Ke kwaan mkee ley lo
34
Lee Xaa Tubka Nak nzhé lo Ches:—Bchoog chop ke tab kwaan lal ne mod kwaan yilotlaka, zee kee na re wdizh kwaan mkeela na lo kwaan mlux lu yilo. 2 Nu list zo lu yee garziil zee yixoob lu yek Yi Sinaí pa mas ya nzeb, nu baa kwaz lu na. 3 Nu nik tub xaa nyent mod yixoob kwaan lu, nu nixa nik tub ma nyent mod zo dub welt cho yi, nixa mbakxiil nu nixa ngoon, nyent mod zo cho yi. 4 Zee lee Ches mdexkwaa chop ke kwaan lal ne mod kwaan yilo, nu garziil doo stub mbizh nguxoob xaa yek Yi Sinaí nu mbe xaa rop ke tab, modxa mnabeyy Xaa Tubka Nak lo xaa. 5 Nu lee Xaa Tubka Nak mla leen tub xkaw axta paro nzo Ches, nu mzet xaa le xaa. 6 Zee lee Xaa Tubka Nak mdedyo lo Ches nu nzhé xaa:
—¡Na nak Xaa Tubka Nak! ¡Na nak Xaa Tubka Nak! Na nak Dios xaa ngezh doo, xaa nkano doo yalnles nu yalwen; nu nen doo yii na, nu gro doo yalnkela cheen na nu telise le na kwaan nii na. 7 Lee yalnkela cheen na tubka gak lo zyen doo mil xaa nu che na xjwalt xaa nu yenlezh kwaan nawent kwaan mle xaa. Per noka naab na kwent cheen xaa tuka nle jwalt nu teed na bid lee xaa, xinn xaa nu xos nu xiin xos xaa nu xiin xiin xos xaa.
8 Zee lee Ches, liger doo mkichxub nu mla lachuzh xaa axta lo yo, nu mbill xaa lo Dios. 9 Nu nzhé xaa:
—Xaa Tubka Nak, chelee lu wlipa nyakla lu ne lu na, bzo xsaw lo re nu, nu bze kwaan nu, nixa nak nu tub yezh ned doo, che rese jwalt cheen nu nu bkayaa nu mod tub yezh cheen lu.
10 Zee lee Xaa Tubka Nak nzhé:
—Nal le na tub trat lo re gu, nu le na tub kwaan gro doo lo re xaa yezh, kwaan nik tub welt zer le na lo re yezh dubse yizhyo, nu rese yezh kwaan nzhi gax lo lu, ne kwaan gro doo le na, Xaa Tubka Nak, nu dedyall re xaa wii lo re kwaan le na lo lu.
11 &Chelee lu le lu rese kwaan ngunii na nal, nu lee na ko rese yezh kwaan nalet kwaan nii na, xaa Amorreo, xaa Canaán, xaa Het, xaa Ferezeo, xaa Heveo nu xaa Jebús.
12 &Nalet lu nik tub trat lo re yezh pa ya lu, napa kakiil xaa lu. 13 Nu lux lu lo mdo cheen xaa pa nambey, nu blee re ke kwaan mdexkwaa xaa maj, nu blux rese maj Asera kwaan nak cheen xaa.
14 &Nu nakichxubt lu lo nik stub dios, nel lee na, Xaa Tubka Nak, nak tub Dios selos. 15 Nu nalet lu nik tub trat lo re xaa stub yezh, nel napa kakiil xaa lu wii lu lo xtios xaa nu laa gu na, nu kayaw lu kwaan mted xaa lo xmaj xaa. 16 Nu né xaa lo gu: "Ka xgann gu xchaap nu", per chelee xaa ka xaa me, zee gorna lee me gool lo xtios me, zee noka xgaan gu gool lo xtios me, nu snee laa xaa na.
17 &Nu nixa nadexkwaatra lu nik tub maj.
