Kayaa Aarón nu re xgann xaa yalnabeyy gak xaa ngwleyy
29
&Kwaane gak kwaan le lu zee gak nzhul Aarón nu re xgann xaa, zee gak xaa xngwleyy na. Bzen: tub la ngoon yeen nu chop mbakxiil mach ma wen; 2 nu chon lo yat kwaan nayot lebadur leen; tub yat gak yat sbaasa, stuba nkano anseyt leen, nu stuba nak kwenta gayet kwaan teeb xaa nseyt lo. Nu dexkwaa luya kwaan arin wen doo. 3 Nu zhiib gu yat lo chekwid, nu yiidno lu tub la ngoon yeen nu rop mbakxiil, zee wee guya garli na. 4 Nu zhino lu Aarón nu re xgann xaa roo li na, zee segaz lu xaa kwaan nis. 5 Nu bzen xab ngwleyy, zee segak lu Aarón ler noll, ler sul, kwaan nak mod mandil, nu kwaan ke laz xaa nu zi sindor leen xaa. 6 Nu yek xaa, zob lu tub kwaan ral yek xaa, nu lo kwaan ba zob lu koron. 7 Zee zen lu nseyt kwaan nle nzhul nu xo luya yek xaa, zee gak nzhul xaa. 8 Ble zee bii gax re xgann Aarón nu segak xaa ler noll. 9 Nu zi lu sindor lextoo Aarón nu lextoo re xgann xaa, nu wen zob kwaan yek xaa zee gak xaa ngwleyy nu sbaa kayaa lee xaa nu re xgann xaa yalnabeyy mod ngwleyy, nu tira gak xtii xaa xngwleyy na.10 &Zee yiidno lu ngoon yeen pa nak li na, Aarón nu re xgann xaa zhiib yaa yek ngoon yeen. 11 Nu gut lu tub la ngoon yeen lo na, Xaa Tubka Nak, roo li na. 12 Kwaan kwen yaa lu teeb lu ren cheen ngoon yeen yek xkach mdo, lee re ren kwaan lake zee xo lu nii mdo. 13 Nu lee ze kwaan nke cho xtrip ma, nu ze kwaan nke cho lextoo yix ma nzhaal kiib lu nu zeek luya tubka kwaan rop xrinyon ma kwaan re ze kwaan nke choya; 14 per lee baal yed cho ma nu xke ngoon yeen zeek lu lo bal naz jwer roo yezh, paro mbaz re xaa, lee ma nak gon kwaan nle nzhul xaa.
15 &Sbaaka zen lu tub mbakxiil. Lee Aarón nu re xgann xaa zhiib yaa xaa yek ma, 16 nu gut lu mbakxiil, nu xren ma xo lu dub welt cho mdo. 17 Zee le byog lu mbakxiil nu zet lu xtriip ma, kor ma nu tuka chaal luya re kwaan ngok byog nu zeek lu ma. 18 Nu zeek lu dubse mbakxiil lo mdo, nu gaka tub gon kwaan chul doo nzebech lo na, Xaa Tubka Nak.
19 &Zeera zen lu stub mbakxiil. Lee Aarón nu re xgann xaa zhiib yaa yek ma. 20 Zee gut lu mbakxiil nu zen lu xren ma nu teeb luya lad li xan nzha Aarón nu cho nzha re xgann xaa, nu kwen yaa re xaa kwaan nachaa lad li nu kwen nii re xaa kwaan nachaa lad li, zeera xo lu ren dub welt cho mdo. 21 Nu lee ren kwaan lake lo mdo nu nseyt kwaan le nzhul xaa, chuun luya lo Aarón nu lo xab xaa, lo xab xgann xaa, nu lo re xgann xaa, zee gak nzhul xaa nu xab xaa, nu xgann xaa nu xab xgann xaa.
22 &Zeera zen lu xwann mbakxiil, nu ze kwaan nke cho xtriip ma, nu ze kwaan nke cho lextoo yix ma, nu ze kwaan rop xrinyon ma kwaan re ze kwaan nke choya, kor ma lad li, nel lee ma nak tub ma zee kayaa xaa yalnabeyy mod ngwleyy. 23 Leen chekwid ko lu: tub yat sbaasa, tub yat kwaan nyu nseyt leen nu stuba kwaan nak mod gayet kwaan dexkwaa arin wen kwaan nyent lebadur leen. 24 Nu rese kwaane zaa lu lo Aarón nu lo re xgann xaa, zee kun xaaya lo mdo lo na, Xaa Tubka Nak. Nak tub gon kwaan mgun lo mdo. 25 Zeera zen lu yat kwaan nzho yaa xaa nu zeek luya lo mdo kwaan mbakxiil kwaan nzhaal yek nel bech cheen na nak kwaan kayaa na, Xaa Tubka Nak, nel naka tub gon kwaan zaa xaa lo na.
