36
&Nu snee lee Bezaleel nu Aholiab, nu rese xaa nzhak ndexkwaa kwaan, xaa kwaan mzaa Xaa Tubka Nak yalnzhak lo, mdexkwaa rese kwaan nkin leen li xaa, mod ngunabeyy xaa lo re xaa.Zyen doo gon mdexkwaa xaa li Xaa Tubka Nak
2 Zee lee Ches mrezh Bezaleel nu Aholiab, nu re xaa kwaan nzhak ndexkwaa kwaan, xaa kwaan mzaa Xaa Tubka Nak yalnzhak lo, nu xaa gal lextoo yiid ke zhiin. 3 Zee lee Ches mkayaa re gon kwaan mzaa re xaa Israel, nu zee mzaa xaaya lo re xaa kwaan dexkwaa re kwaan leen pa nambey. Nu rese xaa Israel yizata mbizh nyalaa xaa gon kwaan nzhal lextoo xaa. 4 Zee lee re xaa kadexkwaa li Xaa Tubka Nak, mlaa re xaa kwaan kale xaa 5 nu ngwa re xaa lo Ches nu nzhé xaa:
—Lee re xaa yezh nzelaa zyenra gon lo re kwaan nkin yaa yoo, kwaan ngunabeyy Xaa Tubka Nak.
6 Zee ngunabeyy Ches zee teed xaa diizh lo re xaa yezh, lo re xaabyi nu lo re ngwnaa zee naweetra xaa mas gon yaa li Xaa Tubka Nak. Zee nambetra xaa mas gon, 7 nel nkano xaa zyen doo kwaan kano xaa zhiin kwaan yaa yoo, nu axta lakeya.
8 Zee lee re xaa kwaan nzhakra zaa li Xaa Tubka Nak, mdexkwaa xaa tub chii lee ler ndok kwaan non doo, ler sul, ler naxne nagaas, nu ler naxne, nu mkee xaa kwaan nyun kwenta mandad choya kwaan le kerubin. Kwaane mdexkwaa xaa nzhak. 9 Nu kad tub lee ler nolla tub galbxon zhit yaa xaa, nu nanyaga tub tap zhit yaa xaa, nu rese ler lal ne. 10 Nu tuka mchaal xaa tub gaay lee ler ndok nu sbaaka mchaal xaa stub gaay lee ler. 11 Nu mzob xaa nzhaya kwaan na sul dubse xkwes gaay lee ler yilo, nu sbaaka mzob xaa nzhaya dub xkwes zgaay lee ler rop. 12 Lo gaay lee ler yilo mzob choobchii nzhaya nu lo stub gaay lee ler gwluzh mzob xchoobchii nzhaya nu lal mzoba lo tuba nu lo stuba. 13 Nu mdexkwaa xaa tub choobchii ngench kwaan or, kwaan zen xkwes rop lee ler, zee ngoka tub leeka ler nu sbaa gak li na tuka.
14 Nu mdexkwaa xaa tub chiibtub ler ndok kwaan yich led chib zee saawa yek yoo ler li Xaa Tubka Nak. 15 Kad tub lee ler nolla tub galbchii zhit yaa xaa, nu nanyaga tub tap zhit yaa xaa, lal na reya. 16 Mchaal xaa gaay leeya yilotlaka nu zeera mchaal xaa stub xoop leeya. 17 Zeera mzob xaa choobchii nzhaya dubse xkwesa, nu sbaaka mzob xaa xchoobchii nzhaya xkwes stub lee ler zee zhaal ropa. 18 Noka mdexkwaa xaa choobchii ngench kwaan nak brons, zee mzhaala nu ngoka tub yoo ler. 19 Msaaw xaa cho yoo kwaan yed cheen mbakxiil kwaan mgoo naxne, nu tich yed ne msaaw xaa stub yed kwaan chul doo nlu.
20 Nu seeka mdexkwaa xaa re tab kwaan nak yag meskit, nu chul doo nali mzoli xaaya cho yoo. 21 Kad tub lee tab noll chii zhit yaa xaa, nu nanyaga tub zhit yirol. 22 Kad tub tab mloo leen xaa xkwes, zee zen tuba kwaan stuba, nu rese sbaa mloo leen xaa zee dexkwaa li Xaa Tubka Nak. 23 Mdexkwaa xaa li Xaa Tubka Nak kwaan tab, zee mkee xaa tub gal tab naz ta yat. 24 Nu mdexkwaa xaa tub choo kwaan zo niiya lo, kwaan nak plat, nu kad tuba nkanoya chop kwaan zo niiya nu mloo leen xaa rese xana zee zena. 25 Mdexkwaa xaa stub gal tab kwaan zoli cho yoo naz ta ya. 26 Nu mdexkwaa xaa tub choo kwaan zo niiya lo, kwaan nak plat, nu kad tuba kanoya chop kwaan zo niiya lo, nu mloo leen xaa rese xana zee zena. 27 Nu lee stub ta cho yoo naz pa naz nyaz mbizh, mzoli xaa stub xoop tab. 28 Nu lee ropse skin naz ticha mzo xaa chopga tab. 29 Nu ropse tab ne mchaal xaa axta xana nu axta yeka, nu noka mdexkwaa xaa kwaan zena, nu snee mdexkwaa xaa tab kwaan mzoli skina. 30 Nu mdexkwaa xaa tub xon tab, nu tub chiinmtub xana, kwaan nak plat, kad tuba mkanoya chop niiya.
31 Nu mdexkwaa xaa gaay yag cheen meskit kwaan nke nkaan cho yoo, zee zena tab. 32 Nu zgaaya nke nkaan stub ta cho yoo zee zena tab, nu zgaaya nke nkaan paro zena tab naz ticha, naz pa nyaz mbizh. 33 Nu lee yag kwaan nke nkaan paro nzena saaw tab nzhaal zhin tub ta nu axta stub ta cho yoo. 34 Noka mteeb xaa or cho re tab, nu noka cho argoy, noka cho yag kwaan nke nkaan, kwaan nded leen argoy, mdeeb or cho.
35 Sbaaka mdexkwaa xaa ler kwaan na sul, naxne nagaas, naxne, nu ler kwaan chul doo nzhak, nu mkee xaa kwaan nyun kwenta mandad cheen Xaa Tubka Nak choya, kwaan le kerubin kwaan mdexkwaa xaa chul doo nzhak. 36 Zee mdexkwaa xaa tap yiso, kwaan nak yag meskit, nu rese mteeb xaa or cho, zee kenga xaaya. Nu kwaan plat mdexkwaa xaa pa zo xana. 37 Nu noka mdexkwaa xaa ler kwaan yaaw roo yoo kwaan ler sul, ler naxne nagaas, ler naxne, nu ler kwaan non doo, kwaan chul doo mtib xaa. 38 Nu mdexkwaa xaa stub gaay yiso nu yeka kwaan chul nlu, nu xngencha, nu mteeb xaa or cho rese. Nu mdexkwaa xaa gaay xan yiso kwaan brons.