Kwaan or mdexkwaa xaa ngoon yeen
32
Gorna ne re xaa Israel nyentaka Ches bare nzha yek yi zee mkasa re xaa lo Aarón nu nzhé xaa:—Bdexkwaa tub dios, xaa luu naz lo be, nu kanap xaa be. Nex Ches, nel nanet be cho kwaan ngok lo xaa, xaa mloo be naz Egipto.
2 Zee lee Aarón mkeb nzhé:
—Gunaab gu re aret or kwaan nke nzha xngwnaa gu, xgaan gu nu re xchaap gu, zee teno guya lo na. 3 Nu rese xaa mleya nu mbe xaaya lo Aarón. 4 Aarón mkayaa rese kwaan nak or nu mseyall xaa or nu mdexkwaa xaa tub maj mod tub la ngoon yeen. Nu gorna mwii re xaa lo maj kwaan mdexkwaa Aarón zee lee re xaa sawlazh be nzhé:
—¡Sawlazh be, lee xtios be, xaa mloo be Egipto nee!
5 Nu gorna ngune Aarón re kwaan mle re xaa yezh, zee mdexkwaa Aarón tub mdo delant lo ngoon yeen. Zee nzhé xaa lo re xaa:
—¡Yee gak tub mbizh kwaan le be yalni lo Xaa Tubka Nak!
6 Nu gorna nguni yizhyo stub mbizh nguxche re xaa garziil doo, nu mzek xaa ma zee zhe jwalt cheen xaa nu mzaa xaa gon zee kwi wen xaa kwaan xtios xaa. Nu zeera mzob re xaa ndaw, nu ngu xaa, nu mkani re xaa. 7 Zee lee Xaa Tubka Nak nzhé lo Ches:
—La nel lee re xaa yezh, xaa mloo lu Egipto, ngulola nguyo xaa, 8 nu mlaa xaa naz kwaan nzhé na lo xaa. Nu mdexkwaa xaa tub la ngoon yeen kwaan nak or nu nzholl re xaa lo ma, noka mted xaa ma lo ngoon yeen, nu nzhé re xaa: "Sawlazh be, kwaane nak xtios be, xaa mloo be Egipto".
9 Nu noka nzhé Xaa Tubka Nak lo Ches:
—Ne na lee re xaa yezh ne ned doo. 10 Lee nal nayii doo na ne na re xaa, nu laa lux na re xaa, per lee dii cheen lu le na tub yezh naro doo.
11 Zee lee Ches mdizhno Xaa Tubka Nak, xaa nak Xtios xaa nu nzhé xaa:
—¿Xtios na, chozhiin yii lu ne lu re xaa yezh cheen lu? ¿Che naleet leeka lu mloo re xaa naz Egipto kwaan yalngezh nu kwaan yalnabeyy cheen lu? 12 ¿Che nel nzhekla lu lee re xaa Egipto yé: "Lee Xaa Tubka Nak mloo re xaa tub mod nawent, nu gut xaa xaa naz wen zee tira lux re xaa lo yizhyo ne? Nayiitra lu tant nu laa naluuxt lu re xaa yezh cheen lu. 13 Bzelazh kwaan myaan lu kwaan Abraham, Chak nu Kob, xaa mke zhiin lo lu, gorna mcheroo lu lo xaa nu nzhé lu: "Na le zee gak zyen doo re dii cheen lu kwenta re mbal, ma nzob naz yiba; nu za na lo re dii cheen lu yizhyo kwaan nguni na za na lo re gu, zee tira gaka xcheen xaa".
14 Kwaanzee lee Xaa Tubka Nak mlaa namletra xgab luux yezh cheen xaa kwaan nzhé xaa luux xaa. 15 Ches mbare ngwa yek yi stuba nu nyaadno xaa rop ke kwaan nke ley lo, rop ta. 16 Leeka Dios mdexkwaa ropse ke mod tab nu leeka lee xaa mkee kwaan loya. 17 Gorna lee Josué mbin rezh kwaan mkee re xaa yezh zee nzhé xaa lo Ches:
—Nzhon na mod xaa kadil mbazhe re xaa, pa mbaz be.
