Xomod nzhaal za xaa li Xaa Tubka Nak
35
Mrezh Ches rese xaa yezh, xaa Israel, nu nzhé xaa:—Kwaane mnabeyy Xaa Tubka Nak le be: 2 "Xoop mbizh ke gu zhiin, lee mbizh gazh gak tub mbizh nzhul lo re gu, nu gool gu lo na, Xaa Tubka Nak; nu loka xaa ke zhiin mbizh ne yet xaa. 3 Nu nixa nik tub gu nyent mod koo ki garli mbizh ne.
4 Nu snee nzhé Ches lo re xaa Israel:
—Kwaane mnabeyy Xaa Tubka Nak le be. 5 Kad tub xaa zaa tub gon lo na, Xaa Tubka Nak, loka mod nzhala leen lextoo xaa. Yiidno xaa or, plat, nu brons; 6 nu ler sul, nu ler naxne nagaas, nu ler naxne, nu ler kwaan non doo, nu kwaan nak ler yich led chib; 7 nu noka yed cheen mbakxiil kwaan mgoo naxne, nu stub yed ma kwaan chul doo nzhak, nu yag meskit; 8 nu nseyt kwaan zeek bruj, nu kwaan chul doo nzebech zhaal kwaan nseyt kwaan nle nzhul, nu yaal kwaan chul nzebech; 9 nu ke kwaan le onise nu re ke chul kwaan nke lo kwaan nzhak mod mandil cheen ngwleyy nu noka kwaan kee laz xab xaa.
10 Rese xaa nkano yalnzhak, xaa nzhak ndexkwaa re kwaan, nzhaal yiid xaa dexkwaa xaa kwaan mnabeyy Xaa Tubka Nak: 11 yoo kwaan gak li Xaa Tubka Nak, nu kwaan saaw yeka, nu ngench kwaan zena, nu dexkwaa xaa re kwaan kee choya, nu re yag kwaan kwib yeka, dexkwaa xaa yiso, nu paro zo xana. 12 Nu dexkwaa xaa kaj cheen trat nu bar kwaan zen xaa, nu tap cheena nu ler kwaan yaaw choya. 13 Nu noka dexkwaa xaa mes nu bar cheena kwaan zen xaa, nu rese kwaan le xchiin xaa loya, nu yat kwaan zhiib xaa lo mes lo na. 14 Nu dexkwaa xaa bruj nu rese xcheena kwaan zaa xni nu nseyt kwaan zeeka, zee zaaya xni. 15 Nu dexkwaa xaa mdo pa zeek xaa yaal, nu bar cheena kwaan zen xaa, nu nseyt kwaan nle nzhul, nu yaal kwaan chul nzebech, nu ler kwaan yaaw roo li Xaa Tubka Nak. 16 Nu noka dexkwaa xaa mdo pa zeek xaa ma, nu kwaan brons dexkwaa xaa pa kwib ma zeek xaa, nu dexkwaa xaa bar kwaan zen xaa, nu re kwaan nle xchiin xaa loya. Noka dexkwaa xaa chee nu pa kwiba. 17 Nu noka dexkwaa xaa ler kwaan nsaaw lach jwer li xaa, nu yiso cheena, nu kwaan zo xana, nu ler kwaan ke pa nzeb xaa roo lach li xaa, nu re doo cheena, nu stak cheena, nu rese kwaan lexchinn xaa leen li Xaa Tubka Nak. 18 Nu noka dexkwaa xaa stak kwaan zo lo yo, nu doo kwaan zen kwaan gak li Xaa Tubka Nak, nu kwaan xsaw lach li xaa. 19 Nu dexkwaa xaa ler kwaan gak ngwleyy gorna zo xaa pa nambey, nu ler kwaan nzhul kwaan gak ngwleyy Aarón, nu ler kwaan gak re xgann xaa gorna zo xaa gak xaa ngwleyy.
Gon kwaan mzaa re xaa yezh
20 Nu zee rese xaa Israel mbachi lo Ches. 21 Nu rese xaa ngulaa gon lo Xaa Tubka Nak, modxa nzhala lextoo xaa, zee yaa li xaa kwaan nak yed, nu rese kwaan nkin leena, nu ler nambey. 22 Zee ngwa re xaabyi, nu re ngwnaa, ngulaa re kwaan chul doo nzhak: kaden kwaan nyu yenn xaa, aret, ani, nu bga, nu rese kwaan nak or. Kwaane ngok gon kwaan ngulaa xaa lo Xaa Tub Nak. 23 Nu rese xaa nkano ler sul, ler naxne nagaas, nu naxne, nu ler kwaan non doo, kwaan nak ler yich led chib, nu yed cheen mbakxiil kwaan mgoo naxne, nu stub yed ma kwaan chul doo nzhak ngulaa xaa lo Xaa Tub Nak. 24 Nu loka xaa nzho mod zaa gon kwaan nak plat, nu brons, mzaa xaaya lo Xaa Tubka Nak. Nu seeka rese xaa kwaan nkano yag meskit noka ngulaa xaaya zee dexkwaa xaa re kwaan lexchinn leen li na. 25 Nu rese ngwnaa, me nzhak ndexkwaa re kwaan kwaan yaa me, dexkwaa me ler sul, nu ler naxne nagaas, nu ler naxne, nu ler kwaan non doo, zee ngulaa meya lo Xaa Tubka Nak. 26 Nu me kwaan nzhak ndexkwaa ler yich led chib, kwaan dub lextoo me mdexkwaa meya. 27 Nu lee re xaa non yiidno ke kwaan le onise nu re stub naz ke chul, zee kee xaaya cho kwaan nzhak mod mandil cheen ngwleyy nu kwaan kee laz xab xaa. 28 Nu noka ngulaa xaa nseyt kwaan nzek bruj, nu kwaan chul doo nzebech zhaal kwaan nseyt kwaan nle nzhul, nu yaal kwaan chul nzebech. 29 Rese xaa Israel, xaabyi nu ngwnaa, mzaa xaa re kwaan nzhal lextoo xaa kwaan nle xchinn xaa, kwaan ngunaab Xaa Tubka Nak lo Ches, zee ngulaa xaa gon kwaan nzhal lextoo xaa lo xaa.
30 Zee lee Ches nzhé lo re xaa Israel:
—Wii, lee Xaa Tubka Nak mleey Bezaleel xgann Uri xos Ur, xaa nak lo dii cheen Judá. 31 Nu Mbi Naban cheen Dios nabeyy lo xaa, nu mzaa xaa yalnzhak lo xaa, zee yo doo yek xaa, nu kano xaa gro doo yalnzhak dexkwaa xaa rese kwaan. 32 Nzhak xaa ndexkwaa xaa rese kwaan nak or, plat, nu kwaan nak brons, nu xomod nkee xaa dibuj choya. 33 Nu noka nzhak xaa nke xaa zhiin kwaan re ke, kwaan chul doo nzhak, nu ndexkwaa xaa re kwaan chul doo nzhak kwaan ke, nu noka nzhak xaa ndexkwaa xaa re kwaan nak yag. 34 Mzaa Xaa Tubka Nak yalnzhak zee seed xaa stub naz xaa. Nu noka mzaa xaaya lo Aholiab xgann Ahisamac, xaa nak lo dii cheen Dan. 35 Nu mzaa xaa lo xaa yalnzhak zee chul doo tib xaa rese kwaan, zee dexkwaa xaa re kwaan nak ler sul, ler naxne nagaas, nu naxne, nu ler kwaan chul doo nzhak, nu re ler kwaan nkano rese lo dibuj lo.