26 &Nu bzen laz mbakxiil kwaan le zee kayaa Aarón yalnabeyy mod ngwleyy, gon kwaan kun lu lo mdo lo na, Xaa Tubka Nak, nu komba nak kwaan yizo lu. 27 Lee laz mbakxiil kwaan koxa xaa, kun lu lo mdo leezha le lu zee lee Aarón nu re xgaan xaa kayaa yalnabeyy mod ngwleyy, nu noka lee kor ma, ma gak gon, gak kwaan nzhaal gaw xaa. 28 Nu baal ne gak kwaan yizo Aarón nu re xgann xaa kwenta ley kwaan tubka yo lo re xaa Israel, nel gaka tub gon kwaan zaa rese xaa Israel zee kwi wen xaa kwaan na, Xaa Tubka Nak.
29 &Nu lee ler nzhul kwaan gak Aarón gak xcheen tub xgann xaa, zee lakeya lo re xtii xaa, leezha kayaa xaa yalnabeyy mod ngwleyy. 30 Nu dubse tub gazh mbizh gak xgann xaa xab ngwleyy, gorna ya xaa leen li na Pa Nambey, Xaa Tubka Nak, nu le xaa xchinn ngwleyy.
31 &Nu bzen mbakxiil ma mach, ma le zee kayaa xaa yalnabeyy mod ngwleyy nu zob xpaal ma lo ki, tub pa nambey. 32 Aarón nu re xgann xaa gaw xpaal mbakxiil nu yat kwaan nzho leen chekwid ro li na. 33 Sbaa gaw xaa ma kwaan mted xaa leezha mkayaa xaa yalnabeyy mod ngwleyy, per nik tub xaa sbaasa nyent mod gaw kwaane, nel naka kwaan nzhul.
34 &Nu chelee baal nu yat kwaan mlake stub mbizh, nagarlot gaw xaaya, nzhaal zeek xaaya, nel naka kwaan nle zee kayaa xaa yalnabeyy mod ngwleyy.
35 &Snee le lu lo Aarón nu lo re xgann xaa, modxa ni na gak re kwaan, dubse tub gazh mbizh gak nzhul xaa. 36 Yizata mbizh teed lu tub la ngoon yeen lo na zee zhe re xjwalt Aarón nu re xgann xaa. Nu teed lu ma lo mdo zee zhe xjwalt xaa, nu chub lu nseyt cho mdo zee gak nzhula. 37 Dubse tub gazh mbizh nzhaal teed lu ma lo mdo snee le nambey luya, zee gaka tub Pa Nambey doo nu nexa xana kwaan gal lo mdo, noka leeya lake nambey.
Gon kwaan zaa xaa rese mbizh
38 &Kwaane gak kwaan teed lu lo mdo; yizata mbizh zaa lu chop mbakxiil yeen ma nzho tub liin. 39 Nu tub ma zaa lu garziil nu stub ma zaa lu zhel yizhyo. 40 Nu lee mbakxiil yeen ma yilo, teed lu ma kwaan chop kil arin wen, nu guch luya kwaan tub litr nseyt cheen olib nu xo lu tub litr nis ub choya. 41 Nu sbaaka zaa lu stub mbakxiil yeen zhel yizhyo kwaan arin nu nis ub, modxa mted lu ma garziil, zee gaka tub gon kwaan nax nzebech lo na, Xaa Tubka Nak, gaka tub gon kwaan yek lo na. 42 Kwaane gak gon kwaan tubka le re xtii gu roo li na, Xaa Tubka Nak, nel baa zhaal be zee nii na lo gu. 43 Nu baa zhaal na kwaan re xaa Israel, nu baa gak pa nzhul kwent cheen xni chul cheen na. 44 Nu le nzhul na li na nu lo mdo, nu noka le nzhul na Aarón nu re xgann xaa, zee gak xaa xngwleyy na. 45 Nu yoo na lo re xaa Israel, nu gak na Xtios xaa. 46 Snee labeyy xaa lee na nak Xtios xaa, Xaa Tubka Nak, xaa mloo gu yizhyo Egipto zee tubka zo na lo gu, xaa nak Xtios gu.