Mdo kwaan zeek xaa yaal
30
&Nu dexkwaa tub mdo kwaan yag meskit, paro zeek xaa yaal. 2 Nu gak nolla tub zhit yaa xaa, nu gak nanyaga tub zhit, lal gak ta nanyag kwaan ta naxen, nu zeeba chop zhit yaa xaa. Leeka choya roo xkacha. 3 Nu rop ta cho mdo teeb gu or, nu noka teeb gu or cho xkacha, nu noka kwaan or kee gu dibuj dub welt xkwesa. 4 Noka dexkwaa gu chopga argoy or kwaan zob skina pa teed xaa bar zee nzho mod wee xaaya. 5 Dexkwaa gu bar kwaan yag meskit nu teeb gu or choya. 6 Nu zob lu mdo naz jwer lo ler paro nzo kaj cheen trat, nu lo kwaan nyaaw roo trat, paro zhaal na lu. 7 Yizata garziil gorna lee Aarón yasewii lo re bruj, zee noka zeek xaa yaal kwaan nax nzebech loya; 8 nu noka zeek xaa yaal gorna nzezhel yizhyo, gorna kee xaa xni. Tubka zeek xaa yaal lo na, Xaa Tubka Nak, rese mbizh lo rese liin. 9 Nazeekt lu lo mdo yaal kwaan nanakta xkaal na, nixa nateedt lu nik tub ma lo mdo, nu nixa nazaat lu gon cheen nzhobxtil, nu nixa naxot lu xis ub lo mdo. 10 Yizata liin lee Aarón le nzhul lo mdo. Gut xaa ma kwaan che xjwalt re xaa, zee nzhaal teeb xaa xren ma cho kach. Nu tira sbaa nzhaal le xaa rese liin, nel nzhul doo gak mdo lo na, Xaa Tubka Nak.Demi kwaan kix xaa lo Dios zee nayeta xaa
11 Noka ngunii Xaa Tubka Nak lo Ches nu nzhé xaa:
12 —Gorna toop lu le re xaa Israel, zee ne lu nel lak nak xaa, nu kad tub xaa nzhaal zaa tub gon lo na, zee naguta na xaa, nu nixa naxalt na tub yalyizh kwaan nakap lo xaa. 13 Rese xaa ke le, nzhaal zaa xaa gaay gram plat lo na, Xaa Tubka Nak, mod nchiix xaa re kwaan leen li na. 14 Rese xaa nzho tub gal liin naz delant ke le xaa, nu nzhaal zaa xaa gon lo na. 15 Nixa rik xaa nu nixa proob xaa, lal zaa xaa gon zee naguta na xaa. 16 Kayaa re gon kwaan zaa re xaa Israel, kwaan le zee naguta na xaa, zee zaa xaaya dexkwaa re kwaan garli na, kwaane le zee selazh re xaa Israel na, nel mdix xaa zee naguta na xaa.
Chee cheen nis
17 Lee Xaa Tubka Nak seetaka kanii lo Ches nu nzhé xaa:
18 —Dexkwaa lu tub chee paro yanag xaa nu pa kwiba kwaan gak brons, nu noka niiya gak brons nu zob luya xsaw leen li na nu lo mdo, noka tezhe lu nis leena. 19 Nu leena ko xaa nis yanag xaa nu zet xaa nii xaa, Aarón nu re xgann xaa, 20 nzhaal yanag xaa kwaan nis gorna zeeb xaa leen li na zee zhaal xaa kwaan na, nu gorna bii gax xaa lo mdo paro teed xaa ma lo na, sbaa zee nayeta xaa. 21 Yanag xaa nu zet xaa nii xaa zee nayeta xaa. Nu tubka gak ley ne lo re xtii gu tira.
Nseyt kwaan nle nzhul
22 Lee Xaa Tubka Nak seetaka kanii lo Ches nu nzhé xaa:
23 —Kwey rese yag kwaan chulra nzebech lo re yag: tub xoop kil mirra, chon kil kanel, nu chon kil nit kwaan chul nzebech; 24 xoop kil kasia, modxa nchiix xaa leen li na, nu chon litr yirol nseyt olib. 25 Rese kwaane yo lo nseyt zee gaka nseyt kwaan nle nzhul, modxa ndexkwaa xaa perfum, sbaaka dexkwaa gu tub perfum kwaan chul doo nzebech, kwaan dexkwaa xaa nzhak ndexkwaaya. Nu kwaane gak nseyt kwaan le nzhul xaa. 26 Nu leeya nzhaal teeb lu cho li na, nu kaj cheen trat, 27 nu teeb luya lo mes nu re kwaan nle xchinna, nu bruj nu re xcheen na, nu mdo paro nzek xaa yaal, 28 nu teeb luya lo mdo paro zeek xaa ma nu rese xcheena nu noka chee cheen nis. 29 Snee le nzhul re kwaane zee gak nzhul doo reya; zee lee rese kwaan nu rese xaa gal choya noka gak nzhul.
30 &Noka teeba cho Aarón nu cho re xgann xaa, zee gak nzhul xaa nu gak xaa xngwleyy na. 31 Gunii lo re xaa Israel nu guzh snee: "Kwaane gak nseyt kwaan le nzhul xaa xaa re xtii gu tira. 32 Nateebt luya cho stub naz re xaa sbaasa, nu nixa nadexkwaat gu stub lo nseyt kwenta kwaane, nel naka tub nseyt nzhul, nu naka nebse cheen na. 33 Nu cheleeya nzho cho dexkwaa nseyt kwenta kwaane, nu teeb xaaya cho stub xaa sbaasa, zee koo re xaa xaa yezh."
34 Noka nzhé Xaa Tubka Nak lo Ches:
—Zen rese lo yag kwaan chul nzebech xup, nu chaal re kwaane: duur, koncha, galbanob, nu noka yaal, nu rese lo kwaane lal gak. 35 Rese kwaane yo lo yaal, zee gaka yaal kwaan chul nzebech, modxa ndexkwaa xaa perfum. Nu cheep lu zed leena zee gaka yaal nambey. 36 Lan zoog rola, nu bleka delant lo kaj cheen trat paro zhaal na kwaan lu. Re yaal ne gak nambey doo lo gu. 37 Nu nixa nadexkwaat gu yaal nzhul ne zee le xchiin guya, nel naka nebse cheen na, Xaa Tubka Nak. 38 Nu chelee xaa Israel leya, zee koo re xaa xaa yezh.