18 Zee lee Ches mkeb nzhé:
—Nanzhollt re xaa mod xaa mle gan, nixa mod xaa namlet gan, stub naz kwaan nzholl re xaa.
19 Gorna lee Ches mzhin pa nzhi re xaa nu mlu ngoon yeen nu re xaa kakani lo xaa, zee mrixyan doo xaa nu mlebi xaa ke kwaan nke ley lo nu mle byog xaaya xan yi. 20 Zeera mzen xaa ngoon yeen nu mzek xaa ma lo ki nu mzoog xaa ma axta ngok ma yide. Nu lee yide cheen ma mchuun xaa leen nis nu mzaa xaaya ngu re xaa Israel. 21 Nu lee Ches nzhé lo Aarón:
—¿Cho kwaan mle re xaa yezh ne lo lu zee mle lu mle re xaa tub jwalt naro doo?
22 Zee lee Aarón mkeb nzhé:
—Nayiit lu xaa nabeyy na. Lu ne lee re xaa yezh nyula doo nle kwaan nawent. 23 Re xaa né lo na: "Bdexkwaa tub dios, xaa luu naz lo be, nu kanap xaa be. Nex Ches, nel nanet be cho kwaan ngok lo xaa, xaa mloo be naz Egipto". 24 Lee na mkeb lo re xaa: "Loka cho nkano or bloo guya". Lee re xaa mza or lo na nu lee na mchepa lo ki zee ta mreke tub la ngoon yeen.
25 Gorna lee Ches mlaach lee re xaa yezh ngok mod xaa mgan yek nu lee Aarón nangarlot ngle zee ngak re xaa zheta; nu kwaane mle zee mxizhno re xaa xaa, nel nayii re xaa ne xaa. 26 Zee mzo xaa roo paro mbaz re xaa nu nzhé xaa:
—Loka cho nzho xta Xaa Tubka Nak, te gu lo na.
—Snee né Xaa Tubka Nak, Xtios re xaa Israel: "Kad tub gu kee xspad gu garlen gu, nu bare gu paro nzhi re xaa nu gwa gu roo tubga yoo nu bit gu wech gu, xmig gu nu sawlizh gu".
28 Lee re dii cheen Leví mle re kwaan mnabeyy Ches xaa, nu lee mbizh zee ngut kan chon mil xaabyi. 29 Zee lee Ches nzhé lo re dii cheen Leví:
—Nalzhe ngok nambey gu lo Xaa Tubka Nak, nu lee xaa nii wen lo gu nel kad tub gu ngok nambey kwaan xren xinn o xren wech gu.
30 Lee nguni yizhyo stub mbizh nzhé Ches lo re xaa yezh:
—Gu mle tub jwalt naro doo, per nal yixoob na paro nzo Xaa Tubka Nak; zee nel che zyenlazh xaa jwalt kwaan mle gu. 31 Zee lee Ches mbare nzha paro nzo Xaa Tubka Nak nu nzhé xaa:
—Wlipa mle re xaa ne tub jwalt naro doo nel mdexkwaa xaa tub dios or; 32 kwaanzee naab na lo lu che lu xjwalt xaa nu chelee lu nachet luya, zee bche le na lo yech kwaan mkee lu.
33 Per lee Xaa Tubka Nak mkeb lo Ches nzhé:
—Loka xaa nle jwalt lo na, xaa zee che na le lo yech cheen na. 34 Lee nal zyaa nu be re xaa yezh ne, paro ni na lo lu. Lee mandad cheen na luu naz lo lu, per gorna zhin mbizh ted na re xaa bid, zee chazi na xaa kwent cheen re jwalt kwaan mle xaa.
35 Nu lee Xaa Tubka Nak mxaal tub yalyizh lo re xaa yezh nel mbill re xaa lo ngoon yeen or, ma mdexkwaa Aarón.