Dios myenlazh kwaan mle yezh cheen xaa
33
Xaa Tubka Nak nzhé lo Ches:—Broo nee, kwaan re xaa lazh lu, xaa mloo lu Egipto, nu gwa gu naz yizhyo kwaan mcheroo na za na lo Abraham, Chak nu Kob gorna nzhé na lo xaa: "Lo re dii cheen lu za na yizhyo ne" 2 Na xaal mandad cheen na yilo lo lu, xaa luu naz lo lu, nu koo na re xaa Canaán, re xaa Amorreo, re xaa Het, re xaa Ferezeo, re xaa Heveo nu re xaa Jebús. 3 Gwa gu naz Canaán yizhyo pa nxonn nizh nu mzhin mod nis, per nayat na kwaan gu, nel napa kalux na gu naz, nel gu nak tub yezh ned doo.
4 Lee re xaa yezh nales doo ngok lextoo gorna mbin re wdizh gaya ne, nu nik tub xaa nambet kwaan nak or. 5 Nel lee Xaa Tubka Nak nzhé lo Ches:
—Guzh lo re xaa Israel: "Gu nak tub xaa ned doo, chol na ngzo lo re gu cheepse, nglux re gu. Lee nal kiib or kwaan nzhe gu, zee ne na cho kwaan le na kwaan re gu."
6 Zee lee re xaa Israel mleche xab kwaan chul doo nzhak xan yi Sinaí axta Canaán.
7 Zee lee Ches mbe yoo ler tub pa zit, lo paro mbaz re xaa, nu mloole xaa yoo ler ne, "yoo pa nzhaal xaa kwaan Xaa Tubka Nak." Lee gorna lee tub xaa nzhekla ya nabdizh lo xaa, zee nya xaa leen yoo ler kwaan nzob zit paro mbaz re xaa.a 8 Kad welt gorna nroo Ches leen yoo ler cheen xaa, nu zee lee re xaa yezh nroo leen yoo ler cheen xaa paro nzho re xaa nu zheta nzoli re xaa ngwii xaa lo Ches, axta gorna yilo rep xaa leen yoo ler paro nzhaal xaa kwaan Dios. 9 Nu gorna lee Ches nrep leen yoo ler nu lee xkaw kwaan nlu kwenta tub mdun ndok nzo roo yoo ler paro nzhedizh Xaa Tubka Nak kwaan Ches. 10 Nu gorna ne re xaa yezh lee xkaw kwaan nlu kwenta mdun ndok nzoli roo yoo ler, zee nkichxub xaa roo yoo ler cheen xaa, axta nla lachuzh xaa lo yo, nu nzholl xaa lo Xaa Tubka Nak. 11 Zee lee Xaa Tubka Nak ngunii lo Ches snee sneepa modxa nzhedizh xaa kwaan wechxinn xaa, zeera mbare xaa pa nzhi re xaa per lee tub xaa mad le Josué, xgaan Nun, xaa nle yud xaa, nu tira nanroot leen yoo ler. 12 Zee lee Ches nzhé lo Xaa Tubka Nak:
—Wii, lu né lo na: "Bloo re xaa yezh ne". Per nangunét lu lo na cho xaa ya kwaan na. Nebse ngune lu lo na: "Nlabeyy na lu, nu nyakla na ne na lu". 13 Lee nal, chelee lu wlipa ngwii lu lo na sbaa, blu xnaz lu lo na zee ne na wli luya, zee wenra wii na lo lu. Nu nayenlazht lu, lee re xaa ne nak yezh cheen lu.
14 Lee Xaa Tubka mkeb nzhé:
—Na ya kwaan lu zee naletra lu xgab.
15 Zee lee Ches mkeb nzhé:
—Chelee lu nayat lu kwaan nu nalaat lu roo nu nee. 16 Nu nanzakt re xaa lee lu nyakla ne na, na nu yezh cheen lu, nu mloxcho lu nu lo re stub naz yezh lo yizhyo.
17 Zee lee Xaa Tubka Nak nzhé:
—Noka le na re kwaan ngunii lu lo na, nel nkela na lu nu nlabeyy na lu.
18 Zee lee Ches nzhé:
—Laa wii na lo xni cheen lu.
19 Nu lee Xaa Tubka Nak mkeb nzhé:
—Nal lu na rese yalwen cheen na lo lu, nu nii na le na lo lu, nu nkano na yalnles lo xaa kwaan nzhekla na kano na yalnles nu nkela na xaa nzhekla na kela na. 20 Per nyent mod wii lu garlo na, nu loka tub xaa lach lo na yet xaa.
21 Zeera lee Xaa Tubka Nak nzhé: