Re xaa dexkwaa li Xaa Tubka Nak
31
Ngunii Xaa Tubka Nak lo Ches nu nzhé xaa:2 —Na mleey Bezaleel xgaan Uri nu xos Hur, xaa nze lo dii cheen Judá. 3 Nu na mza Mbi Naban cheen na nabeyy lo xaa, nu mza na yalnzhak lo xaa, zee yo doo yek xaa, nu kano xaa gro doo yalnzhak dexkwaa xaa rese kwaan. 4 Nzhak xaa ndexkwaa xaa rese kwaan nak or, plat nu kwaan nak brons nu xomod nkee xaa dibuj choya. 5 Nu noka nzhak xaa nkee xaa zhiin kwaan re ke, kwaan chul doo nzhak, nu ndexkwaa xaa re kwaan chul doo nzhak kwaan ke, nu noka nzhak xaa ndexkwaa xaa re kwaan nak yag. 6 Noka mleey na Aholiab xgaan Ahisamac xaa nze lo dii cheen Dan, zee le xaa yud Bezaleel. Nu rese xaa le yud xaa, na le zee yo doo yek xaa nu kano xaa yalnzhak. 7 Dexkwaa xaa: li na, nu kaj cheen trat, nu noka kwaan yaaw roo kaj, nu re kwaan nkin leen li na, 8 nu mdo nu re kwaan nle xchiin xaa loya, bruj kwaan nak or nu re kwaan nle xchiin xaa loya, nu lo mdo pa zeek xaa yaal. 9 Nu noka dexkwaa xaa: mdo pa teed xaa ma nu rese kwaan nkin loya, chee nu noka pa kwiba, 10 nu noka re ler, kwaan nambey, kwaan gak ngwleyy Aarón nu re xgann xaa, kwaan gak xaa gorna zo xaa mod ngwleyy pa nambey nak, 11 nu re nseyt kwaan le nzhul, nu yaal kwaan chul nzebech kwaan zeek xaa leen li na Pa Nambey. Nu rese xaa le rese kwaane mer mod mnabeyy na xaa le xaa.
Zhe xab gak tub mbizh kwaan selazh gu
12 Nu lee Xaa Tubka Nak, ngunii lo Ches nu nzhé xaa:
13 —Nii lo re xaa Israel, nu guzh lo re xaa zee kozhaw xaa zhe sab, nel kwaane nak tub nseyn lo re gu nu lo na, nu lo re dii cheen gu zee ne re gu lee na nak Xaa Tubka Nak, nel na mle nambey gu. 14 Zhe sab nak tub mbizh nambey lo re gu, nu nzhaal kozhaw gu mbizh ne; xaa kwaan nanlenont mbizh ne nkin yet xaa, nu xaa kwaan ke zhiin mbizh ne koo xaa xaa yezh. 15 Xoop mbizh ke xaa zhiin nu lee mbizh gazh nik tub kwaan nalet xaa, nel mbizh ne nak tub mbizh nambey cheen Xaa Tubka Nak. Nu xaa ke zhiin mbizh ne telise yet xaa. 16 Kwaanzee rese xaa Israel nkin kozhaw zhe sab, tub dii nu stub dii, kwaane nak tub trat kwaan naluxt. 17 Mbizh sab gak tub nseyn kwaan naluxt lo na nu lo re gu xaa Israel, nel na Xaa Tubka Nak xoop mbizh mdexkwaa na yizhyo nu yiba nu lee mbizh gazh mlaz na nu nik tub kwaan namlet na.
18 Gorna lee Xaa Tubka Nak ngulo ngunii lo Ches yek Yi Sinaí, nu mzaa xaa chop ke kwaan nkee xtizh xaa lo, mer kwaan mkee kwaan kwen yaa Dios.