Yalni kwaan nzhaal le xaa yizata liin
18 &Noka ble yalni cheen yat kwaan nayut lebadur leen, nu gaka modxa mnabeyy na gu. Daw yat kwaan nanzhot lebadur leen dubse tub gazh mbizh, zhe kwaan nzhaal le luya mbee Abib, nel mlo na re gu Egipto mbee Abib.
19 &Rese xaa kwaan ngol yilotlaka gak xaa na: Nu sbaaka re xiin xkoon gu ma yilotlaka, mbakxiil, nu rese ma mach. 20 Nu gorna gal tub ngwes yeen zee nzhaal zaa lu tub mbakxiil yeen o tub chib xlugar ngwes. Nu chelee lu nazaat lu mbakxiil zee tira kich lu yenn ngwes zee yet ma. Per lo re xgaan lu, xaa yilo, nzhaal zaa lu tub ma xlugar xaa, nanzhaalt yiid lu lo na chelee lu nik tub kwaan nanzenot lu.
21 &Xoop mbizh ke lu zhiin wen, nu lee mbizh gazh nalet lu nik tub kwaan, nixa nkano doo lu zhiin.
22 &Nu noka le lu yalni cheen sman, kwaan roo yalgon cheen nzhobxtil, nu le lu stub yalni kad yek liin gorna yilo toop lu rese xle.
23 &Rese xaabyi yiid lo na chon welt tub liin, na nak Xaa Tubka Nak, Dios cheen re xaa Israel, Xaa Nabeyy lo gu. 24 Na ko rese xaa stub yezh paro nzho gu, zee gak narora yizhyo cheen gu. Nu nyent cho zoblazh xkyizhyo gu, gorna lee gu yixoob chon welt kad liin zhaal gu kwaan na, Xaa Tubka Nak, xaa nak Xtios gu.
25 &Gorna teed lu ma lo na, nachaalt lu xren ma kwaan yat kwan nyu lebadur leen, nu nixa nakozhawt lu baal kwaan lake stub mbizh lo yalni cheen Paskwa.
26 &Nkin wee lu xle yilotlaka kwaan zaa xkyizhyo lu garli Xtios lu Xaa Tubka Nak. Nu nankint seyey lu mit leen xizh xnaa ma.
Ches nu ke kub kwaan mkee ley lo
27 Lee Xaa Tubka Nak nzhé lo Ches:
—Kee rese wdizh ne, nel kwaan wdizh ne le na tub trat lo lu, nu lo re xaa Israel.
28 Nu mzo Ches kwaan Xaa Tubka Nak tub choo mbizh nu tub choo yaal, nu nandawt xaa nik tub kwaan, nu nixa nangut xaa nis. Baa mkee xaa re wdizh cheen trat lo ke tab, nu re chii wdizh kwaan nzhaal le xaa.
29 Nu gorna mla Ches yek yi Sinaí nyaadno xaa ke tab kub kwaan nkee ley lo, nu mla xni garlo xaa nel mbadizhno xaa Xaa Tubka Nak, nu namzent xaa nla xni garlo xaa. 30 Aarón nu re xaa Israel mwii lo xni kwaan mla garlo Ches, nu mzheb doo xaa ngbii gax xaa lo xaa. 31 Zee lee Ches mrezh Aarón nu re xaa non lo re xaa yezh, zee bii gax xaa, zee ngunii Ches lo xaa. 32 Zee lee rese xaa Israel mbii gax lo Ches, nu lee xaa nzhé rese kwaan mnabeyy Xaa Tubka Nak lo xaa yek yi Sinaí 33 Gorna ngulo ngunii Ches lo re xaa, nu msaaw xaa garlo xaa kwaan tub lee ler. 34 Rese welt gorna lee Ches nya wdizhno Xaa Tubka Nak, zee nkib xaa ler garlo xaa axta gorna nroo xaa, nu nii xaa rese kwaan mbezh xaa lo xaa kwaan le re xaa Israel. 35 Nu gorna ngwii re xaa Israel garlo Ches, nu nyun nla xni garlo xaa, zee mbare xaa nsaaw xaa ler garlo xaa stuba, lee gorna nrep xaa wdizhno Xaa Tubka Nak zee nkib xaa ler garlo xaa.