yag almendro kwaan dub xana. 21 Nu noka nzob tub kwaan nak mod xan yeey xan paro nroo chop yaaya kwaan yilo, nu stuba nzob xan xchopa, nu seeka nzob stub kwaan nak mod xan yeey xan xchop kwaan gwluzh. 22 Yeey kwaan nroo choya nak tuka kwaan dub xana. Mdexkwaaya kwaan neb or nu mdexkwaa xaaya kwaan marti. 23 Nu sbaaka kwaan or mdexkwaa xaa tub gazh kwaan nzaa xni, nu noka kwaan nsuyya nu yann kwaan yo kwaan nguk. 24 Mle xchinn xaa galbchiibchon kil or mdexkwaa xaa bruj nu re kwaan nle xchinna.
25 Mdexkwaa xaa tub mdo kwaan yag meskit, paro zeek xaa yaal, nolla tub zhit yaa xaa, nu nanyaga tub zhit, lal na ta nanyag kwaan ta naxen, nu nzeba chop zhit yaa xaa. Leeka choya nroo xkacha. 26 Nu rop ta cho mdo mteeb xaa or, nu noka mteeb xaa or cho xkacha, nu noka kwaan or mkee xaa dibuj dub welt xkwesa. 27 Nu noka mdexkwaa xaa chopga argoy or kwaan nzob skina pa teed xaa bar zee nzho mod wee xaaya. 28 Noka mdexkwaa xaa bar kwaan yag meskit nu mteeb xaa or choya.
29 Nu sbaaka mdexkwaa xaa nseyt kwaan nle nzhul xaa, nu yaal kwaan chul doo nzebech, kwaan mdexkwaa xaa nzhak ndexkwaaya.